Genesi 27:1-46
27 Bjale ya re ge Isaka a tšofetše gomme a se sa bona gabotse, a bitša Esau morwa wa gagwe yo mogolo a re go yena: “Morwa!” Yena a araba a re: “Ke nna yo!”
2 A re go yena: “Bjale gona ke tšofetše. Ga ke tsebe letšatši leo ke tlago go hwa ka lona.
3 Hle tšea bora bja gago le mesebe, o ye nageng o ntsomele phoofolo.
4 Ke moka o nkapeele dijo tše dibose tšeo ke di ratago, o ntlišetše tšona ke moka ke di je gore ke kgone go go šegofatša pele ke ehwa.”
5 Eupša Rebeka o be a theeditše ge Isaka a be a bolela le Esau morwa wa gagwe. Esau a tšwa a ya nageng go yo tsoma phoofolo gore a tle le yona.
6 Ke moka Rebeka a re go Jakobo morwa wa gagwe: “Ke sa tšwa go kwa tatago a bolela le Esau ngwaneno a re:
7 ‘Ntlišetše nama ya phoofolo gomme o nkapeele dijo tše dibose ke je, gore ke go šegofatše pele ga Jehofa pele ke ehwa.’
8 Bjale morwa wa ka, ntheetše gomme o dire seo ke go botšago sona.
9 Hle eya kua mohlapeng o ntlele le diputšanyana tše pedi tša go nona, gore ke tle ke di apee ke direle tatago dijo tše dibose kamoo a di ratago ka gona.
10 Ke moka o di iše go tatago gomme a di je, e le gore a go šegofatše pele a ehwa.”
11 Jakobo a re go Rebeka mmagwe: “Eupša Esau ngwanešo ke monna yo a nago le boya gomme nna ga ke na bjona.
12 Ke tla re’ng ge e ba tate a ka mphophola? Go tla ba bjalo ka ge eka ke bapala ka yena, e bile ke tla ipiletša thogako e sego tšhegofatšo.”
13 Ke moka mmagwe a re: “Morwa wa ka, go e na le gore thogako yeo e wele wena a e wele nna. Wena theetša seo ke go botšago sona gomme o ye o ntlele le diputšanyana tšeo.”
14 Ka gona a ya a di tšea, a di tliša go mmagwe, gomme mmagwe a apea dijo tše dibose kamoo tatagwe a di ratago ka gona.
15 Ka morago ga moo, Rebeka a ya ka ntlong a tšea diaparo tše dibotsebotse tša Esau morwa wa gagwe yo mogolo gomme a di apeša Jakobo morwa wa gagwe yo monyenyane.
16 Le gona a mo tatetša ka matlalo a diputšanyana diatleng le molaleng wa gagwe moo a bego a se na boya.
17 Ke moka a nea Jakobo morwa wa gagwe dijo tše dibose le senkgwa seo a bego a se dirile.
18 Jakobo a tsena moo tatagwe a lego gona, a re: “Tate!” Yena a re: “Ke nna yo! Ke wena mang morwa?”
19 Jakobo a re go tatagwe: “Ke nna Esau morwa wa gago wa mathomo. Ke dirile kamoo o mpoditšego ka gona. Hle dula fase o je nama yeo ke go tsometšego yona, e le gore o ntšhegofatše.”
20 Ke moka Isaka a re: “Morwa wa ka, go tlile bjang gore o e hwetše kapejana?” Yena a araba a re: “Ka gobane Jehofa Modimo wa gago o nthušitše gore ke e hwetše.”
21 Ke moka Isaka a re go Jakobo: “Morwa wa ka, hle mpatamele gore ke go phophole e le gore ke tle ke tsebe ge e ba ka nnete o le Esau morwa wa ka goba o se yena.”
22 Ka gona Jakobo a batamela Isaka tatagwe, ke moka a mo phophola, ge a feditše a re go yena: “Lentšu lona ke la Jakobo, eupša diatla tšona ke tša Esau.”
23 A se mo tsebe ka ge diatla tša gagwe di be di tletše boya go swana le tša Esau ngwanabo. Ka gona a mo šegofatša.
24 Ka morago ga moo a mmotšiša a re: “Na ka nnete o Esau morwa wa ka?” Yena a re: “Ee, ke nna yena.”
25 Ke moka a re: “Morwa wa ka, mphe nama yeo o ntlišeditšego yona gore ke je e le gore ke go šegofatše.” Ka gona a mo nea yona gomme a ja, a mo tlišetša le beine a nwa.
26 Isaka tatagwe a re go yena: “Morwa wa ka, mpatamele hle gore o tle o nkhise.”
27 Ka gona Jakobo a mmatamela a mo khisa, gomme a kwa monkgo wa diaparo tša gagwe. Ke moka a mo šegofatša a re:
“Agaa, monkgo wa morwa wa ka o etša monkgo wa naga yeo Jehofa a e šegofaditšego.
28 Anke Modimo wa nnete a go nee phoka ya magodimong, mmu o nonnego lefaseng, mabele a mantši le beine e mpsha e ntši.
29 Anke ditšhaba ka moka di go hlankele di be di go hlomphe kudu. Eba mong wa bana beno, gomme anke bana beno ba go kwe. A go rogakwe motho yo mongwe le yo mongwe yo a go rogakago, gomme go šegofatšwe yo mongwe le yo mongwe yo a go šegofatšago.”
30 Bjale ge Isaka a sa tšwa go fetša go šegofatša Jakobo, e bile Jakobo a sa tšwa go tloga pele ga Isaka tatagwe, ke ge Esau ngwanabo a boa a etšwa go tsoma.
31 Le yena a apea dijo tše dibose a di tliša go tatagwe a re go yena: “Tate ke kgopela gore o tsoge o je nama yeo ke go tsometšego yona, e le gore o ntšhegofatše.”
32 Ke moka Isaka tatagwe a re go yena: “Ke wena mang?” Yena a re: “Ke nna morwa wa gago wa mathomo Esau.”
33 Isaka a thoma go thothomela kudu ke moka a re: “Kganthe ke mang yo a ntsometšego phoofolo a ntlišetša yona? Ke šetše ke e jele pele o ka tla gomme ke šegofaditše motho yoo. E bile ga go na motho yo a ka fetošago seo!”
34 Ge Esau a ekwa seo tatagwe a se boletšego, a lla gabohloko gomme a re go tatagwe: “Tate, le nna ntšhegofatše hle!”
35 Eupša yena a re: “Ngwaneno o tlile mo gomme a mphora gore a hwetše tšhegofatšo yeo o bego o swanetše go e hwetša.”
36 Ke moka Esau a re: “Ke ka baka leo a bitšwago Jakobo,* ka ge e le mo a ntšeetše legato ka makga a mabedi. O šetše a ntšeetše tshwanelo ya ka ya go ba morwa wa pele, gomme gona bjale šefa o tšere tšhegofatšo ya ka!” A oketša ka gore: “Na le nna o ka se ntšhegofatše?”
37 Eupša Isaka a araba Esau a re: “Ke mmoditše gore e tla ba mong wa gago, ke mmoditše gore bana babo ka moka e tla ba bahlanka ba gagwe, e bile ke mo šegofaditše ka go mo nea mabele le beine e mpsha. Bjale morwa wa ka, ga go sa na seo nka go direlago sona.”
38 Bjale Esau a re go tatagwe: “Tate, na o ra gore o be o na le tšhegofatšo e tee feela? Tate, le nna ntšhegofatše hle!” Ke moka Esau a phula sello.
39 Ka gona Isaka tatagwe a re go yena:
“Bona, o ka se dule mmung o nonnego lefaseng, e bile o ka se hwetše phoka ya magodimo a godimo.
40 O tla phela o swere tšhoša ya gago, e bile o tla hlankela ngwaneno. Eupša ge o se sa kgona go kgotlelela, o tla itokolla wa se sa ba mohlanka wa gagwe.”*
41 Bjale Esau a hloya Jakobo ka gobane tatagwe o be a šegofaditše Jakobo a se a šegofatša yena. Le gona Esau o be a dula a ipotša ka pelong a re: “Tate o kgauswi le go hwa.* Ka morago ga moo ke tlo bolaya Jakobo ngwanešo.”
42 Ge Rebeka a ekwa seo Esau morwa wa gagwe yo mogolo a se boletšego, gateetee a re go bitšwe Jakobo morwa wa gagwe yo monyenyane gomme a re go yena: “Tseba gore Esau ngwaneno o kwatile kudu gomme o nyaka go itefeletša ka go go bolaya.
43 Bjale wena morwa wa ka, dira seo ke go botšago sona. Tšhabela go Labane buti wa ka kua Harane.
44 O dule le yena matšatšinyana go fihlela ge ngwaneno a theoša maswafo.
45 O dule moo go fihlela ge ngwaneno a se sa kwatile e bile a lebetše seo o mo dirilego sona. Ka morago ga moo ke tla go bitša. Ga ke nyake go le loba ka moka ka letšatši letee.”
46 Ka morago ga moo Rebeka o be a dula a botša Isaka a re: “Ke hloile bophelo bja ka ka baka la basadi ba ba Bahethe. Ge e ba Jakobo le yena a ka nyala mosadi wa Mohethe go swana le ba mo nageng ye, gona ke tla be ke sa phelela eng?”
Mengwalo ya tlase
^ Leina le le ra gore, “Go Swara Serethe” goba “Go Tšeela Legato.”
^ Ka Seheberu karolo ya mafelelo ya temana ye e re, “o tla roba joko ya gagwe molaleng wa gago.”
^ Phetolelo ya lentšu ka lentšu e re, “matšatši a go llela tate a a batamela.”
