Joele 3:1-21
3 “Bonang! mehleng yeoKe tlo bušetša mathopša a Juda le a Jerusalema morago.
2 Ke tlo kgoboketša le batho ba ditšhaba ka mokaGomme ka ba iša Moeding wa Jehoshafate.*
Ke tlo ba ahlolela gona mooKa baka la seo ba se dirilego Baisiraele bao e lego bohwa bja ka,Ka gobane ba ba phatlaladitše le ditšhaba tše dingwe,Gomme ba arolelana naga ya ka.
3 Ba dira matengwa gore ba arolelane batho ba ka.Ba rekiša ngwana wa mošemane gore ba reke mogweba-ka-mmele.Ba rekiša ngwana wa ngwanenyana gore ba reke beine.
4 Le gona, ke ka baka la’ng le elwa le nnaLena Tiro le Sidone le dinaga ka moka tša Filisita?
Na go na le seo ke le dirilego sona gomme le a itefeletša?
Ge e ba le itefeletša,Gona le nna ke tla itefeletša ka pela go ya ka tsela yeo le ntshwarago ka yona.
5 Gobane le tšere silifera ya ka le gauta ya kaGomme le išitše dilo tša ka tše dibotse ka ditempeleng tša lena.
6 Batho ba Juda le ba Jerusalema le ba rekišeditše Bagerika,E le gore le ba iše kgole le naga ya gabo bona.
7 Bjale ke ba bušetša morago go tšwa lefelong leo le ba rekišeditšego go lona.Ke tla itefeletša go ya ka seo le se dirilego.
8 Ke tla rekišetša batho ba Juda barwa ba lena le barwedi ba lena,Gomme bona ba tla ba rekišetša batho ba Sheba, e lego setšhaba seo se lego kgole kudu,Gobane ke nna Jehofa yo a boletšego.
9 Tsebišang ditšhaba le re:
‘Itokišetšeng ntwa! Tsošang banna ba matla!
Batametšang mašole ka moka gomme a hlasele!
10 Megoma ya lena e direng ditšhoša gomme disekela tša lena le di dire marumo.
Anke yo a fokolago a re: “Ke na le matla.”
11 Lena ditšhaba ka moka tša kgauswi kgobokanang, gomme le tle le thušeng.’”
Wena Jehofa, tliša madira a gago lefelong leo.
12 “Ditšhaba ka moka a di kgobokane gomme di rotogele Moeding wa Jehoshafate,Ka gobane ke tla dula moo ka ahlola ditšhaba ka moka tša kgauswi.
13 Etlang le disekela gobane ke nako ya go buna.
Etlang le gatakele diterebe ka gobane segatelo sa tšona se tletše.
Dibe tša bona ke tše dintšhi go swana le beine yeo e tletšego wa go falala.
14 Mašabašaba a moeding wa kahlolo,Gobane letšatši la Jehofa le batametše moeding wa kahlolo.
15 Letšatši le ngwedi di tla swifala,Le dinaledi di ka se phadime.
16 Jehofa o tla rora bjalo ka tau a le Tsione.O tla goeletša a le Jerusalema.
Ke moka legodimo le lefase di tla šišinyega,Eupša Jehofa o tla ba setšhabelo sa batho ba gagweLe sebo sa batho ba Isiraele.
17 Le tla tseba gore ke nna Jehofa Modimo wa lena, yo a dulago Tsione thabeng ya ka e kgethwa.
Jerusalema e tla ba lefelo le lekgethwa.Ge e le batho ba dinaga tše dingwe ba ka se sa hlwa ba phatša go yona.
18 Mehleng yeo dithaba di tla rotha beine e bose,Meboto yona e tla elela maswi,Gomme dinoka ka moka tša Juda di tla elela meetse.
Ntlong ya Jehofa go tla ba le sediba seo se elelago,Gomme se tla nošetša Moedi wa Sithime.*
19 Eupša Egepeta e tla ba lešope,Gomme Edomo yona ya ba lešoka leo le sa hlokomelwego,Ka baka la bošoro bjo ba bo dirilego batho ba Juda,Ka go bolaya batho ba se nago molato nageng yeo.
20 Eupša Juda go tla dula go na le bathoGomme Jerusalema go tla dula go na le batho go ya go ile.
21 Ke tlo tloša molato wa madi wo ba bego ba na le wona peleng,Gomme Jehofa o tla dula Tsione.”
Mengwalo ya tlase
^ Leina le le ra gore, “Jehofa ke Moahlodi.”
^ Phetolelo ya lentšu ka lentšu e re, “meduhlare.”
