Jesaya 1:1-31
1 Pono yeo Jesaya morwa wa Amotse a e bonego ya seo se tlago go diragalela Juda le Jerusalema mehleng ya Usia, Jothama, Ahasi le Hesekia, e lego dikgoši tša Juda še:
2 Theetšang lena bao le lego magodimong le lena bao le lego lefaseng,Ka gobane Jehofa o boletše a re:
“Ke fepile bana e bile ka ba godiša,Eupša bona ba ntlhanogetše.
3 Ge e le poo e tseba mong wa yona gabotse,Tonki le yona e tseba moo mong wa yona a e fepelago gona,Eupša Baisiraele bona ga ba ntsebe,Sona setšhaba sa ka ga se kwešiše.”
4 Go madimabe lena setšhaba seo se nago le sebe,Lena batho bao ba imelwago ke molato,Ke ra lena ditlogolwana tša batho bao ba dirago dilo tše mpe!
Lena bana bao ba senyegilego,Le tlogetše Jehofa, la nyatša Mokgethwa wa IsiraeleGomme la mo hlanogela.
5 Ke sa tlo le betha kae gape, ka ge le duletše go ntlhlanogela?
Dihlogo tša lena di tletše dinthoGomme dipelo tša lena di a fokola.
6 Le gobetše go tloga hlogong go fihla leotong.
Le tletše dintho, matetelo e bile le na le dišo.Ga se tša alafiwa goba tša tlengwa goba tša tlotšwa ka makhura.
7 Naga ya lena ke marope,
Metse ya lena e fišitšwe ka mollo.
Batho bao ba tšwago dinageng tše dingwe ba ja dilo tšeo le di bjetšego mašemong a lena le ba lebeletše.
Naga ya lena e senyegile bjalo ka ge eka e hlasetšwe ke batho bao ba tšwago dinageng tše dingwe.
8 Morwedi wa Tsione o tlogetšwe bjalo ka mokutwana mašemong a diterebe,Bjalo ka ntlwana yeo e dirilwego ka mešaša mašemong a dikhukhampa,Le bjalo ka motse wo o hlasetšwego ke manaba.
9 Ge nkabe Jehofa wa madira a se a dira gore go be le ba sego kae mo go rena bao ba phologago,Nkabe re ile ra swana le Sodoma,E bile ra no swana le Gomora.
10 Ekwang lentšu la Jehofa, lena babuši ba Sodoma.
Theetšang molao wa Modimo wa rena, lena batho ba Gomora.
11 Jehofa o re: “Dihlabelo tša lena tše dintšhi di nkhola ka eng?
Ke lapišitšwe ke dibego tša lena tša go fišwa tša dinku tše tona le makhura a diphoofolo tša lena tšeo di nonnegoE bile ga ke kgahlwe ke madi a dipowana, a dikwana le a dipudi tša lena.
12 Ge le duletše go tla pele ga ka,Ke mang yo a le kgopetšego gore le dire bjalo,Gore le tle le gatakele malapa a tempele ya ka?
13 Tlogelang go tliša dibego tša mabele tšeo di se nago mohola.
Diorelo tša lena di a ntšhišimiša.
Le keteka menyanya ya ge go tšwelela ngwedi o moswa, la boloka disabatha e bile la ba le dikopano,Eupša nka se kgotlelele bolotšana bja lena le dikopano tša lena tše kgethwa.
14 Ke hloile menyanya yeo le e ketekago ya ge go tšwelela ngwedi o moswa le menyanya e mengwe ya lena.
E fetogile morwalo mo go nna,E bile ke lapišitšwe ke go e kgotlelela.
15 Ge le emiša matsogo a lena le rapela,Ga ke nyake le go le lebelela.
Le ge le ka rapela gantšhiGa ke le theetše.Matsogo a lena a tletše madi.
16 Hlapang, itlhwekišeng.Ga ke sa nyaka go le bona le dira dilo tše mpe.Tlogelang go dira dilo tše mpe.
17 Ithuteng go dira dilo tše di lokilego. Bontšhang ba bangwe toka,Phošollang bao ba gatelelago batho ba bangwe,Emelelang ditšhiwana ge di swarwa ka go hloka tokaGomme le lwele bahlologadi.”
18 Jehofa o re: “Etlang re lokišeng ditaba.
Le ge dibe tša lena e ka ba tše dikhwibidu go swana le madi,E tla ba tše ditšhweu go swana le lehlwa.Le ge e ka ba tše dikhwibidu go swana le lešela le le khwibidukhwibidu,Di tla šweufala go swana le boya bja nku.
19 Ge e ba le ikemišeditše go theetša,Le tla ja dilo tše dibotse tšeo di tšweleditšwego ke lefase.
20 Eupša ge e ba le gana gomme le sa nyake go nkwa,Gona le tla fedišwa ka sabolaKa gobane ke nna Jehofa ke boletšego se.”
21 Joo motse wola o bego o botegela Modimo o fetogile mogweba-ka-mmele!
O be o tletše toka,Go wona go dirwa dilo tše di lokilego,Eupša gona bjale go tletše babolai.
22 Silifera ya gago e fetogile ditšhila,Gomme bjala bja gago bo tswakantšwe le meetse.
23 Baetapele ba gago ba na le dihlogo tše thata e bile ke bakgotse ba mahodu.
Ka moka ga bona ba rata pipamolomo e bile ba nyakana le dimpho.
Ga ba ahlole ditšhiwana ka toka,E bile ga ba ke ba theetša dilo tšeo bahlologadi ba llago ka tšona.
24 Ka gona Morena wa nnete, yena Jehofa wa madira,Modimo yo Matla wa Isiraele, o re: “Agaa!
Ke tla fediša manaba a kaE bile ka itefeletša go ona.
25 Ke tla go otla,Ke tla tloša ditšhila tšeo di lego mo go wena go no swana le ge batho ba tološa tšhipi gore ba tloše ditšhila tšeo di lego mo go yona,E bile ka tloša ditšhila tša gago ka moka.
26 Ke tla go fa baahlodi gape,Ka go nea baeletši go swana le mathomong.
Ka morago ga moo o tla bitšwa Motse wa go Loka le Motse o Botegago.
27 Ke tla reka Tsione gape ka tokaGomme ka reka batho ba gago bao ba boago ge go dirwa seo se lokilego.
28 Bao ba sa kwego Modimo le badiradibe ba tla fedišwa gotee,Gomme bao ba tlogelago Jehofa le bona ba tla fedišwa.
29 Batho ba tla lewa ke dihlong ka baka la mehlare e megolo yeo le bego le e duma,Gomme lena le tla hlabja ke dihlong ka baka la dirapa tšeo le di kgethilego.
30 Le tla swana le mohlare o mogolo woo matlakala a wona a sa ponegoGomme la etša serapa seo se sa nošetšwego.
31 Motho yo a nago le matla o tla swana le bjang bjo bo omilego,Dilo tšeo a di dirago tša swana le tlhase ya mollo.Motho yoo le dilo tšeo di tlo fišwa ke mollo,Gomme gwa se be le yo a ka o timago.”
