Genesi 26:1-35
26 Bjale go ile gwa wa tlala moo nageng. Tlala yeo e be e kile ya ba gona le mehleng ya Aborahama. Ka gona, Isaka o ile a ya go Abimeleke kgoši ya Bafilisita kua Gerara.
2 Ke moka Jehofa a iponagatša go yena a re: “O se ke wa ya Egepeta. Dula nageng yeo ke go boditšego gore o dule go yona.
3 Dula mo nageng ye, yeo e sego ya geno, gomme ke tla dula ke go thuša ka ba ka go šegofatša, ka gobane dinaga tše ka moka ke tla di nea wena le bana ba gago, le gona ke tla phethagatša keno yeo ke e enetšego Aborahama tatago.
4 ‘Ke tla dira gore bana ba gago e be ba bantši kudu go swana le dinaledi tša magodimong gomme ka dira gore dinaga tše ka moka e be tša bona. Ditšhaba ka moka lefaseng di tla šegofatšwa ka baka la bana ba gago,’
5 ka gobane Aborahama o ile a nkwa, le gona o ile a tšwela pele a dira dilo tšeo ke mo laelago gore a di dire, e bile a latela melao ya ka ka moka.”
6 Ka gona Isaka o ile a tšwela pele a dula Gerara.
7 Ge banna ba moo ba be ba dula ba mmotšiša ka mosadi wa gagwe, o be a ba botša gore: “Ke kgaetšedi ya ka.” O be a tšhaba go ba botša gore ke mosadi wa gagwe ka ge a be a nagana gore ba tla mmolaya e le gore ba tšee Rebeka, ka gobane e be e le yo mobotse.
8 Ka morago ga nakonyana Isaka a šetše a dula moo, Abimeleke kgoši ya Bafilisita o ile a re a lebeletše ka ntle ka lefasetere, a bona Isaka a thabišana le Rebeka mosadi wa gagwe.
9 Kapejana Abimeleke a bitša Isaka gomme a re go yena: “Motho yo ke mosadi wa gago! Bjale ke ka baka la’ng o itše ke kgaetšedi ya gago? Ke moka Isaka a re go yena: “Ke be ke tšhaba gore banna ba mo ba tla mpolaya gore ba mo tšee.”
10 Eupša Abimeleke o ile a re: “Ke ka baka la’ng o re dirile ka mokgwa wo? Go be go ka direga gore yo mongwe wa batho ba mo a robale le mosadi wa gago, gomme nkabe o re baketše molato!”
11 Ke moka Abimeleke a botša batho ba gagwe ka moka a re: “Motho le ge e le mang yo a ka swarago monna yo le mosadi wa gagwe gampe o tla bolawa!”
12 Ka morago ga moo Isaka a bjala peu nageng yeo, gomme ka wona ngwaga woo a buna masaka a 100 go tšwa lesakeng letee leo a le bjetšego, ka ge Jehofa a be a mo šegofatša.
13 Ka gona Isaka o ile a tšwela pele a eba le dilo tše dintši, go ba go fihlela a huma kudukudu.
14 O ile a ba le mehlape ya dinku le ya dikgomo le bahlanka ba bantšintši, gomme Bafilisita ba ile ba thoma go mo jela mona.
15 Ke moka Bafilisita ba ile ba tšea mmu ba phušetša didiba ka moka tšeo bahlanka ba tatagwe ba bego ba di epile. Didiba tšeo ba be ba di epile mehleng ya Aborahama tatagwe.
16 Bjale Abimeleke a re go Isaka: “Sepela mo ga gabo rena, ka gobane o humile kudu go re feta.”
17 Ka gona Isaka o ile a huduga moo gomme a yo hloma ditente moeding wa Gerara, a thoma go dula moo.
18 Isaka o ile a epa gape didiba tša meetse tšeo bahlanka ba Aborahama tatagwe ba bego ba di epile, tšeo Bafilisita ba ilego ba di phušetša ka morago ga gore Aborahama a hlokofale. Le gona o ile a di bitša ka maina ao tatagwe a bego a di bitša ka ona.
19 Ge bahlanka ba Isaka ba epa moo moeding, ba ile ba hwetša sediba sa meetse a go hlweka.
20 Badiši ba Gerara ba thoma go lwa le badiši ba Isaka ba re: “Sediba se ke sa rena!” Ka gona o ile a bitša sediba seo Eseke,* ka gobane ba be ba lwele le yena.
21 Ba ya ba epa sediba se sengwe gape, gomme le sona ba se bakišana le bona. Ka gona a se bitša gore ke Sitena.*
22 Ka morago a tloga moo a yo epa sediba se sengwe, eupša ba se mmakiše sona. Ka gona a se bitša Rehobothe* gomme a re: “Ke ka gobane bjale Jehofa o re file lefelo le legolo leo re ka dulago go lona, e bile o dirile gore re be ba bantši mo nageng.”
23 Ke moka a tloga moo a ya Beresheba.
24 Bošegong bjoo Jehofa o ile a iponagatša go yena gomme a re: “Ke nna Modimo wa Aborahama tatago. O se ke wa boifa, ka gobane ke na le wena, e bile ke tla go šegofatša ka ba ka dira gore o be le bana ba bantši ka baka la Aborahama mohlanka wa ka.”
25 Ka gona Isaka a aga aletare moo, gomme a tumiša leina la Jehofa. Le gona o ile a hloma tente ya gagwe lefelong lona leo, ke moka bahlanka ba gagwe ba epa sediba moo.
26 Ka morago Abimeleke a tla go yena a etšwa Gerara a na le Ahusathe moeletši wa gagwe le Pikolo molaodi wa mašole a gagwe.
27 Isaka a re go bona: “Le re’ng le tlile go nna, ka ge le be le ntlhoile la ba la nthaka ga gabo lena?”
28 Ke moka ba re go yena: “Re bone gore ka nnete Jehofa o na le wena. Ka gona re nyaka go ena gore re dire kgwerano le wena. Kgwerano yeo e tla ba ka tsela ye:
29 Ga bjale re a bona gore Jehofa o šegofatša wena. Ka gona re tshepiše gore o ka se re dire selo se sebe go swana le ge re sa ka ra go dira selo se sebe. Re ile ra go swara gabotse ka gore re ile ra go tlogela wa sepela ka khutšo.’”
30 Ke moka Isaka a ba direla dijo tše dintši, gomme ba ja ba ba ba nwa.
31 Mesong e latelago ba tsoga e sa le kapela gomme ba direlana keno. Ka morago ga moo Isaka a laelana le bona, gomme ba sepela ka khutšo.
32 Letšatšing lona leo bahlanka ba Isaka ba ile ba tla go yena, gomme ba mmotša gore ba hweditše meetse sedibeng seo ba se epilego.
33 Ka gona a se bitša Shiba. Ke ka baka leo leina la motse woo e lego Beresheba go fihla le lehono le.
34 Ge Esau a be a na le mengwaga e 40 o ile a tšea Juditha morwedi wa Beeri wa Mohethe le Basematha morwedi wa Elone wa Mohethe gore e be basadi ba gagwe.
35 Bona ba ile ba hlafišetša Isaka le Rebeka bophelo.
Mengwalo ya tlase
^ Leina le le ra gore, “Phenkgišano.”
^ Leina le le ra gore, “Go Latofatša.”
^ Leina le le ra gore, “Mafelo a Magolo.”
