Ekisodo 4:1-31
4 Ke moka Moshe ge a araba a re: “Bjale ke dire’ng ge ba sa ntshepe e bile ba sa ntheetše, ka gobane ba tlo mpotša gore: ‘Ga go kgonege gore Jehofa a iponagatše go wena.’”
2 Ke moka Jehofa a re go yena: “O swere’ng ka seatleng sa gago?” Yena a re: “Ke lepara.”
3 Modimo a re: “Le lahlele fase.” Ka gona Moshe a le lahlela fase la fetoga noga gomme a tšhaba mo go yona.
4 Bjale Jehofa a re go Moshe: “Otlolla letsogo o e sware ka mosela.” Ka gona Moshe a otlolla letsogo a e swara ka mosela gomme ya fetoga lepara.
5 Ke moka Modimo a re: “O dire se e le gore ba dumele gore Jehofa Modimo wa borakgolokhukhu ba bona, yena Modimo wa Aborahama, Modimo wa Isaka le Modimo wa Jakobo o iponagaditše go wena.”
6 Le gona Jehofa a re go yena: “Hle tsenya seatla sa gago ka gare ga seaparo sa gago mo sehubeng.” Ke moka Moshe a se tsenya moo. Ge a se ntšha se be se tletše lephera e le se sešweu bjalo ka kapoko.
7 Ka morago ga moo Modimo a re go yena: “Bušetša seatla sa gago ka gare ga seaparo sa gago mo sehubeng.” Ka gona a bušetša seatla sa gagwe moo. Ge a se ntšha se be se fodile se swana le mmele wa gagwe ka moka.
8 Ke moka Modimo a re go yena: “Ge e ba ba sa go tshepe e bile ba sa go theetše ka morago ga ge ba bone mohlolo wa pele, ba tla go tshepa ka morago ga gore ba bone wo wa bobedi.
9 Le gona ge e ba ba sa tshepe mehlolo ye e mebedi e bile ba sa go theetše, gona o ye o yo ga meetse Nokeng ya Nile o a tšhollele mo go omilego gomme meetse ao a tla fetoga madi moo o a tšholletšego gona.”
10 Bjale Moshe a re go Jehofa: “Aowa hle Jehofa, nna mohlanka wa gago ga ke seboledi, ke go tloga kgale ke sa kgone go bolela, le pele o tlo bolela le nna. Ka gobane ke bolela ka go nanya.”
11 Ke moka Jehofa a re go yena: “Ke mang a dirago gore motho a kgone go bolela goba yo a dirago gore go be le dimumu, difoa, batho ba go bona gabotse goba bao ba foufetšego? Na ga se nna Jehofa ke dirago dilo tšeo?
12 Bjale sepela gomme nna ke tla go thuša ge o bolela, e bile ke tla go ruta dilo tšeo o swanetšego go di bolela.”
13 Eupša Moshe a re go yena: “Aowa hle Jehofa, roma yo mongwe e sego nna.”
14 Ke moka Jehofa a galefela Moshe kudu gomme a re go yena: “Butiago Arone yo a tšwago lelokong la Lefi o kgona go bolela gabotse, e bile ke yola o tlo go gahlanetša. Ge a go bona o* tlo thaba kudu.
15 Bjale o mmotše seo a tlago go se bolela, ke tla le thuša ge le bolela e bile ke tla le ruta dilo tšeo le swanetšego go di dira.
16 O bolele le Arone legatong la ka gomme yena o tla bolela le setšhaba legatong la gago.
17 Wena o tla swara lepara leo ka seatla sa gago e le gore o dire mehlolo ka lona.”
18 Ka gona Moshe a boela go Jethero ratswalagwe gomme a re go yena: “Ke nyaka go sepela hle ke boele go bana bešo bao ba lego Egepeta gore ke yo bona ge e ba ba sa phela gabotse.” Ka gona Jethero a re go Moshe: “Tsela tšhweu.”
19 Ge Moshe a be a sa le Midiane, Jehofa o ile a re go yena: “Boela Egepeta, ka gobane batho ka moka bao ba bego ba nyaka go go bolaya ba hwile.”
20 Ke moka Moshe a tšea mosadi wa gagwe le barwa ba gagwe a ba nametša tonki gomme a boela nageng ya Egepeta. Moshe a tšea lepara leo Modimo wa nnete a mmoditšego gore a le tšee.
21 Jehofa a re go Moshe: “Ge o boetše Egepeta, o netefatše gore ge o fihla pele ga Farao o dira mehlolo ka moka yeo ke go filego matla a go e dira. Ke tla mo lesa a thatafiša hlogo* gomme a ka se dumelele batho ba ka ba sepela.
22 O botše Farao o re: ‘Jehofa o re: “Isiraele ke morwa wa ka, yena morwa wa ka wa mathomo.
23 Bjale ke re go wena: Lesa morwa wa ka gore a tle a ntlhankele. Eupša ge o ka gana gona ke tlo bolaya morwa wa gago wa mathomo.”’”
24 Eitše ge ba le tseleng lefelong leo go robalwago go lona, Jehofa* a mo gahlanetša gomme o be a nyaka go mmolaya.*
25 Mafelelong Tsipora a tšea leswika le bogale a bolotša morwa wa gagwe gomme a tšea nama yeo a e boloditšego a e bea maotong a gagwe,* a re: “Ke ka gobane o bile monna wa ka ka baka la madi a.”
26 Ke moka Modimo a mo tlogela. Ka nako yeo Tsipora a re: “O monna wa ka ka baka la madi a,” ka ge ke boloditše morwa wa ka.
27 Bjale Jehofa a re go Arone: “Eya o gahlanetše Moshe kua lešokeng.” Ke moka Arone a ya go mo gahlanetša kua thabeng yeo Modimo wa nnete a e kgethilego gomme a mo khisa.
28 Ka gona Moshe a botša Arone dilo ka moka tšeo Jehofa a mmoditšego tšona, a mmotša le ka mehlolo ka moka yeo a mo laetšego gore a e dire.
29 Ka morago ga moo Moshe le Arone ba ya ba kgoboketša banna ba bagolo ka moka ba Baisiraele.
30 Ke moka Arone a bolela dilo ka moka tšeo Jehofa a di boditšego Moshe gomme Moshe a dira mehlolo ka moka pele ga setšhaba.
31 Ge Baisiraele ba bona dilo tšeo ba tshepa Moshe. Ge ba ekwa gore ga bjale Jehofa o bone gore ba a hlaka e bile o nyaka go ba thuša, ba inama gomme ba khunama ka matolo.
Mengwalo ya tlase
^ Phetolelo ya lentšu ka lentšu e re, “pelo ya gagwe.”
^ Phetolelo ya lentšu ka lentšu e re, “thatafiša pelo.”
^ Dingwalwa tše dingwe di re, “morongwa wa Jehofa.”
^ Go ka direga gore go bolelwa ka morwa wa Moshe.
^ Go ka direga gore go bolelwa ka maoto a morongwa.
