Genesi 8:1-22
8 Eupša Modimo a gopola Noa le diphoofolo ka moka le diruiwa tšeo di bego di na le yena ka arekeng. Modimo a dira gore go foke phefo lefaseng gomme meetse a thoma go fokotšega.
2 Mafelo ao a nago le meetse a mantši lefaseng le meetse a magodimong a tswalelwa, ka gona pula ya go tšwa magodimong ya emišwa.
3 Meetse a mo lefaseng a pšha ganyenyane-ganyenyane, gomme mafelelong a matšatši a 150 (lekgolo-masomehlano) meetse ao a be a šetše a fokotšegile.
4 Ka letšatši la bo-17 la kgwedi ya bošupa, areka ya ema dithabeng tša Ararate.
5 Meetse a fela a fokotšega go ba go fihla ka kgwedi ya lesome. Ka letšatši la pele la kgwedi ya lesome, dintlhana tša dithaba tša thoma go bonagala.
6 Ge go fetile matšatši a 40, Noa a bula lefasetere la areka leo a bego a le dirile,
7 a ntšha legokobu gomme la fela le tsena le etšwa go fihlela ge meetse a omile mo lefaseng.
8 Ka morago a romela leeba gore a bone ge e ba meetse a omile nageng.
9 Leeba la se hwetše moo le ka kotamago gona, ka gona la boela go yena ka arekeng ka gobane meetse a be a sa le gona lefaseng ka moka. Ke moka a ntšha seatla a le swara a le bušetša ka arekeng.
10 O ile a leta gape matšatši a mangwe a šupago, ke moka a ntšha leeba gape ka arekeng.
11 Ge leeba leo le boela go yena mo e ka bago mantšiboa, le be le momile letlakala le lenanana la mohlware ka molomo wa lona. Bjale Noa a tseba gore meetse a be a fokotšegile lefaseng.
12 A leta gape matšatši a mangwe a šupago. Ke moka a romela leeba, eupša la se sa boela go yena gape.
13 Ka letšatši la pele la kgwedi ya pele ka ngwaga wa bo-601 (makgolotshela-tee), meetse a be a gopile lefaseng. Noa a tloša karolo ya tlhaka ya areka gomme a bona gore naga e thomile go oma.
14 Ka letšatši la bo-27 la kgwedi ya bobedi, lefase le be le omile.
15 Bjale Modimo a re go Noa:
16 “Etšwa ka arekeng, wena le mosadi wa gago le barwa ba gago le basadi ba barwa ba gago.
17 O tšwe le mehuta ka moka ya diphedi tšeo di nago le wena, e lego dinonyana, diphoofolo le digagabi ka moka tše di gagabago lefaseng, gore di tle di tlale lefaseng gomme di tswale e be tše dintši.”
18 Ke moka Noa a tšwa a na le barwa ba gagwe le mosadi wa gagwe le basadi ba barwa ba gagwe.
19 Diphoofolo ka moka, digagabi ka moka, dinonyana ka moka le diphedi tše dingwe ka moka tšeo di lego mo lefaseng, tša tšwa ka arekeng go ya ka mehuta ya tšona.
20 Ke moka Noa a agela Jehofa aletare gomme a tšea tše dingwe tša diphoofolo ka moka tše di hlwekilego le dinonyana ka moka tše di hlwekilego a dira dihlabelo tša go fišwa aletareng.
21 Jehofa a kwa dihlabelo tšeo di nkga bose, ke moka Jehofa ka pelong ya gagwe a re: “Nka se tsoge ke rogakile lefase ka baka la dilo tšeo batho ba di dirago, ka gobane pelo ya motho e rata dilo tše mpe go tloga e sa le yo monyenyane. E bile nka se tsoge ke fedišitše selo se sengwe le se sengwe se se phelago go swana le ge ke dirile.
22 Go tloga gona bjale go ya pele, lefaseng go tla dula go bjalwa e bile go bunwa, go tonya e bile go fiša, le gona go tla dula go na le selemo le marega le mosegare le bošego.”
