Genesi 33:1-20
33 Ya re ge Jakobo a lebelela a bona Esau a etla le banna ba 400 (makgolonne). Ka gona a botša Lea, Ragele le bahlanka ba gagwe ba babedi ba basadi gore ba tšee bana ba bona.
2 O ile a bea bahlanka ba gagwe le bana ba bona ka pele, a bea Lea le bana ba gagwe ka morago ga bona, gomme Ragele le Josefa a ba bea ka moragorago ga bona.
3 Yena a feta a ba eta pele, gomme a inamela fase gašupa ka tsela ya go bontšha tlhompho go fihlela a le kgauswi le ngwanabo.
4 Eupša Esau a kitima a yo mo gahlanetša, a mo gokarela a ba a mo khisa, ke moka ba lla kudu.
5 Ge Esau a lebelela a bona basadi bale le bana, a re: “Ke bomang ba o nago le bona?” Jakobo a re: “Ke bana bao Modimo a šegofaditšego nna mohlanka wa gago ka bona.”
6 Ke moka bahlanka bale ba batamela le bana ba bona, gomme ba inama ka tsela ya go bontšha tlhompho.
7 Lea le yena a batamela le bana ba gagwe gomme ba inama ka tsela ya tlhompho. Ka morago ga moo Josefa a batamela a na le Ragele gomme le bona ba dira bjalo.
8 Esau a re: “Ke ka baka la’ng o rometše batho bale ke gahlanego le bona?” Jakobo a re: “Ke dirile seo gore wena mong wa ka o nkgaugele.”
9 Ke moka Esau a re: “Ngwanešo ke na le dilo tše dintši kudu. O se ke wa mpha selo.”
10 Eupša Jakobo a re: “Aowa hle. Ge e ba o nkgaugela gona tšea mpho ye ke e swerego, ka gobane ke go tlišeditše yona gore ke kgone go bona sefahlego sa gago. Le gona ke bone sefahlego sa gago bjalo ka ge eka ke bone sa Modimo, ka gobane wena o nkamogetše ka lethabo.
11 Hle tšea mpho ye yeo e bontšhago gore ke nyaka go go šegofatša, ka gobane Modimo o mpontšhitše botho e bile ke na le dilo ka moka tšeo ke di hlokago.” A mo phegelela go fihlela a e tšea.
12 Ka morago Esau a re: “A re tloge re sepele, gomme nna ke tla go eta pele.”
13 Eupša Jakobo a re: “Mong wa ka, o a bona gore bana ba e sa le ba banyenyane le gore ke na le dinku le dikgomo tše di amušago, bjale ge ba ka di gapa ka lebelo ka letšatši letee, gona mohlape ka moka o tla hwa.
14 Hle anke wena mong wa ka o ete nna mohlanka wa gago pele, eupša nna ke tla tšwela pele ka leeto ka go iketla go ya kamoo diruiwa tše di sepelago ka gona le go ya kamoo bana ba ba ka ba kgonago go sepela ka gona go ba go fihlela ke hwetša wena mong wa ka kua Seire.”
15 Esau a re: “Hle anke ke tlogele ba bangwe ba batho bao ke nago le bona gore ba šale le wena.” Jakobo a re: “Ke ka baka la’ng o dira seo? Ke kgopela feela gore wena mong wa ka o no nkgaugela.”
16 Ka gona letšatšing leo Esau a sepela a boela Seire.
17 Jakobo yena a sepela a ya Sukothe,* gomme a ikagela ntlo a ba a direla mehlape ya gagwe mešaša. Ke ka baka leo a ilego a reela lefelo leo leina la Sukothe.
18 Ka morago ge Jakobo a be a etšwa Padana-arama, o ile a fihla a šireletšegile motseng wa Shikeme, e lego motse wo o lego nageng ya Kanana. Ke moka a hloma ditente tša gagwe gona moo kgauswi le motse woo.
19 A hloma tente ya gagwe lefelong leo a le hweditšego nageng yeo, leo a le rekilego ka ditšhelete tša silifera tše 100 go barwa ba Hamoro yoo e lego tatago Shikeme.
20 O ile a aga aletare moo gomme a e bitša ka gore, Modimo ke Modimo wa Isiraele.
Mengwalo ya tlase
^ Leina le le ra gore, “Mešaša.”
