Genesi 1:1-31
1 Mathomong Modimo o bopile legodimo le lefase.
2 Lefase le be le se na selo e bile go se na selo seo se ka kgonago go phela go lona. Go be go tletše meetse a mantši gohle e bile e le leswiswi, gomme matla ao Modimo a a šomišago a be a eya pele le morago godimo ga meetse.
3 Ke moka Modimo a re: “A go be le seetša.” Seetša sa ba gona.
4 Ka morago ga moo, Modimo a bona gore seetša ke se sebotse gomme a thoma go aroganya seetša le leswiswi.
5 Modimo a re seetša ke Mosegare gomme leswiswi a re ke Bošego. Ya ba mantšiboa, ke moka ya ba mesong, e lego letšatši la pele.
6 Ke moka Modimo a re: “A go be le lefaufau magareng ga meetse gomme meetse ao a aroganywe.”
7 Ke moka Modimo a dira lefaufau gomme a aroganya meetse. A mangwe a ba ka fase ga lefaufau, a mangwe a ba ka godimo ga lona, gomme gwa ba bjalo.
8 Modimo a re lefaufau leo ke Legodimo. Ya ba mantšiboa ke moka ya ba mesong, e lego letšatši la bobedi.
9 Ke moka Modimo a re: “Anke meetse ao a lego lefaseng a kgobokane felo gotee gomme go bonagale mo go omilego,” gomme gwa ba bjalo.
10 Modimo a re mo go omilego ke Lefase, gomme mo go kgobokanego meetse ke Lewatle. Ke moka Modimo a bona dilo tšeo a di dirilego e le tše dibotse.
11 Modimo a re: “Lefaseng a go mele bjang, dimela tšeo di tšweletšago peu, mehlare yeo e tšweletšago dienywa go ya ka mehuta ya yona, yeo dienywa tša yona di nago le peu,” gomme gwa ba bjalo.
12 Lefaseng gwa thoma go mela bjang, dimela tše di tšweletšago peu le mehlare ya mehutahuta ya dienywa tšeo di nago le peu. Ke moka Modimo a bona dilo tšeo a di dirilego e le tše dibotse.
13 Ya ba mantšiboa, ke moka ya ba mesong, e lego letšatši la boraro.
14 Ke moka Modimo a re: “A go be le dilo tšeo di tšweletšago seetša lefaufaung gore di aroganye mosegare le bošego. Di tla bontšha dihla, matšatši le mengwaga.
15 E tla ba dietša tša lefaufaung gore di bonegele lefase,” gomme gwa ba bjalo.
16 Modimo a dira letšatši le ngwedi, letšatši la bonega mosegare gomme ngwedi wa bonega bošego. A dira le dinaledi.
17 Modimo a di bea magodimong* gore di bonegele lefase,
18 e le gore di bonege mosegare le bošego gomme di aroganye seetša le leswiswi. Ke moka Modimo a bona dilo tšeo a di dirilego e le tše dibotse.
19 Ya ba mantšiboa, ke moka ya ba mesong, e lego letšatši la bone.
20 Modimo a re: “Anke ka meetseng go tlale diphedi, le gona anke dinonyana di fofe magodimong, godimodimo lefaufaung.”
21 Modimo a bopa diphedi tše dikgolokgolo tša ka lewatleng le diphedi tše dingwe tša mehutahuta tša ka meetseng, a bopa le diphedi tša mehutahuta tšeo di nago le maphego. Ke moka Modimo a bona dilo tšeo a di dirilego e le tše dibotse.
22 Ke moka Modimo a di šegofatša a re: “Anke diphedi tša ka meetseng di tswale e be tše dintši, le gona anke dinonyana e be tše dintši lefaseng.”
23 Ya ba mantšiboa, ke moka ya ba mesong, e lego letšatši la bohlano.
24 Ke moka Modimo a re: “Anke lefaseng go be le diphedi tša mehutahuta, diruiwa, digagabi le diphoofolo tša naga tša mehutahuta,” gomme gwa ba bjalo.
25 Modimo a dira diphoofolo tša naga tša mehutahuta, diruiwa tša mehutahuta le digagabi tša mehutahuta. Ke moka Modimo a bona dilo tšeo a di dirilego e le tše dibotse.
26 Ke moka Modimo a re: “A re dire motho, a swane le rena,* a hlokomele dihlapi tša ka lewatleng, dinonyana tše di fofago magodimong, diruiwa, lefase ka moka le segagabi se sengwe le se sengwe seo se gagabago lefaseng.”
27 Modimo a bopa motho ka seswantšho sa gagwe, a mmopa gore a swane le yena, a bopa monna le mosadi.
28 Ke moka Modimo a ba šegofatša a re go bona: “Ebang le bana ba bantši le tlale lefase le be le le hlokomele, le hlokomele le dihlapi tša ka lewatleng, dinonyana tše di fofago magodimong le diphedi ka moka tše di gagabago lefaseng.”
29 Modimo a re: “Ke le file dimela ka moka tše di tšweletšago dipeu tšeo di lego lefaseng ka moka, le mehlare ka moka yeo e nago le dienywa tšeo di tšweletšago peu. Ke le fa tšona gore e be dijo tša lena.
30 Diphoofolo ka moka tša naga, dinonyana ka moka tše di fofago magodimong le digagabi ka moka tšeo di gagabago mo lefaseng tšeo di phelago, ke di neile dimela ka moka tše tala gore e be dijo tša tšona,” gomme gwa ba bjalo.
31 Ge Modimo a lebelela dilo ka moka tšeo a di dirilego, a bona e le tše dibotse kudu. Ya ba mantšiboa, ke moka ya ba mesong, e lego letšatši la botshelela.
Mengwalo ya tlase
^ Phetolelo ya lentšu ka lentšu e re, “sebakabakeng sa magodimo.”
^ Phetolelo ya lentšu ka lentšu e re, “ka seswantšho sa rena.”
