Genesi 31:1-55
31 Ge nako e dutše e eya, Jakobo a kwa barwa ba Labane ba re: “Jakobo o tšere dilo ka moka tša tatago rena a ikhumiša ka tšona.”
2 Ge Jakobo a be a lebelela sefahlego sa Labane, a bona gore o be a se sa mo lebelela gabotse go swana le mathomong.
3 Mafelelong Jehofa a re go Jakobo: “Boela nageng ya borakgolokhukhu ba gago le go ba meloko ya gago gomme nna ke tla dula ke go thuša.”
4 Ke moka Jakobo a romela molaetša wa gore Ragele le Lea ba tle madišong moo mehlape ya gagwe e bego e le gona,
5 gomme a re go bona:
“Ke bona gore tatago lena ga a sa ntebelela gabotse go swana le mathomong, eupša Modimo wa tate o be a dutše a na le nna.
6 Le lena le a tseba gore ke hlanketše tatago lena ka matla a ka ka moka.
7 Le gona Tatago lena o lekile go nthadia e bile a fetoša tsela yeo a bego a mpatela ka yona ga lesome, eupša Modimo ga se a mo dumelela gore a nkgobatše.
8 Ge a be a re: ‘Ke tla go patela ka tša marothontho,’ mohlape ka moka o be o tswala tša marothontho, eupša ge a be a re: ‘Ke tla go patela ka tša methalothalo,’ mohlape ka moka o be o tswala tša methalothalo.
9 Ka gona Modimo o ile a tšea mohlape wa tatago lena a nnea wona.
10 Mafelelong ge mohlape o be o goelana, ke ile ka bona torong gore diphooko tšeo di bego di goela mohlape e be e le tša methalothalo, tša mebalabala le tša marothontho.
11 Ke moka morongwa wa Modimo wa nnete a bolela le nna torong a re: ‘Jakobo!’ Nna ka re: ‘Ke nna yo.’
12 A tšwela pele a re: ‘Bona gore diphooko tše di goelago mohlape ke tša methalothalo, tša mebalabala le tša marothontho, ka gobane ke bone dilo ka moka tšeo Labane a go dirago tšona.
13 Ke nna Modimo wa nnete yoo a iponagaditšego go wena kua Bethele, moo o tloditšego kokwane ka makhura wa ba wa nkenela gona. Bjale ema o tloge nageng ye o boele nageng yeo o belegetšwego go yona.’”
14 Ke moka Ragele le Lea ba mo araba ba re go yena: “Na o bona okare re sa tlo hwetša bohwa bja tate?
15 Na ga a re tšee re le batšwantle ka ge a re rekišitše, gore a tšwele pele a phela ka tšhelete yeo o re ntšheditšego yona?
16 Mahumo ka moka ao Modimo a a tšeetšego tatago rena ke a rena le bana ba rena. Ka gona dira dilo ka moka tšeo Modimo a go boditšego tšona.”
17 Ke moka Jakobo a nametša bana ba gagwe le basadi ba gagwe dikamela.
18 A gapa mohlape wa gagwe ka moka gomme a tšea le dithoto tša gagwe ka moka le mohlape wo a bilego le wona ge a be a le kua Padana-arama, e le gore a ye go Isaka tatagwe nageng ya Kanana.
19 Bjale ya re ge Labane a sa ile go kota dinku tša gagwe, Ragele a šala a utswa medingwana ya lapa ya tatagwe.
20 Jakobo a radia Labane wa Moarama ka go sepela a se a mo laela.
21 Ke moka a tšhaba a tshela Noka ya Eforate a na le lapa la gagwe le dilo tša gagwe ka moka. Ka morago ga moo a leba dithabeng tša Gileada.
22 Letšatšing la boraro, Labane a botšwa gore Jakobo o tšhabile.
23 Ka gona a tšea banna ba gabo a mo rakediša leeto la matšatši a šupago, gomme a mo hwetša dithabeng tša Gileada.
24 Ke moka Modimo a bolela le Labane wa Moarama torong bošego gomme a re go yena: “O itlhokomele ge o bolela le Jakobo.”
25 Labane a fihla go Jakobo. Jakobo o be a hlomile tente ya gagwe dithabeng tša Gileada gomme Labane le yena o be a hlometše banna ba gabo ditente gona moo.
26 Ke moka Labane a re go Jakobo: “Ke ka baka la eng o ile wa nthadia gomme wa tšea barwedi ba ka bjalo ka batho bao ba thopilwego ntweng?
27 Go re’ng o ntšhabetše gomme wa nthadia wa se mpotše gore o a sepela? Ge nkabe o mpoditše gore o a sepela ke be ke tlo go laela ke thabile, gomme ra le opelela, ra le itiela moropa le go le leletša harepa.
28 Eupša ga se wa nnea sebaka sa gore ke khise ditlogolo tša ka le barwedi ba ka gomme ke ba laele. Bjale gona o dirile tša bošilo.
29 Ge ke rata nka go gobatša, eupša Modimo wa tatago o boletše le nna bošegong bja maabane a re: ‘O itlhokomele ge o bolela le Jakobo.’
30 Le ge o sepetše ka ge o hlologetše ba geno, eupša go re’ng o utswitše medimo ya ka?”
31 Jakobo a araba Labane a re: “Ke ka gobane ke be ke boifa. Ke be ke nagana gore o tla nkamoga barwedi ba gago.’
32 Mang le mang yo o ka mo hwetšago a swere medimo ya gago, a a bolawe. E nyake mo dilong tša ka banna ba gabo rena ba lebeletše gomme ge o ka e hwetša o e tšee.” Eupša Jakobo o be a sa tsebe gore Ragele o be a e utswitše.
33 Ka gona Labane a tsena ka tenteng ya Jakobo, ka tenteng ya Lea le ka tenteng ya makgoba ale a mabedi a basadi, eupša a se e hwetše. Ke moka a tšwa ka tenteng ya Lea gomme a tsena ka tenteng ya Ragele.
34 Ragele o be a tšere medingwana ya lapa, gomme a e beile saleng* yeo a bego a dutše godimo ga yona. Ka gona Labane a nyaka gohle ka tenteng eupša a se e hwetše.
35 Ke moka Ragele a re go tatagwe: “Mong wa ka ke kgopela o se ke wa nkgalefela, ka gobane nka se kgone go ema mo pele ga gago ka ge ke bona kgwedi.” Ka gona Labane a nyaka ka šedi eupša a se hwetše medingwana yeo.
36 Jakobo a galefa kudu gomme a omanya Labane, a re go yena: “Ke go dirile’ng ge e le mo o ntšhetše morago ka mokgwa wo?
37 Bjale ka gore o feditše go nyaka mo dithotong tša ka ka moka, o hweditše eng seo e lego sa gago? Se bee mo pele ga banna ba ke nago le bona le banna ba geno gomme e be bona ba re ahlolago.
38 Mengwageng e 20 yeo ke bilego le wena, dinku tša gago le dipudi tša gago di be di dutše di tswala gabotse. Le gona ga se ka ka ka ja dinku tše tona tša mohlape wa gago.
39 Ga se ka ka ka go tlišetša seruiwa le ge e le sefe sa go bolawa ke dibata, go e na le moo ke be ke se patelela. Go sa šetšwe gore seruiwa se be se utswitšwe mosegare goba bošego, o be o se nyaka go nna.
40 Ke be ke fišwa ke letšatši mosegare e bile ke bolawa ke phefo bošego, gomme ke felelwa ke boroko.
41 Bjo ke bjona bophelo bjoo ke bo phetšego mengwaga e 20 lapeng la gago. Ke go šometše mengwaga e 14 ka baka la barwedi ba gago ba babedi le mengwaga e tshela ka baka la mehlape ya gago, eupša wena wa fetoša tsela yeo o mpatelago ka yona ga lesome.
42 Ge nkabe Modimo wa tate, yena Modimo wa Aborahama e bile e le Modimo yoo Isaka a mo hlomphago kudu, a se a ba le nna, nkabe gona bjale o nthakile ke lekeleditše diatla. Modimo o bone gore ke a tlaišwa le gore ke šoma ka thata. Ke ka baka leo a go kgalemilego bošegong bja maabane.”
43 Labane a araba Jakobo a re: “Basadi ba ke barwedi ba ka, bana ba ke ditlogolo tša ka, gomme mohlape wo ke mohlape wa ka, e bile se sengwe le se sengwe seo o se bonago mo ke sa ka le sa barwedi ba ka. Bjale lehono ke tla ba ke lwela’ng le bona goba bana ba ba bona?
44 Bjale etla re dire kgwerano, gomme e be bohlatse magareng ga ka le wena.”
45 Jakobo a tšea leswika a le hloma bjalo ka kokwane.
46 Ke moka Jakobo a re go banna bao a bego a na le bona: “Topang maswika!” Ba topa maswika ao gomme ba a kgoboketša. Ka morago ga moo ba jela maswikeng ao ba a kgobokeditšego.
47 Labane a a bitša Jegara-sahadutha,* eupša Jakobo a a bitša Galede.*
48 Labane a re: “Maswika ao re a kgobokeditšego mo, ke bohlatse magareng ga ka le wena lehono.” Ke ka baka leo Jakobo a ilego a a reela leina la Galede,
49 le la Mitsipa,* ka gobane Labane o itše: “Anke Jehofa a dule a bona dilo tšeo nna le wena re di dirago ge re le mo re sa bonanego.
50 Ge e ba o ka hlakiša barwedi ba ba ka goba wa nyala basadi ba bangwe gape, o gopole gore le ge o ka dira seo ka sephiring, Modimo o a go bona, yena yo e lego hlatse ya rena.”
51 Ke moka Labane a re go Jakobo: “Maswika ao re a kgobokeditšego šea, le kokwane yeo re e tsemilego ke ye, go bontšha gore re dirile kgwerano.
52 Maswika a le kokwane ye, ke bohlatse bja gore nka se di fete ka tla ka lwa le wena, le gore le wena o ka se di fete wa tla wa lwa le nna.
53 Anke Modimo wa Aborahama le Modimo wa Nahoro, yena Modimo wa botatago bona, e be yena a re ahlolago.” Ke moka Jakobo a ena ka leina la Modimo yoo Isaka tatagwe a mo hlomphago kudu.
54 Ka morago ga moo Jakobo o ile a dira sehlabelo moo thabeng, gomme a bitša ba meloko ya gagwe gore ba tle ba je dijo. Ba ja ba ba ba fetša bošego ka moka ba le moo thabeng.
55 Labane yena a tsoga ka masa a khisa ditlogolo tša gagwe le barwedi ba gagwe gomme a ba šegofatša. Ke moka a wela tsela a boela ga gagwe.
Mengwalo ya tlase
^ Ye ke sala ya basadi yeo e bego e na le lefelwana la go tsenya dilo.
^ Leina la Searama leo le rago gore, “Mokgobo wa Bohlatse.”
^ Leina la Seheberu leo le rago gore, “Mokgobo wa Bohlatse.”
^ Ka Seheberu leina Mitsipa le ra gore, “Serokamo.”
