Jeremia 25:1-38
25 Wo ke molaetša woo Modimo a o filego Jeremia mabapi le batho ka moka ba Juda ngwageng wa bone wa ge go buša Jehoyakima morwa wa Josia, kgoši ya Juda, e lego ngwageng wa pele wa ge go buša Kgoši Nebukadinetsara wa Babilona.
2 Moporofeta Jeremia o ile a bolela mabapi le batho ka moka ba Juda, le mabapi le batho ka moka bao ba dulago Jerusalema a re:
3 “Go tloga ngwageng wa bo-13 wa ge go buša Josia morwa wa Amone, kgoši ya Juda, go ba go fihla lehono le, e lego mengwaga e 23, Jehofa o ile a bolela le nna gomme nna ke dula ke bolela le lena gantšhi le gantšhi, eupša lena ga se la ka la ntheetša.
4 Le gona Jehofa o ile a romela bahlanka ba gagwe ka moka ba baporofeta go lena, a ba romela gantšhi le gantšhi, eupša lena ga se la theetša goba la hlwaya tsebe gore le kwe.
5 Ba be ba re: ‘Anke yo mongwe le yo mongwe a tlogele mekgwa ya gagwe e mebe le dilo tše mpe tšeo a di dirago, gomme ge le dira bjalo le tla tšwela pele le dula nako e telele nageng yeo Jehofa a e filego lena le borakgolokhukhu ba lena go tloga kgale.
6 Le se ke la rapela medimo e mengwe, la e hlankela le go e khunamela, e le gore le se ke la nkgopiša ka medimo yeo le e dirilego ka diatla tša lena, ge le ka dira bjalo ke tla le otla.’
7 Jehofa o re: “‘Eupša ga se la ka la ntheetša, go e na le moo le ile la nkgopiša ka dilo tšeo le di dirilego ka diatla tša lena, gomme la dira gore ke le otle.’
8 “Ka gona Jehofa wa madira o re: ‘“Ka ge le se la kwa seo ke se bolelago,
9 gona ke romela molaetša wa gore go bitšwe ditšhaba ka moka tša ka leboa, go bitšwe le Kgoši Nebukadinetsara wa Babilona, yena mohlanka wa ka, gomme ke tla dira gore ditšhaba tše di lwe le naga ye le batho bao ba dulago go yona gotee le ditšhaba tše ka moka tšeo di lego kgauswi le yona. Ke tla di fediša gomme ka dira gore batho ba tšhoge ge ba di bona, e bile ba di leletše molodi e le ge ba kgotsa gomme ka fedišetša naga ye sa ruri, o realo Jehofa.
10 Ke tla dira gore ditšhabeng tšeo go se sa ba le medumo ya lethabo, go se sa kwala lentšu la monyadi le la monyadiwa. Go se ke gwa kwagala ge go šilwa e bile go se ke gwa bonagala le seetša sa lebone.
11 Naga ye ka moka e tla ba mašope, e bile e tla ba selo se se tšhošago, gomme ditšhaba tše di tla swanelwa ke go hlankela kgoši ya Babilona ka mengwaga e 70.”’
12 “‘Eupša ge mengwaga e 70 e fedile, ke tla otla kgoši ya Babilona le setšhaba seo ka baka la molato wa sona,’ o realo Jehofa. ‘Le gona ke tla dira gore naga ya Bakaladea e dule e le lešope go ya go ile.
13 Ke tla phethagatša dilo ka moka tšeo ke di boletšego mabapi le naga ye, gotee le dilo ka moka tšeo di ngwadilwego ka pukung ye tšeo Jeremia a porofetilego ka tšona mabapi le ditšhaba ka moka.
14 Ka gobane ditšhaba tše dintšhi le dikgoši tše dikgolo di tla ba dira makgoba, gomme nna ke tla ba putsa go ya ka dilo tšeo ba di dirilego ka diatla tša bona.’”
15 Jehofa Modimo wa Isiraele o rile go nna: “Tšea komiki ye ya beine yeo e tletšego bogale bja ka ka seatleng sa ka, gomme o e nweše ditšhaba ka moka tšeo ke tlago go go roma go tšona.
16 Tšona di tla nwa, tša thekesela gomme tša itshwara bjalo ka digaswi ge ke romela ditšhaba tše dingwe gore di lwe le tšona.”
17 Ka gona ke ile ka tšea komiki yeo ka seatleng sa Jehofa, gomme ka nweša ditšhaba ka moka tšeo Jehofa a bego a nthomile go tšona.
18 Ke ile ka thoma ka Jerusalema le metse ya Juda, dikgoši tša yona le dikgošana tša yona e le gore ke di fediše, ke di dire selo seo se tšhošago, sona selo seo batho ba se leletšago molodi ba kgotsa le seo se rogakilwego, feela bjalo ka ge seo se le kgauswi le go direga gona bjale.
19 Ke moka gwa latela Farao kgoši ya Egepeta le bahlanka ba gagwe, dintona tša gagwe le batho ba gagwe ka moka,
20 gwa nwa le batho ka moka ba dinageng tše dingwe bao ba bego ba dula le bona, dikgoši ka moka tša naga ya Utsi, dikgoši ka moka tša naga ya Bafilisita, Ashikaloni, Gatsa, Ekirone le Baashidodo bao ba šetšego,
21 Baedomo, Bamoaba le Baamoni,
22 dikgoši ka moka tša Tiro, dikgoši ka moka tša Sidone le dikgoši tša sehlakahlaka seo se lego lewatleng.
23 Gwa nwa le Badedane, Bathema, Babusi gotee le batho ka moka bao ba kotilego dihlogo ka mo mahlakoreng,
24 dikgoši ka moka tša Baarabia le dikgoši ka moka tša batho ba ditšhaba tše dingwe bao ba dulago lešokeng,
25 dikgoši ka moka tša Simiri, dikgoši ka moka tša Elama le dikgoši ka moka tša Bamede,
26 dikgoši ka moka tša ka leboa tša kgole le kgauswi ka go latelana ga tšona, gotee le mebušo ka moka ya lefaseng, gomme ka morago gwa tla gwa nwa kgoši ya Sheshake.
27 “Ke moka o re go bona: ‘Jehofa wa madira, yena Modimo wa Isiraele, o re: “Enwang le tagwe le hlatše le be le we gomme le palelwe ke go tsoga ka baka la ditšhaba tšeo ke di romelago gore di tlo lwa le lena.”’
28 Ge ba ka gana go tšea komiki yeo ka seatleng sa gago gore ba nwe, o ba botše o re: ‘Jehofa wa madira o re: “Le swanetše go nwa.”
29 Ge e ba ke thoma ka go tliša masetlapelo motseng wo woo o bitšwago ka leina la ka, na le nagana gore nka se le otle?”’
“‘Ke tla le otla, ka gobane ke romela ditšhaba gore di tlo lwa le batho ka moka bao ba dulago lefaseng,’ o realo Jehofa wa madira.
30 “Wena o ba porofetele dilo tše ka moka, o ba botše o re:‘Jehofa o tla rora bjalo ka tau a le legodimong,O tla dira gore lentšu la gagwe le kwagale a le lefelong la gagwe le lekgethwa leo a dulago go lona.
Ruri o tla rorela godimo bjalo ka tau a le mo a dulago.
O tla goeletša go swana le bao ba gatakelago diterebe gore ba dire beine,O tla opela ka ge a fentše batho ka moka bao ba dulago lefaseng.’
31 “Lešata le tla kwagala go fihla mafelelong a lefase,Ka gobane Jehofa o sekiša ditšhaba.
Ke yena a tlago go ahlola batho ka moka.
Le gona o tla fediša batho ba babe ka sabola,’ o realo Jehofa.
32 Jehofa wa madira o re:
‘Tsebang gore masetlapelo a tla wela ditšhaba ka go latelana,Gomme ledimo le legolo le tla tšutla go tšwa dikarolong tša kgole tša lefase.
33 Letšatšing leo bao ba bolailwego ke Jehofa ba tla tlala go tloga karolong e nngwe ya lefase go ya go e nngwe. Ba ka se llelwe, goba go kgoboketšwa goba go bolokwa. Ba tla fetoga manyora lefaseng.’
34 Lena badiši, llang le be le goeletšeng!
Pshikologang mo fase lena ba bagolo mohlapeng,Ka gobane nako ya gore le bolawe le ya gore le gašanywe e fihlile,Gomme le tla wa go swana le sebjana se bohlokwahlokwa.
35 Badiši ga ba na mo ba ka tšhabelago gona,Gomme ba bagolo mo mohlapeng ba ka se phonyokge.
36 Theetšang ge badiši ba hlaba mokgoši,Le ge ba bagolo mohlapeng ba lla gabohloko,Ka gobane Jehofa o senya mafelo ao diphoofolo tša bona di fulago go ona.
37 Mafelo a khutšo ao batho ba dulago go ona ga a sa na bophelo,Ka baka la ge Jehofa a galefile kudu.
38 Modimo o tlogile mo a dulago gona go swana le ge tawana e tloga mo e dulago gona,Ka baka leo batho ba tla makalela naga,Ka gobane o dirišitše sabola e bogale,Yeo e bolayago batho ba bantšhi ka gobane o galefile kudu.”
