Psalme 62:1-12
Ditaelo tšeo di yago go mohlahli: Koša ya Dafida. Diriša mokgwa wa Jeduthune.*
62 Ka nnete ke letetše Modimo ke sa fele pelo.
Ke yena a mphološago.
2 Ke leswika la ka le mophološi wa ka, lefelo leo ke tšhabelago go lona.Le ka mohla nka se šikinywe.
3 Le tla hlasela motho yo le nyakago go mmolaya go fihla neng,
Lena ka moka bao le lego kotsi go swana le leboto leo le sekamego, leboto la maswika leo le lego kgauswi le go wa?
4 Ba nea motho keletšo e mpe e le gore ba mo theole seriti.Ba thabela go bolela maaka.
Ba dira eka ba reta motho ka melomo ya bona, eupša ka dipelong tša bona ba a mo roga. (Selah)
5 Ke tla letela Modimo ke sa fele pelo,Ka gobane ke tshepile yena.
6 Ke leswika la ka le mophološi wa ka, lefelo leo ke tšhabelago go lona.Le ka mohla nka se šikinywe.
7 Modimo ke yena a mphološago e bile o a mphagamiša.
Modimo ke leswika la ka leo le tiilego le lefelo leo ke tšhabelago go lona.
8 Lena batho, mo tshepeng ka dinako ka moka.
Mmotšeng dilo tšeo di le tshwenyago.
Modimo ke lefelo leo re tšhabelago go lona. (Selah)
9 Batho ba swana le mohemo feela,E bile o ka se ithekge ka bona.
Le ge ba ka bewa sekaleng, ba fetwa le ke mohemo ka boima.
10 Le se ke la nagana gore le tla humišwa ke go dira dilo tša boradia,Goba la tshepa go swara batho poo.
Le ge mahumo a lena a oketšega, le se ke la ithekga ka ona.
11 Ke kwele Modimo a bolela ka makga a mabedi
Gore matla ke a Modimo.
12 Wena Jehofa, ke wena o bontšhago lerato le le botegago.Le gona, o bušetša yo mongwe le yo mongwe go ya ka mediro ya gagwe.
Mengwalo ya tlase
^ Bona Tlhaloso ya Mantšu.
