Genesi 9:1-29
9 Modimo a šegofatša Noa le barwa ba gagwe gomme a re go bona: “Ebang le bana ba bantši le tlale lefase.
2 Diphedi ka moka tša lefaseng, dinonyana ka moka tšeo di fofago magodimong, digagabi ka moka le dihlapi ka moka tša ka lewatleng, di tla dula di le tšhaba le go le boifa. Ga bjale le tla di laola.
3 Le ka ja phoofolo e nngwe le e nngwe e phelago. Ke le fa tšona ka moka, go no swana le ge ke le file dimela tše ditala.
4 Eupša le se ke la ja nama yeo e nago le bophelo bja yona, e lego madi a yona.
5 Le gona, ke tla otla motho yo mongwe le yo mongwe yo a ka go bolayago.* Ge e ba o ka bolawa ke phoofolo, gona phoofolo yeo e swanetše go bolawa. E bile ke tla otla motho yo mongwe le yo mongwe yo a ka bolayago ngwanabo.
6 Mang le mang yo a ka bolayago motho, le yena a a bolawe ke motho yo mongwe, ka gobane nna Modimo ke dirile motho gore a swane le nna.
7 Ge e le lena, ebang le bana ba bantši le tlale lefase, gomme le be ba bantši mo go lona.”
8 Modimo a re go Noa le barwa ba gagwe bao ba bego ba na le yena:
9 “Bjale ge e le nna ke dira kgwerano le lena le bana ba bana ba lena,
10 le diphedi ka moka tšeo di nago le lena, e lego dinonyana, diruiwa, le diphedi tše dingwe ka moka tša mo lefaseng tšeo di nago le lena le dilo ka moka tšeo di phelago tšeo di tšwago ka arekeng tšeo di lego mo lefaseng.
11 Ee, ke dira kgwerano ye le lena: Nka se tsoge ke fedišitše batho ka moka le diphoofolo ka meetsefula. E bile nka se tsoge ke fedišitše lefase ka meetsefula.”
12 Le gona Modimo a re: “Bjo ke bohlatse bja kgwerano yeo ke e dirago magareng ga ka le lena le diphedi ka moka tšeo di nago le lena. Bohlatse bjo bo tla dula bo le gona melokong ka moka go ya go ile.
13 Ke bea molalatladi wa ka marung, gomme e tla ba bohlatse bja kgwerano yeo ke e dirilego magareng ga ka le diphedi ka moka tša lefaseng.
14 Nako le nako ge ke tliša maru lefaufaung gomme pula e ena, molalatladi o tla tšwelela marung ao.
15 Ruri ke tla gopola kgwerano yeo ke e dirilego magareng ga ka le lena le diphedi tša mehuta ka moka. E bile nka se tsoge ke tlišitše meetsefula gape gore a fediše batho ka moka le diphoofolo.
16 Ge molalatladi o tšwelela marung ke tla o bona, gomme ka gopola kgwerano ya sa ruri yeo ke e dirilego le diphedi tša mehuta ka moka lefaseng.”
17 Modimo a bušeletša seo a se boditšego Noa a re go yena: “Bjo ke bohlatse bja kgwerano yeo ke e dirago magareng ga ka le diphedi ka moka tšeo di lego lefaseng.”
18 Barwa ba Noa bao ba tšwilego ka arekeng ke Sheme, Hama le Jafete. Ka morago Hama e bile tatago Kanana.
19 Banna ba ba bararo e be e le barwa ba Noa, gomme batho ka moka bao ba tletšego lefaseng ba tšwa go bona.
20 Bjale Noa a thoma go lema gomme a bjala serapa sa diterebe.
21 A nwa beine gomme a tagwa, ke moka a hlobola a šala a se a apara selo ka tenteng ya gagwe.
22 Ka morago Hama e lego tatago Kanana a bona bofeela bja tatagwe, ke moka a ya ka ntle a yo botša bana babo ba babedi.
23 Ka gona Sheme le Jafete ba tšea seaparo se sengwe ba se bea magetleng a bona, gomme ba tsena ka moo ba sepela ka sa morago. Ke moka ba khupetša bofeela bja tatago bona, mola difahlego tša bona di lebeletše kua thoko, gomme bona ga se ba ka ba bona bofeela bja tatago bona.
24 Ge Noa a hlaphogetšwe, a kwa gore morwa wa gagwe yo monyenyane o mo dirile eng.
25 Ke moka a re:
“Kanana a a rogakwe.
Anke e be lekgoba la tlasana go bana babo.”
26 Le gona a re:
“A go retwe Jehofa, e lego Modimo wa Sheme,Kanana yena e be lekgoba la Sheme.
27 Anke Modimo a nee Jafete naga e kgolo,Le gona a a dule ka ditenteng tša Sheme.
E bile anke Kanana e be lekgoba la Jafete.”
28 Noa a phela mengwaga e mengwe e 350 (makgolotharo-masomehlano) ka morago ga meetsefula.
29 Ka gona Noa o phetše mengwaga e 950 (makgolosenyane-masomehlano) gomme a hlokofala.
Mengwalo ya tlase
^ Phetolelo ya lentšu ka lentšu e re, “motho yo mongwe le yo mongwe yo a ka tšhollago madi a gago.”
