Genesi 48:1-22
48 Bjale ka morago ga dilo tše Josefa a botšwa gore: “Tseba gore tatago o a babja.” Ge Josefa a ekwa seo, a tšea barwa ba gagwe ba babedi e lego Manase le Efuraime a ya go Jakobo.
2 Ge Jakobo a ekwa gore Josefa morwa wa gagwe o tlile go mmona, o ile a itiiša gomme a tsoga a dula mpeteng wa gagwe.
3 Jakobo a bolela le Josefa a re:
“Modimo Ramatlaohle o iponagaditše go nna kua Lutsi nageng ya Kanana gomme a ntšhegofatša.
4 Ke moka a re go nna: ‘Ke tla dira gore o be le bana ba bantši, gomme o tla ba tatago meraforafo. E bile ke tla nea bana ba gago naga ye, gore e be bohwa bja bona go ya go ile.’
5 Bjale barwa ba gago ba babedi bao o bilego le bona mo nageng ya Egepeta pele nka tla mo go wena, ke ba ka. Efuraime le Manase e tla ba ba ka go no swana le ge Rubeni le Simeone e le ba ka.
6 Ba tla hwetša karolo ya naga yeo bana babo bona ba tlago go e hwetša e le bohwa.
7 Ge ke be ke etšwa Padana, Ragele o ile a hlokofala kgauswi le nna kua nageng ya Kanana, ge re be re sa le kgole kudu le go fihla nageng ya Efurata. Ka gona ke ile ka mmoloka moo tseleng ya go ya Efurata, yeo gona bjale e bitšwago Betlelehema.”
8 Ke moka Isiraele a bona barwa ba Josefa gomme a re: “Ke bomang ba?”
9 Josefa a araba tatagwe a re: “Ke barwa ba ka bao Modimo a mphilego bona mo lefelong le.” Ke moka Jakobo a re: “Hle ba tliše go nna gore ke ba šegofatše.”
10 Bjale Isiraele o be a se sa bona gabotse ka ge a be a tšofetše. Ka gona Josefa a ba batametša go Isiraele, ke moka Isiraele a ba khisa a ba a ba gokarela.
11 Isiraele a re go Josefa: “Ke be ke sa nagane gore nka tsoga ke go bone gape, eupša ke mo Modimo o dirile gore ke bone le bana ba gago.”
12 Ke moka Josefa a ba tloša kgauswi le matolo a tatagwe gomme a khunama a inamišeditše sefahlego sa gagwe fase pele ga tatagwe.
13 Ke moka Josefa a tšea barwa ba gagwe ba babedi, Efuraime a mo swara ka seatla sa gagwe sa le letona, Manase a mo swara ka seatla sa gagwe sa le letshadi gomme a ba batametša kgauswi le Isiraele.
14 Efuraime a mo iša ka lehlakoreng le letshadi la Isiraele, gomme Manase a mo iša ka lehlakoreng le letona. Eupša Isiraele a bea seatla sa gagwe sa le letona hlogong ya Efuraime le ge e be e le yo monyenyane, gomme a bea seatla sa gagwe sa le letshadi hlogong ya Manase. O beile diatla tša gagwe ka mokgwa woo ka boomo, le ge a be a tseba gore Manase e be e le wa mathomo.
15 Ke moka a šegofatša Josefa a re:
“Modimo wa nnete yoo rakgolo Aborahama le tate Isaka ba bego ba mo hlankela,Modimo wa nnete yoo a bego a ntlhokometše bophelo bja ka ka moka go fihlela le lehono le,
16 Yena yoo a ilego a diriša morongwa wa gagwe go nthuša mathateng a ka ka moka, hle anke a šegofatše bašemane ba.
Anke ba bitšwe ka leina la ka, le la Aborahama rakgolo wa ka, le la Isaka tate.
Le gona anke ba be le bana ba bantši.”
17 Ge Josefa a bona gore tatagwe o beile seatla sa gagwe sa le letona hlogong ya Efuraime, a se rate taba yeo, gomme a leka go swara seatla sa tatagwe gore a se tloše hlogong ya Efuraime a se bee hlogong ya Manase.
18 Josefa a re go tatagwe: “A go se be bjalo tate, ka gobane Manase ke wa mathomo. Bea seatla sa gago sa le letona hlogong ya gagwe.”
19 Eupša tatagwe a gana gomme a re: “Ke a tseba morwa, ke a tseba. Le yena e tla ba setšhaba e bile e tla ba yo mogolo. Eupša ngwanabo yo monyenyane e tla ba yo mogolo go mo feta, gomme bana ba gagwe e tla ba bantši ba lekana le ditšhaba.”
20 Jakobo a tšwela pele a ba šegofatša letšatšing leo a re:
“Anke Baisiraele ba šegofatšane ba re:
‘Anke Modimo a go šegofatše go swana le ge a šegofaditše Efuraime le Manase.’”
Ka gona, Isiraele o ile a dira gore Efuraime e be yo mogolo go Manase ge a be a ba šegofatša.
21 Ke moka Isiraele a re go Josefa: “Bona, ke kgauswi le go hwa, eupša Modimo o tla tšwela pele a na le lena gomme a le bušetša nageng ya borakgolokhukhu ba lena.
22 Ge e le nna ke go fa karolo e kgolo ya naga go feta bana beno, e lego naga yeo ke e tšerego go Baamore ka tšhoša ya ka le ka bora bja ka.”
