Genesi 43:1-34
43 Bjale tlala e be e le e šoro nageng ya Kanana.
2 Eitše ge ba feditše go ja dijo tšeo ba di rekilego Egepeta, tatago bona a re go bona: “Boelang morago le yo re rekela dijo.”
3 Ke moka Juda a re go yena: “Monna yola o re boditše tsebe go kwa a re: ‘Le se ke la boa mo pele ga ka ge e ba le se na ngwanabo lena.’
4 Ge e ba o ka dumela gore re sepele le ngwanabo rena, gona re tla ya go yo reka dijo.
5 Eupša ge e ba o sa dumele re sepela le yena, re ka se ye, ka gobane monna yola o rile go rena: ‘Le se ke la boa mo pele ga ka ge e ba le se na ngwanabo lena.’”
6 Isiraele a re: “Go re’ng le mpaketše mathata ka go botša monna yola gore le na le ngwanabo lena yo mongwe?”
7 Ke moka bona ba re: “Monna yola ke yena a re botšišitšego ka rena le ka lapa la gabo rena a re: ‘Na tatago lena o sa phela? Na le na le ngwanabo lena yo mongwe?’ Ke moka rena ra mo araba seo a re botšišago sona. Re be re tla tseba bjang gore o be a tla re re tliše ngwanabo rena mo go yena?”
8 Ke moka Juda a re go tatagwe: “E re ke sepele le mošemane yo, e le gore rena, wena le bana ba rena re se ke ra hwa ka baka la tlala, eupša re dule re phela.
9 Ke nna ke tlago go mo hlokomela. Ge e ba a ka diragalelwa ke se sengwe, gona o nkotle. Le gona ge e ba nka se mmušetše go wena, gona ke tla be ke go diretše sebe bophelo bja ka ka moka.
10 Eupša ge nkabe re se ra senya nako, gona bjale nkabe re šetše re ile kua gabedi ra ba ra boa.”
11 Ka gona Isiraele tatago bona a re go bona: “Ge e ba le sepela le yena, gona dirang se: Tšeang dilo tše dibotsebotse tša mo nageng ye, le di tsenyeng ka mekotleng ya lena gomme le yo di fa monna yola e le mpho. Tšeang dilo tše: Setlolonyana seo se bitšwago balesamo, todinyana ya dinose, boreku bja go nkga bose, karolo ya mohlare yeo e nago le boreku, dikoko tšeo di bitšwago dipistakio* le dialmonte.
12 Le gona le tšeeng le tšhelete e lekanago le yela le e tšerego mathomong gabedi, le bušetšeng le tšhelete yeo le e hweditšego ka mekotleng ya lena. Mohlomongwe e bile phošo.
13 Tšeang ngwanabo lena le sepeleng, le boele go monna yoo.
14 Anke Modimo Ramatlaohle a le thuše gore monna yoo a le kwele bohloko, gore a lokolle ngwanabo lena Simeone le Benjamini. Eupša ge e ba nna ke swanetše go lahlegelwa ke bana, gona a go be bjalo!”
15 Ka gona banna bao ba tšea mpho yeo, ba tšea le tšhelete yeo e lekanago le yela ya mathomong gabedi gotee le Benjamini. Ke moka ba sepela ba ya Egepeta gomme ba fihla go Josefa.
16 Ya re ge Josefa a bona Benjamini a na le bona, kapelapela a botša monna yo a bego a hlokometše ntlo ya gagwe a re: “Tšea banna ba o ba iše ka ntlong gomme o hlabe diphoofolo o be o lokiše dijo, ka gobane banna ba ba tlo ja le nna dijo tša mosegare.”
17 Kapejana monna yoo a dira kamoo Josefa a mmoditšego ka gona gomme a tšea banna bao a ba iša ntlong ya Josefa.
18 Eupša banna bao ba tšhoga ge ba be ba išwa ka ntlong ya Josefa, gomme ba re: “Re išwa moo ka baka la tšhelete yeo e ilego ya bušetšwa ka mekotleng ya rena ge re be re tlile mo mathomong. Gona bjale ba ile go re hlasela, ba re dira makgoba gomme ba tšea le ditonki tša rena!”
19 Ka gona ba ile ba ya mojakong wa ntlo ya Josefa gomme ba bolela le monna yo a bego a hlokometše ntlo yeo,
20 ba re: “Hle, re kgopela go bolela le wena mong wa rena! Re kile ra tla mo go tlo reka dijo.
21 Eupša ge re fihla lefelong leo re ilego ra robala go lona tseleng gomme re bula mekotla ya rena, yo mongwe le yo mongwe o ile a hwetša tšhelete e feletšego ka mokotleng wa gagwe. Bjale re tlile mo go tlo e buša.
22 Le gona re tlile le tšhelete e nngwe gape gore re tlo reka dijo. Ga re tsebe gore ke mang yo a tsentšego tšhelete ya rena ka mekotleng ya rena.”
23 Ke moka a re go bona: “Go lokile. Le se ke la tšhoga. Modimo wa lena yo e bilego e le Modimo wa tatago lena ke yena a le filego tšhelete ka mekotleng ya lena. Ke a tseba gore le patetše.” Ka morago ga moo a tliša Simeone go bona.
24 Ke moka monna yoo a tsenya banna bao ka ntlong ya Josefa, a ba nea meetse gore ba hlape maoto gomme a nea le ditonki tša bona furu.
25 Ka ge ba be ba kwele gore Josefa o tlo tla moo go ja le bona dijo tša mosegare, ba ile ba lokiša mpho yela ya gagwe.
26 Ge Josefa a tsene ka ntlong, ba tšea mpho yela ba mo nea yona ke moka ba mo khunamela.
27 Ka morago ga moo a ba botšiša a re: “Na tatago lena yo le boletšego ka yena o sa phetše gabotse?”
28 Ke moka bona ba re: “Ee mong wa rena, tatago rena o sa phetše gabotse.” Ka gona ba inamela fase.
29 Ge a bona Benjamini ngwanabo, yo e lego morwa wa mmagwe, a re: “Na yo ke ngwanabo lena yo monyenyane yo le mpoditšego ka yena?” Ke moka a re go Benjamini: “Morwa, anke Modimo a go šegofatše.”
30 Bjale Josefa a tšwa kapejana ka gobane o be a se sa kgona go itshwara ka baka la ngwanabo gomme a yo nyaka mo a ka llelago gona. A tsena ka phapošing mo a bego a sa bonwe ke motho ke moka a llela gona.
31 Ge a feditše go lla o ile a hlapa sefahlego sa gagwe, gomme ka morago ga moo a tšwa ka moo phapošing, a re go bahlanka ba gagwe: “Re tlišetšeng dijo.”
32 Ba mo tlišetša tša gagwe a nnoši tafoleng ya gagwe, le banna bao ba ba tlišetša tša bona ba nnoši, le Baegepeta bao ba bego ba jela ka ntlong ya gagwe ba ba tlišetša tša bona ba nnoši, ka gobane Baegepeta ba be ba sa kgone go ja dijo le Baheberu, ka ge Baegepeta ba be ba šišimišwa ke go ja le Baheberu.
33 Ke moka ba dudiša bana babo Josefa tafoleng yeo e bego e le kgauswi le ya gagwe, ba thoma ka yo mogolo* ba feleletša ka yo monyenyane, gomme bana babo Josefa ba be ba lebelelane ba maketše.
34 A tšea dijo tšeo di bego di le tafoleng ya gagwe a ba nea tšona, eupša tša Benjamini di be di feta tša bana babo ka makga a mahlano. Ka gona ba ja le go nwa go fihlela ba khora.
Mengwalo ya tlase
^ Dikoko tše di nyakile di swana le ditokomane.
^ Phetolelo ya lentšu ka lentšu e re, “wa mathomo ba mo dudiša go ya ka tshwanelo ya gagwe ya go ba yo mogolo.”
