Jesaya 8:1-22
8 Jehofa o ile a re go nna: “Tšea letlapa le legolo gomme godimo ga lona o ngwale ka pene ya tšhipi, o re: ‘Mahere-shalal-hashe-bas.’
2 Ke nyaka gore dihlatse tša nnete, e lego moperisita Uria le Sakaria morwa wa Jeberekia ba hlatsele gore ba bone ge letlapa leo le be le ngwalwa.”
3 Ke moka ka robala le moporofeta wa mosadi gomme a ima, ka morago a belega morwa. Jehofa a re go nna: “Mo reele leina la Mahere-shalal-hashe-bas.
4 Le pele mošemane yoo a ka tseba gore, ‘papa!’ le gore ‘mma!’ batho ba tla tšea mahumo a Damaseko le dilo tšeo ba di tšerego Samaria ba di iša go kgoši ya Asiria.”
5 Jehofa a bolela le nna gape a re:
6 “Ka ge setšhaba se se ganne meetse a Shiloa ao a elago ka go iketlaGomme sa ema le Retsini le morwa wa Remalia,
7 Jehofa yena o tla romela kgoši ya AsiriaLe mašole a yona go hlasela batho bao.Kgoši yeo le mašole a yona ba tla tla ka lebelo,
Go no swana le ge meetse a mantšhiA Noka ya Eforate a falala maribeng a yona ka moka,
8 Gomme a phatša Juda.
Kgoši yeo e tla swana le lefula leo le fetago gomme meetse a lona a tlala go fihla ka melala.E tla phurolla diphego tša yona tša tlala naga ya gago,Wena Imanuele!”
9 Ba kwešeng bohloko lena ditšhaba, fela le tla pšhatlaganywa.
Theetšang lena ka moka le tšwago dikarolong tša kgole tša lefase!
Itokišeletšeng go lwa, fela le tlo pšhatlaganywa!
Itokišeletšeng go lwa, fela le tlo pšhatlaganywa!
10 Logang maano, eupša a ka se atlege!
Bolelang selo se sengwe le se sengwe seo le se ratago eupša se ka se direge,Ka gobane Modimo o na le rena!
11 Jehofa o ile a bolela le nna seatla sa gagwe se matla se le godimo ga ka, gomme o ile a ntemoša gore ke se ke ka ekiša mekgwa e mebe ya batho ba setšhaba se, a re:
12 “Le se ke la re selo ke maanomabe feela ka gobane batho bao le bona ba re ke maanomabe.
Le se ke la tšhaba seo ba se tšhabago,E bile se se ke sa le dira gore le thothomele.
13 Jehofa wa madira ke yena yo le swanetšego go mo tšea e le yo mokgethwa.Ke yena le swanetšego go mmoifa,E bile ke yena a swanetšego go dira gore le thothomele.”
14 Modimo o tla swana le lefelo le lekgethwa.Eupša go mebušo e mebedi ya Isiraele,O tla swana le leswika leo le ba thetšagoLe leo le ba wišago.Go badudi ba JerusalemaO tla swana le moreo le molaba.
15 Ba bantšhi ba bona ba tla kgopša, ba wa gomme ba robega,Ba tla tanywa gomme ba swarwa.
16 Tswalelang lengwalo la bohlatse,Molao wo le o nee barutiwa ba ka feela.
17 Ke tla dula ke letetše Jehofa, yo a utelago ditlogolwana tša Jakobo sefahlego sa gagwe, e bile ke tla dula ke tshepile yena.
18 Nna le bana bao Jehofa a nneilego bona re bjalo ka dipontšho le mehlolo nageng ya Isiraele, e lego tšeo di tšwago go Jehofa wa madira, yo a dulago Thabeng ya Tsione.
19 Ge ba ka re go lena: “Botšišang batho bao ba rego ba kgona go boledišana le bahu, le batho bao ba rego ba kgona go bolela dilo tšeo di tlago go direga nakong e tlago, bao ba sebasebago e bile ba bolelelago fase, na le tla dira bjalo? Na batho ga se ba swanela go botšiša Modimo wa bona? Na bao ba phelago ba swanetše go botšiša bao ba hwilego?
20 Go e na le moo, ba swanetše go nyakišiša gore molao le lengwalo la bohlatse di reng.
Ge e ba ba sa bolele dilo tšeo di dumelelanago le lentšu la Modimo, ba leswiswing le legolo.
21 Motho yo mongwe le yo mongwe o tla feta nageng a tlaletšwe e bile a swerwe ke tlala. Ka ge a tla be a swerwe ke tlala e bile a galefile, o tla rogaka kgoši ya gagwe e bile a rogaka le Modimo wa gagwe ge a lebelela godimo.
22 Motho yoo o tla lebelela lefaseng gomme a bona ditlaišego feela le leswiswi, boso le mathata, a ba a bona leswiswi le lesoleso moo go se nago seetša.
