Jobo 37:1-24
37 “Ge ke nagana ka se pelo ya ka e betha ka lebelo,E bile go bjalo ka ge eka e tla tloga mo e dutšego gona.
2 Theetšang gabotse lentšu la Modimo le matla,Leo ekego ke modumo wa legadima.
3 Modumo woo o kwagala ka tlase ga magodimo ka moka,Gomme legadima la gagwe le fihla mafelelong a lefase.
4 Ka morago ga moo go kwagala modumo wa go rora,Lentšu la Modimo ke le matla, le bjalo ka modumo wa legadima,Ge a bolela legadima le dulela go benya.
5 Lentšu la Modimo le duma ka tsela e makatšago,O dira dilo tše dikgolo tšeo re ka se di kwešišego.
6 Ka gobane o botša kapoko a re: ‘Wela lefaseng,’
Gomme a botša le pula ya matlorotloro a re: ‘Ena ka matla.’
7 Modimo o emiša mediro ka moka ya batho,E le gore motho wa nama le madi a tle a tsebe mediro ya yena Modimo.
8 Diphoofolo tša naga di tsena mo di dulago gona,Gomme tša se ke tša tšwa.
9 Ledimo le a tla la foka,Gomme diphefo tša ka leboa di dira gore go tonye.
10 Mohemo wa Modimo o dira gore go be le lehlwa,Gomme o dira gore meetse ka moka a kgahle.
11 O dira gore maru a imelwe ke monola,A dira gore legadima le gadime marung.
12 Legadima le maru ao tša ya go gongwe le go gongwe mo a di laelago gore di ye gona.Tša dira se sengwe le se sengwe seo a di laelago gore di se dire lefaseng ka moka.
13 O diriša maru go otla batho,Go dira gore pula e ne lefaseng goba go bontšha botho* bja gagwe.
14 Theetša wena Jobo,Ema gomme o lebeledišiše mediro yeo e makatšago ya Modimo.
15 Na o a tseba gore Modimo o laola maru bjang,Le gore o dira bjang gore legadima le gadime marung a gagwe?
16 Na o a tseba gore maru a phaphamala bjang?
Ye ke mediro e makatšago ya yo a tsebago dilo ka moka.
17 Go reng diaparo tša gago di fiša,Ge phefo ya ka borwa e dira gore lefase le homole?
18 Na o ka phurolla leratadima o na le yena,Leo e lego le le thata go swana le seipone sa tšhipi?
19 Re botše gore re reng go yena,Ga re kgone go araba ka gore ga re tsebe selo.
20 Na ke swanetše go botša Modimo gore ke nyaka go bolela le yena?
Goba na go na le motho yo a boletšego selo seo ke swanetšego go se botša Modimo?
21 Batho ga ba kgone go bonaGaešita le letšatši leo le širilwego ke maru,Go fihlela phefo e feta gomme maru a apoga.
22 Ka leboa go tšwelela letago leo le phadimago go swana le gauta,Bogolo bja Modimo bo a boifiša.
23 Re ka se kgone go kwešiša dilo ka moka ka Ramatlaohle,O na le matla a magolo,Le gona o dula a ahlola ka toka e bile o lokile kudu.
24 Ka baka leo batho ba swanetše go boifa Modimo,
Ka gobane ga a amogele batho bao ba naganago gore ba bohlale.”
Mengwalo ya tlase
^ Phetolelo ya lentšu ka lentšu e re, “lerato le le botegago.”
