Jobo 14:1-22
14 “Motho yo a belegwego ke mosadi o phela nako e kopana,Gomme bophelo bja gagwe bo tletše ka mathata.
2 O thunya bjalo ka lepolomo, gomme ka morago a pona,O feta ka lebelo bjalo ka moriti, gomme ka morago a nyamalala.
3 Bjale, go reng o dula o mo tsepeletše,Le gona go reng o mo sekiša?
4 Ruri ga go kgonege gore motho a re a se a hlweka,
A belege motho yo a hlwekilego.
5 Ge e ba matšatši a gagwe a badilwe,Le palo ya dikgwedi tša gagwe e laolwa ke wena,Gona go ra gore o šetše o beetše motho nako yeo a swanetšego go e fetša a phela, e bile a ka se e fete.
6 Tlogela go mo tsepelela gore a khutše,O swana le motho yo a hirilwego, bjale mo tlogele a fetše mošomo wa gagwe wa letšatši.
7 Le ge mohlare o ka rengwa,
Go na le kholofelo ya gore o tlo hloga gape.Le gore makala a wona, a tla no tšwela pele a gola.
8 Ge modu wa wona o ka tšofalela mo mobung,Gomme kutu ya wona ya hwela mobung,
9 Ge o ekwa monola wa meetse o tla hloga,Gomme o tla tšweletša makala go swana le semela se senanana.
10 Eupša motho o a hwa, gomme matla a gagwe ka moka a fela.Ge motho a ehwa o ya kae?
11 Meetse a a pšha lewatleng,Noka le yona e a gopa ke moka ya oma.
12 Motho le yena o ithobalela boroko bjo bogolo, gomme ga a tsoge.
Ge feela legodimo le sa le gona, a ka se tsoge,E bile o tlo no dula a robetše.
13 Okare o ka no nkuta Lebitleng,*Wa mphihla go fihlela o se sa galefile,Okare o ka mpeela nako gomme wa nkgopola!
14 Ge e ba motho a ehwa, na a ka phela gape?
Ke tla leta go fihlela matšatši ka moka ao ke a beetšwego,*Go ba go fihlela ke lokologa.
15 O tla mpitša, gomme nna ke tla go araba.
O tla ntlhologela* ka ge o mpopile.
16 Eupša gona bjale o dula o lebeletše selo se sengwe le se sengwe seo ke se dirago,O lebelela feela dibe tša ka.
17 O tswaleletše diphošo tša ka ka pekeng,Gomme wa kgomaretša melato ya ka ka sekgomaretši.
18 Go no swana le ge thaba e phušoga gomme e ewa,Le leswika le tlošwa lefelong la lona.
19 Le go no swana le ge meetse a senya maswika ganyenyane-ganyenyane,Le mafula le ona a gogola mobu.Le wena o sentše seo motho a se holofetšego.
20 O dulela go mo fekeetša go fihlela a ehwa,O fetoša tsela yeo a lebelegago ka yona, gomme ka morago wa mo iša lebitleng.
21 Bana ba gagwe ba a hlomphiwa, eupša yena ga a tsebe seo.Ba fetoga batho ba go se re selo, eupša yena ga a lemoge seo.
22 O kwa bohloko ge feela a sa phela,E bile o lla ge a sa phela.”
