Jeremia 29:1-32
29 Moporofeta Jeremia o ile a romela lengwalo a le Jerusalema, a le romela go banna ba bagolo ka moka bao ba bego ba le gare ga batho bao ba thopilwego, a le romela le go baperisita, baporofeta le batho ka moka bao Nebukadinetsara a bego a ba tšere Jerusalema a ba iša bothopša Babilona,
2 ka morago ga ge Kgoši Jekonia, mmagwe, bahlanka ba ka mošate, dintona tša Juda le Jerusalema, ditsebi tša mošomo wa diatla gotee le batho bao ba šomago ka tshipi ba tlogile Jerusalema.
3 O ile a le nea Elasa morwa wa Shafane le Gemaria morwa wa Hilikia, bao Kgoši Tsedekia wa Juda a bego a ba romile Babilona go Kgoši Nebukadinetsara wa Babilona. Lengwalo leo le be le re:
4 “Jehofa wa madira, yena Modimo wa Isiraele, o botša batho ka moka bao ba thopilwego, e lego bao ke dirilego gore ba ye bothopša Babilona ba etšwa Jerusalema gore:
5 ‘Agang dintlo le duleng go tšona, bjalang mehlare ya dienywa gomme le je dienywa tša yona.
6 Nyalang basadi gomme le be le barwa le barwedi, tšeelang barwa ba lena basadi gomme le nyadiše barwedi ba lena, e le gore le bona ba be le barwa le barwedi. Le be ba bantšhi gomme le se ke la fokotšega.
7 Lekang go phela ka khutšo motseng wo ke le išitšego bothopša go wona, le o rapelele go Jehofa ka gobane ge mo motseng wo go na le khutšo, le lena le tla ba le khutšo.
8 Jehofa wa madira, yena Modimo wa Isiraele, o re: “Le se ke la dumelela baporofeta ba lena le batho bao ba rego ba kgona go bolela dilo tšeo di sa tlago go direga bao ba lego gare ga lena ba le fora, le gona le se ke la theetša ditoro tšeo ba di lorago.
9 Ka gobane ‘ba le porofetela maaka ba diriša leina la ka. Ga se ka ba roma,’ o realo Jehofa.”’”
10 “Jehofa o re: ‘E tla re ge mengwaga e 70 e fedile le le Babilona, ke tla le hlokomela gomme ka phetha tshepišo ya ka ya go le bušetša lefelong le.’
11 “Jehofa o re: ‘Ke tseba gabotse seo ke tlago go le direla sona, ke tla le tlišetša khutšo, e sego masetlapelo, e le gore le kgodišege gore le tla ba le bokamoso bjo bobotse.
12 Le tla mpitša la ba la nthapela, gomme nna ke tla le theetša.’
13 “‘Le tla nnyaka la ba la nkhwetša, ka gobane le tla be le ntsoma ka dipelo tša lena ka moka.
14 Ke tla dira gore le nkhwetše,’ o realo Jehofa. ‘Ke tla kgoboketša batho ba lena bao ba thopilwego, gomme ka le kgoboketša go tšwa ditšhabeng ka moka le mafelong ao ke bego ke le phatlalaleditše go ona,’ o realo Jehofa. ‘E bile ke tla le bušetša nageng ya lena.’
15 “Eupša lena le itše: ‘Jehofa o dirile gore re be le baporofeta Babilona.’
16 “Jehofa o bolela ka kgoši yeo e dutšego setulong sa bogoši sa Dafida le ka batho ka moka bao ba dulago motseng wo, e lego banababo lena bao ba sego ba ya le lena bothopša, o re:
17 ‘Jehofa wa madira o re: “Ke tla ba otla ka sabola, tlala le bolwetši, gomme ke tla dira gore ba swane le mago ao a bodilego, ao a sa kgahlišego moo e lego gore ga go na motho yo a ka a jago.”’
18 “‘Ke tla ba tlaiša ka sabola, tlala le bolwetši, le gona ke tla dira gore mebušo ka moka ya lefase e tšhoge ka baka la seo se ba diragaletšego. Ke tla dira gore e be bao ba rogakilwego, ba makatše batho, ba ba leletše molodi ge ba ba bona e le ge ba kgotsa, ka ba ka dira gore ba goboge ditšhabeng ka moka tšeo ke ba phatlalaleditšego go tšona,
19 ka gobane ga se ba theetša dilo tšeo bahlanka ba ka ba baporofeta ba bego ba di bolela, bao ke bego ke ba roma go bona gantšhintšhi,’ o realo Jehofa.
“‘Eupša le lena ga se la ka la theetša,’ o realo Jehofa.
20 “Ka gona ekwang seo Jehofa a se bolelago, lena batho ka moka bao ba thopilwego, bao ke le tlošitšego Jerusalema ka le iša Babilona.
21 Jehofa wa madira, yena Modimo wa Isiraele, o bolela mabapi le Ahaba morwa wa Kolaya le Tsedekia morwa wa Maaseya, bao ba le porofetelago maaka ba diriša leina la ka, o re: “Ke ba neela go Kgoši Nebukadinetsara wa Babilona, gomme yena o tla ba bolaya mo pele ga mahlo a lena.
22 Selo seo se ba diragaletšego e tla ba thogako yeo e tlago go bolelwa ke batho ka moka bao ba thopilwego Juda ba išwa Babilona. Ba tla re: “Anke Jehofa a dire gore le swane le Tsedekia le Ahaba bao kgoši ya Babilona e ba gadikilego mollong,”
23 ka gobane ba dirile dilo tšeo di hlabišago dihlong mo Isiraeleng ka go dira bohlotlolo le basadi ba banna ba bangwe, le ka go bolela mantšu a maaka ao ke sego ka ba laela gore ba a bolele ba diriša leina la ka.
“‘“Ke nna ke tsebago se, e bile ke hlatse ya seo,” o realo Jehofa.’”
24 “Le gona o botše Shemaya wa kua Nehelame o re:
25 ‘Jehofa wa madira, yena Modimo wa Isiraele, o re: “Ka ge o rometše batho ka moka ba Jerusalema mangwalo o diriša leina la gago, wa a romela le go Tsefanya morwa wa Maaseya, yo e lego moperisita, gotee le go baperisita ka moka, wa re:
26 ‘Jehofa o tlošitše moperisita Jehoyada gomme a bea wena gore o be moperisita, e le gore o hlokomele ntlo ya Jehofa, o sware motho le ge e le ofe wa segaswi yo a itirago moporofeta gomme o mo tsenye ka setokising,*
27 bjale goreng o se wa kgalema Jeremia wa Anathothe, yo a itirago moporofeta wa lena?
28 Ka gobane o ile a re romela molaetša kua Babilona, a re: “Le tlo dula nako e telele moo bothopša! Agang dintlo le dule go tšona. Le bjale mehlare ya dienywa gomme le je dienywa tša yona . . .”’”’”
29 Ge moperisita Tsefanya a bala lengwalo leo gomme moporofeta Jeremia a theeditše,
30 Jehofa o ile a bolela le Jeremia a re:
31 “Romela molaetša go batho ka moka bao ba lego bothopša o re: ‘Jehofa o boletše mabapi le Shemaya wa kua Nehelame a re: “Ka ge Shemaya a le porofetetše le ge nna ke se ka mo roma gomme a leka go dira gore le tshepe maaka ao a le botšago ona,
32 gona Jehofa o re: ‘Bjale ke otla Shemaya wa kua Nehelame le ditlogolo tša gagwe. Go ka se be le motho le o tee wa leloko la gagwe yo a tlago go phologa gare ga batho ba, e bile a ka se bone dilo tše dibotse tšeo ke tlago go di direla batho ba ka, ka gobane o dirile gore batho ba hlanogele nna Jehofa,’ o realo Jehofa.’”’”
Mengwalo ya tlase
^ Phetolelo ya lentšu ka lentšu e re, “ka setokising sa maoto le setokising sa matsogo le hlogo.”
