Joshua 3:1-17
-
Baisiraele ba tshela Noka ya Jorodane (1-17)
3 Joshua le Baisiraele ka moka ba tsoga ka masa, ke moka ba tloga Shithima ba ya Nokeng ya Jorodane. Ba robala moo pele ga ge ba ka tshela.
2 Ka morago ga matšatši a mararo, baetapele ba setšhaba ba feta ka gare ga dikampa
3 gomme ba laela setšhaba, ba re: “Gateetee ge le bona areka ya kgwerano ya Jehofa Modimo wa lena e rwelwe ke baperisita, bao e lego Balefi, gona le lena le tloge moo le emego gona le e latele.
4 Eupša le be kgole le yona ka dikubiti* tše e ka bago tše 2 000 (dikete tše pedi). Le se ke la e batamela, gore le tle le bone tsela yeo le swanetšego go sepela ka yona, ka gobane ga se la ka la sepela ka tsela yeo.”
5 Bjale Joshua a re go setšhaba: “Itokišeng,* ka gobane gosasa Jehofa o tlo le direla dilo tše di makatšago.”
6 Ke moka Joshua a re go baperisita: “Rwalang areka ya kgwerano gomme le ete setšhaba pele.” Ka gona ba rwala areka ya kgwerano ba eta setšhaba pele.
7 Ke moka Jehofa a re go Joshua: “Go tloga lehono Baisiraele ba tlo thoma go go hlompha ka gobane ke tlo ba bontšha gore ke na le wena go swana le ge ke ile ka ba le Moshe.
8 Wena o laele baperisita bao ba rwelego areka ya kgwerano o re: ‘Ge le fihla Nokeng ya Jorodane, le tsene ka moo meetseng gomme le eme ka go se šišinyege moo meetse a gomago gona.’”
9 Joshua a re go Baisiraele: “Batamelang mo le kweng seo Jehofa Modimo wa rena a mpoditšego sona.”
10 Ke moka Joshua a re: “Bjale le tlo tseba gore Modimo yo a phelago o a le thuša, le gore ka nnete o tla fediša Bakanana, Bahethe, Bahefe, Baperetse, Bagirigashe, Baamore le Bajebusi pele ga lena.
11 Le gona, areka ya kgwerano ya Morena wa lefase ka moka e tla le eta pele ya tsena Nokeng ya Jorodane.
12 Bjale kgethang banna ba 12 melokong ya Isiraele, le kgethe monna o tee molokong o mongwe le o mongwe.
13 Ge baperisita bao ba rwelego Areka ya Jehofa, Morena wa lefase ka moka, ba se na go gata ka meetseng a Noka ya Jorodane, meetse ao a theogago a etšwa ka godimo, a tla kgaotša go elela gomme a ema go swana le meetse a ka letamong.”
14 Ge setšhaba se tloga ditenteng tša sona gore se ye go tshela Noka ya Jorodane, baperisita bao ba rwelego areka ya kgwerano ba ile ba se eta pele.
15 Gateetee ge baperisita bao ba rwelego areka ya kgwerano ba fihlile Nokeng ya Jorodane gomme maoto a bona a gatile moo meetse a gomago gona (Noka ya Jorodane e be e tlala wa go falala matšatšing ka moka a ge go bunwa),
16 meetse ao a elelago a etšwa ka godimo a ema. A ema bjalo ka meetse a ka letamong a le kgole kua Adama, e lego motse wo o lego kgauswi le Tsarethane, mola meetse ao a theogelago Lewatleng la Araba, e lego Lewatle la Letswai,* a ile a tšwela pele a elela go fihlela noka e gopa. Meetse a ile a ema gomme batho ba tshela ba lebile Jeriko.
17 Baperisita bao ba rwelego areka ya kgwerano ya Jehofa ba ile ba tšwela pele ba eme ka go se šišinyege mo go omilego gare ga Noka ya Jorodane, go fihlela setšhaba ka moka sa Isiraele se tshetše Noka ya Jorodane mo go omilego.
Mengwalo ya tlase
^ E be e le dimithara tše e ka bago 890 . Bona Dit. B14.
^ Phetolelo ya lentšu ka lentšu e re, “Ikgethagatšeng.”
^ Ke gore, “Lewatle le le Hwilego.”
