Doiteronomio 10:1-22
10 “Ka nako yeo Jehofa a re go nna: ‘Ipetlele diphaphathi tše pedi tša maswika tšeo di swanago le tšela tša pele, gomme o tle mo go nna thabeng. Le gona o itirele areka ya kota.
2 Moo diphaphathing tšeo ke tla ngwala mantšu ao a bego a le diphaphathing tšela tša pele tšeo o di pšhatlagantšego, ke moka o di bee ka arekeng.’
3 Ka gona ka dira areka ka kota ya mohlare wa mošwana, gomme ka betla diphaphathi tše pedi tša maswika tše di swanago le tšela tša pele, ka ya thabeng ke swere diphaphathi tšeo tše pedi.
4 Ke moka moo diphaphathing tšeo a ngwala mantšu a swanago le ale a pele, e lego Melao e Lesome yeo Jehofa a le boditšego yona thabeng gare ga mollo letšatšing la ge le be le bokane, gomme ka morago ga moo Jehofa a nnea tšona.
5 Ke moka ka sepela ka theoga moo thabeng, ka bea diphaphathi tšeo ka arekeng yeo ke bego ke e dirile, moo di sa lego gona le lehono, feela bjalo ka ge Jehofa a be a ntaetše.
6 “Ke moka Baisiraele ba tloga Beerothe Bene-jaakane ba ya Mosera. Arone o hwetše moo a ba a bolokelwa gona, gomme morwa wa gagwe Eleasara a ba moperisita legatong la gagwe.
7 Go tloga moo ba ya Gudegoda gomme go tloga Gudegoda ba ya Jotobatha, e lego naga ya meedi yeo e elelago meetse.
8 “Ka nako yeo Jehofa a kgetha ba moloko wa Lefi gore e be bona ba rwalago areka ya Jehofa ya kgwerano, gore e be bona ba hlankelago pele ga Jehofa le go šegofatša batho ka leina la gagwe, bjalo ka ge ba dira go fihla lehono le.
9 Ke ka baka leo ba moloko wa Lefi ba sego ba newa karolo goba bohwa go swana le meloko e mengwe.* Jehofa yena ke bohwa bja bona, feela bjalo ka ge Jehofa Modimo wa lena a ba boditše.
10 Nna ke ile ka dula thabeng matšatši a 40 le mašego a 40 go swana le mathomong, gomme le gona moo Jehofa o ile a ntheetša. Jehofa o be a sa nyake go le fediša.
11 Ke moka Jehofa a re go nna: ‘Eta batho ba setšhaba se pele ba itokišetše go sepela gore ba yo tšea naga yeo ke enetšego borakgolokhukhu ba bona gore ke tla ba nea yona.’
12 “Bjale lena Baisiraele, ke eng seo Jehofa Modimo wa lena a se kgopelago go lena? O kgopela feela gore le boife Jehofa Modimo wa lena, le sepele ditseleng tša gagwe ka moka, le mo rate, le hlankele Jehofa Modimo wa lena ka dipelo tša lena ka moka le ka moya wa lena ka moka,
13 le gore le latele ditaelo le melao ya Jehofa yeo ke le neago yona lehono e le gore le holege.
14 Theetšang, magodimo ke a Jehofa Modimo wa lena, gaešita le magodimo a godimodimo, le lefase gotee le dilo ka moka tšeo di lego go lona.
15 Eupša ke borakgolokhukhu ba lena feela bao Jehofa a ilego a ba rata, gomme a kgetha lena bana ba bona ditšhabeng ka moka, go etša ge a le kgethile lehono.
16 Le hlwekišeng dipelo tša lena gomme le se sa ba le dihlogo tše thata.
17 Ka gobane Jehofa Modimo wa lena ke Modimo yo a fetago medimo e mengwe ka moka, le Morena wa marena, yena Modimo yo mogolo, yo a nago le matla le yo batho ba swanetšego go mmoifa le go mo hlompha, yo a sa kgethollego batho le yo a sa amogelego pipamolomo.
18 Yo a swarago tšhiwana le mohlologadi ka toka, le yo a ratago motho yo e sego Moisiraele le go mo nea dijo le diaparo.
19 Le lena le rate batho bao e sego Baisiraele, ka gobane le be le dula nageng ya Egepeta yeo e sego ya gabo lena.
20 “Le boife Jehofa Modimo wa lena, le mo hlankele, le mmotegele, e bile le ene ka leina la gagwe.
21 Ke yena le swanetšego go mo tumiša, ke Modimo wa lena yo a le diretšego dilo tše ka moka tše kgolo tše di makatšago le tše di tšhošago tšeo lena le di bonego.
22 Borakgolokhukhu ba lena e be e le ba 70 ge ba be ba eya Egepeta, gomme gona bjale Jehofa Modimo wa lena o dirile gore le oketšege le be ba bantšhi go swana le dinaledi tša magodimong.
Mengwalo ya tlase
^ Phetolelo ya lentšu ka lentšu e re, “banababo.”
