Genesi 23:1-20
-
Lehu la Sara le moo a boloketšwego gona (1-20)
23 Sara o be a na le mengwaga e 127 (lekgolo-masomepedi-šupa) ge a be a hlokofala.
2 O ile a hlokofalela Kiriathe-araba, e lego Heburone, nageng ya Kanana. Aborahama o ile a kwa bohloko kudu e bile a llela Sara.
3 Ke moka Aborahama a tloga pele ga mosadi wa gagwe yo a hlokofetšego, gomme a bolela le Bahethe a re:
4 “Ka ge ke le motšwantle yo a dulago le lena, ke kgopela le nthekišetšeng lefelo leo nka bolokelago mosadi wa ka go lona.”
5 Ke moka ba araba Aborahama ba re go yena:
6 “Re theetše hle mong wa rena. Mo go rena o kgošana yeo e kgethilwego ke Modimo. O ka boloka mosadi wa gago lefelong le le kaonekaone la dirapeng tša rena. Mo go rena ga go na motho le o tee yo a ka ganago go go fa serapa sa gagwe gore o boloke mosadi wa gago.”
7 Aborahama a ema gomme a inama pele ga batho ba nageng yeo, e lego Bahethe,
8 a re go bona: “Ge e ba le dumela gore ke boloke mosadi wa ka, gona ntheetšeng le be le nkgopeleleng go Efurone morwa wa Tsohara,
9 gore a nthekišetše lewa la gagwe leo le lego mafelelong a naga ya gagwe kua Makapela. Ke kgopela gore a nthekišetše lewa le ka selifera yeo le swanetšego go rekwa ka yona le lena le le gona, gore ke tle ke boloke Sara go lona.”
10 Bjale Efurone yoo le yena e bego e le Mohethe, o be a dutše le Bahethe ba bangwe. Ka gona a araba Aborahama Bahethe ba bangwe ba theeditše le batho ka moka bao ba bego ba le kgorong ya motse, a re:
11 “Aowa, mong wa ka! Ntheetše. Ke go nea naga le lewa leo le lego mo go yona. Ke go nea yona pele ga batho ba ba gešo. Boloka mosadi wa gago moo.”
12 Ke moka Aborahama a inama pele ga batho ba nageng yeo.
13 A bolela le Efurone batho bao ba mo theeditše a re: “Ntheetše hle! Ke tla e reka ka silifera yeo naga ye e swanetšego go rekwa ka yona. Tšea silifera ye, gore ke tle ke kgone go boloka Sara moo.”
14 Ke moka Efurone a araba Aborahama a re go yena:
15 “Ntheetše, hle mong wa ka. Naga ye e rekišwa ka ditšhelete* tša silifera tše 400, eupša tšhelete ga e bohlokwa kudu go nna. Ka gona sepela o yo boloka mosadi wa gago.”
16 Ka gona Aborahama a theetša Efurone, gomme Aborahama a kalela Efurone silifera ya go lekana le yeo Efurone a boletšego ka yona nakong ya ge Bahethe ba mo theeditše. Yona e be e le ditšhelete tša silifera tše 400, go ya le kamoo barekiši ba bego ba kala dilo ka gona nakong yeo.
17 Ka gona Efurone a rekiša naga ya Makapela, yeo e bego e le kgauswi le Mamure. Ka gona, naga, lewa le mehlare ka moka yeo e bego e le nageng yeo,
18 ka moka tša newa Aborahama pele ga Bahethe le batho ka moka bao ba bego ba le kgorong ya motse.
19 Ka morago ga moo Aborahama a boloka Sara mosadi wa gagwe leweng la Makapela kgauswi le Mamure, yeo e lego Heburone, kua nageng ya Kanana.
20 Ka gona, naga le lewa leo tša newa Aborahama pele ga Bahethe, gomme yena a bolokela mosadi wa gagwe moo.
Mengwalo ya tlase
^ Phetolelo ya lentšu ka lentšu e re, “dishekele tše 400 tša silifera.”
