Genesi 16:1-16
-
Hagara le Ishimaele (1-16)
16 Bjale Sarai mosadi wa Aborama o be a se a mmelegela bana, eupša o be a na le mohlanka yo e lego Moegepeta yoo leina la gagwe e bego e le Hagara.
2 Ka gona Sarai a re go Aborama: “Ke kgopela o ntheetše! Jehofa o nthibetše go belega bana. Hle anke o robale le mohlanka wa ka, mohlomongwe a ka mpelegela bana.” Ke moka Aborama a kwa seo Sarai a se boletšego.
3 Ka morago ga ge go fetile mengwaga e lesome Aborama a dula nageng ya Kanana, Sarai mosadi wa Aborama o ile a tšea Hagara mohlanka wa gagwe wa Moegepeta a mo nea Aborama monna wa gagwe gore e be mosadi wa gagwe.
4 Aborama a robala le Hagara ke moka a ima. Ge Hagara a lemoga gore o imile, a thoma go nyatša Sarai mong wa gagwe.
5 Ge Sarai a bona seo a re go Aborama: “Bohloko bjo Hagara a nkwešago bjona ke molato wa gago, ke nna ke go filego mohlanka wa ka gore o robale le yena, eupša ge a lemoga gore o imile a thoma go nnyatša. Anke Jehofa a ahlole gore ke mang a nago le molato magareng ga ka le wena.”
6 Ka gona Aborama a re go Sarai: “Hagara ke mohlanka wa gago. Mo dire seo o nyakago go mo dira sona.” Ke moka Sarai a mo swara gampe moo a ilego a mo tšhabela.
7 Ka morago morongwa wa Jehofa a mo hwetša sedibeng kua lešokeng, sedibeng seo se lego tseleng e yago Shuri.
8 Morongwa a re go yena: “Hagara mohlanka wa Sarai, o tšwa kae le gona o ya kae?” Hagara yena a re: “Ke tšhaba mong wa ka Sarai.”
9 Morongwa wa Jehofa a re go yena: “Boela go mong wa gago gomme o ikokobetše o kwe se sengwe le se sengwe seo a go botšago sona.”
10 Ke moka morongwa wa Jehofa a re: “Ke tla dira gore o be le bana ba bantši kudu, gomme ba ka se balege.”
11 Morongwa wa Jehofa a oketša ka gore: “Wena šefa o imile, gomme o tla belega morwa wa mo reela leina la Ishimaele, ka gobane Jehofa o kwele ka mohlako wa gago.
12 Yena o tla swana le tonki ya naga. O tla lwa le batho ka moka gomme batho ka moka ba tla lwa le yena, o tla dula kgole le bana babo ka moka.”
13 Ke moka Hagara a tumiša leina la Jehofa yo a bego a bolela le yena a re: “Wena o Modimo yo a bonago dilo ka moka,” ka gobane Hagara o rile: “Na gona mo lefelong le ga se ka bona yo a mponago?”
14 Ke ka baka leo sediba seo se ilego sa bitšwa Beera-lahai-roi. Sediba seo se magareng ga Kadeshe le Berede.
15 Ka morago Hagara a belegela Aborama morwa, gomme Aborama a reela morwa wa gagwe yo Hagara a mmelegetšego yena leina la Ishimaele.
16 Aborama o be a na le mengwaga e 86 ge Hagara a be a belega Ishimaele.
