Jobo 20:1-29
20 Tsofara wa go tšwa Naama a araba Jobo a re:
2 “Ke tlaletšwe, e bile dikgopolo tša ka di a mpherekanya,Ke ka baka leo ke go arabago.
3 Ke kwele ge o nthoga,Eupša ke tla araba ka gobane ke a kwešiša.
4 O swanetše go ba o tseba seo ke tlago go go botša sona,Ka gobane ga e sa le motho a eba gona lefaseng,
5 Motho yo mobe o thaba nako e kopana,Gomme yo a hlanogetšego Modimo o ipshina ka nakwana.
6 Gaešita le ge boikgogomošo bja gagwe bo fihla legodimong,Gomme e le yo motelele go fihla marung,
7 O tla fedišetšwa sa ruri go no swana le mantle a gagwe.Bao ba bego ba tlwaetše go mmona ba tla re: ‘O kae?’
8 O tla nyamalala go swana le toro, gomme ga go na yo a tlago go mmona gape.O tla lebalwa go swana le pono ya bošego.
9 Yo a kilego a mmona a ka se hlwe a mmona gape,E bile a ka se sa bonwa gape ntlong ya gagwe.
10 Bana ba gagwe ba tla kgopela thušo go badiidi,Gomme yena o tla bušetša dilo tšeo a di tšerego go batho ba bangwe.
11 O be a tletše matla a boswa,Eupša o tla hwa le matla ao a gagwe ka moka.
12 Ge e ba se sebe e le se sebose ka ganong ga gagwe,Ge e ba a se fihla ka tlase ga leleme la gagwe,
13 Ge e ba a se ganeletše gomme a sa se tlogele,Eupša a dula a se momile ka molomong,
14 Gona dijo tša gagwe di tla bola ka maleng a gagwe,Di tla ba bjalo ka mpholo wa dipeetla mmeleng wa gagwe.
15 O meditše lehumo, eupša o tla le hlatša,Modimo o tla le ntšha ka mpeng ya gagwe.
16 O tla nyanya mpholo wa dipeetla,Noga ya marabe e tla mo loma gomme ya mmolaya.
17 A ka se tsoge a bone dinokana tša meetse,A ka se tsoge a bone le todi ya dinose e ntšhintšhi le potoro.
18 O tla bušetša lehumo la gagwe a se a le ja,A ka se ipshine ka lehumo leo le tšwago kgwebong ya gagwe.
19 Ka gobane o pšhatlagantše badiidi, a ba tlogela go se na yo a ka ba thušago.O tšere ntlo yeo a sego a e aga.
20 Eupša a ka se iketle,Mahumo a gagwe a ka se mo phološe.
21 Ga go na selo se se šetšego seo a ka se jago,Ka baka leo mahumo a gagwe a ka se dule a le gona.
22 O tla re ge a humile kudu, a thoma go tlalelwa,Gomme a diragalelwa ke dilo ka moka tše mpe.
23 E tla re ge a sa ja,Modimo a mo galefela kudu,A dira gore a welwe ke dilo tše mpe.
24 Le ge a ka tšhabela dibetša tša tšhipi,Mesebe ya koporo e tla mo rathaganya.
25 O tla ntšha mosebe wo o phuleleditšego mokokotlong wa gagwe,A ntšha sebetša se se phadimago seo se phuleleditšego sabohlokong sa gagwe,Gomme a tšhoga kudu.
26 O tla loba mahumo a gagwe ka moka ka leswiswing,O tla fišwa ke mollo wo go se nago yo a o bešetšago.Bao ba šetšego ka tenteng ya gagwe ba tlo welwa ke mathata.
27 Legodimo le tla utolla molato wa gagwe,Lefase lona la lwa le yena.
28 Pula ya matlorotloro e tlo gogola ntlo ya gagwe,Gomme go tlo ba le mafula letšatšing la ge Modimo a mo galefetše.
29 Se ke seo Modimo a se neago motho yo mobe,Ke bjona bohwa bjoo Modimo a mo fago bjona.”
