Jeremia 8:1-22
8 Jehofa o re: “Ka nako yeo, marapo a dikgoši tša Juda, marapo a dintona tša yona, marapo a baperisita, marapo a baporofeta le marapo a badudi ba Jerusalema a tla ntšhiwa ka mabitleng a bona.
2 Marapo a bona a tla phatlalatšwa pele ga letšatši, ngwedi le dinaledi ka moka tša legodimong, e lego dinaledi tšeo ba bego ba di rata, ba di hlankela, ba di latela, ba di tsoma e bile ba di khunamela. Batho ba ka se kgoboketše marapo ao gomme ba a boloka. A tla fetoga manyora.”
3 Jehofa wa madira o re: “Batho ka moka bao ba šetšego ba setšhaba se se sebe ba tla kgetha lehu go e na le go kgetha bophelo mafelong ka moka ao ke ba phatlalaleditšego go ona.
4 “O ba botše o re: ‘Jehofa o re:
“Na ba ka se re go wa, ba emelela gape?
Ge yo mongwe a ka boa, na yo mongwe le yena a ka se boe?
5 Ke ka baka la’ng batho ba ba Jerusalema ba dula ba sa mpotegele?
Ga ba tlogele go dira dilo tša bofora,Ba gana go fetoga.
6 Ke be ke hlwaile tsebe gomme ke theeditše, eupša ba be ba sa bolele nnete.
Go be go se na motho yo a bego a itsholela dilo tše mpe tšeo a di dirilego, goba yo a ilego a botšiša gore: ‘Ke dirile’ng?’
Yo mongwe le yo mongwe o dulela go boela tseleng yeo batho ba bantšhi ba e ratago, go no swana le pere yeo e katago e eya ntweng.
7 Gaešita le mogolodi wo o fofago lefaufaung o tseba dinako tša wona gabotse,Leeba la nageng, peolwane le nonyana yeo e bitšwago rankgweše, ka moka ga tšona di tseba nako ya tšona ya go boa.
Eupša ge e le batho ba ka bona ga ba kwešiše nako yeo nna Jehofa, ke tlago go ba ahlola ka yona.”’
8 “‘Goreng le re: “Re hlalefile, e bile re na le molao wa Jehofa”?
Ka nnete pene ya batho ba ya go ngwala mangwalo e dirišitšwe go ngwala ditaba tša maaka.
9 Batho ba bohlale ba hlabišitšwe dihlong.
Ba tšhogile e bile ba tla tanywa.
Ba ganne lentšu la Jehofa,Bjale ke bohlale bofe bjo ba nago le bjona?
10 Ka gona basadi ba bona ke tla ba nea banna ba bangwe,Mašemo a bona ka a nea batho ba bangwe gore e be a bona,Ka gobane batho ka moka, go tloga ka ba maemo a fase go fihla ka ba maemo a godimo ba hwetša dilo ka go se tshepege,Go tloga ka moporofeta go fihla ka moperisita, yo mongwe le yo mongwe o dira dilo ka botsotsi.
11 Ba leka go fodiša morwedi wa batho ba ka ka ge a gobetše ka go no re:“Go na le khutšo! Go na le khutšo!”
Mola go se na khutšo.
12 Na dilo tše di šišimišago tšeo ba di dirilego ga di ba leše dihlong?
Ga ba swabe le ganyenyane!
E bile ga ba tsebe gore go hlabja ke dihlong ke eng.
“‘Ka gona ba tla hwela gare ga bao šetšego ba hwile.
Ge ke ba otla ba tla kgopša,’ o realo Jehofa.
13 Jehofa o re: “‘Ge ke ba kgoboketša, ke tla ba fediša.
Go ka se be le diterebe tšeo di tlago go šala mohlareng, le gona go ka se be le mago ao a tlago go šala mogong gomme matlakala a wona a tla pona.
Dilo tšeo ke bego ke ba neile tšona ba tla di loba.’”
14 “Re duletše eng mo?
A re kgobokaneng, re tseneng metseng e šireleditšwego re yo hwela moo.
Jehofa Modimo wa rena o tla re fediša,E bile o re nea meetse ao a nago le mpholo gore re a nwe,Ka gobane re senyeditše Jehofa.
15 Re be re holofetše gore go tla ba le khutšo, eupša gwa se tle selo se sebotse,Re be re holofetše gore re tla alafiwa, eupša gwa no tla letšhogo feela.
16 Dani go kwagala modumo wa dipere tša manaba a yona,
Le modumo wa dipere tše tona wo o šišinyago naga ka moka.Manaba a a tla
Gomme a fediša naga gotee le dilo ka moka tšeo di lego go yona,A fediša motse le badudi ba wona.”
17 Jehofa o re: “Šefa ke romela dinoga gare ga lena,E lego dinoga tša mpholo, tšeo di ka se kego tša laolwa,*Gomme tšona di tla le loma.”
18 Manyami a ka ga a fole.Pelo ya ka e kwele bohloko.
19 Morwedi wa batho ba ka o llaA kgopela thušo go tšwa nageng ya kgole, o re:
“Na Jehofa ga a Tsione?
Goba na kgoši ya Tsione ga e go yona?”
“Ke ka baka la’ng ba nkgopišitše ka diswantšho tša bona tše di betlilwego,Ka medimo ya bona yeo e se nago mohola?”
20 “Nako ya go buna e fetile gomme selemo se fedile,Eupša ge e le rena ga se ra phološwa!”
21 Ke nyamišitšwe ke gore morwedi wa batho ba ka o gobetše.Ke nyamile kudu.
Ke tšhogile kudu.
22 Na ga go na setlolo sa balesamo kua Gileada?
Goba na ga go na motho yo a kgonago go fodiša moo?
Ke ka baka la’ng morwedi wa batho ba ka a sa fole?
Mengwalo ya tlase
^ Goba, “tša dirišetšwa maselamotse.”
