Mika 5:1-15
5 “Bjale lena badudi ba motse wo o šwahletšwego,Le a itshegakanya.Manaba a re hlasetše.
A itia moahlodi wa Isiraele ka kgati lerameng.
2 Wena Betlelehema Efurata,Le ge o le yo monyenyane kudu go ba gare ga meloko ya Juda,Go wena go tla tšwa yo e tlago go ba mmuši wa Isiraele,Yoo e sa lego a eba gona go tloga mehleng ya kgale, e lego mehleng ya kgalekgale.
3 Ka gona Modimo o tlo ba tlogela gore manaba a bona a ba tšee,Go fihlela ge mosadi yo a swerwego ke lešoko a belege.
Ke moka banababo ka moka ba tla boela go batho ba Isiraele.
4 O tla ema gomme a diša mohlape a thušwa ke matla a Jehofa,A dira seo ka matla a leina leo le phagamego la Jehofa Modimo wa gagwe.
Ba tla dula moo ba šireletšegile,Ka gobane batho ka moka go fihla mafelelong a lefase, ba tla tseba gore ke yo mogolo.
5 Yena yoo o tla tliša khutšo.
Ge Baasiria ba ka hlasela naga ya rena gomme ba gatakela maboto ao a šireleditšego motse wa rena,Re tla kgetha badiši ba šupago, ee, batho ba seswai bao e tlago go ba matona.
6 Ba tla otla* naga ya Asiria ka tšhoša,Le batho ba dikeiting tša naga ya Nimirode.
Ge Baasiria ba hlasela naga ya rena le go e gatakela,O tla re phološa.
7 “Ditlogolwana tše di šetšego tša Jakobo di tla ba gare ga meraforafo,Bjalo ka phoka yeo e tšwago go Jehofa,Le bjalo ka pula yeo e nošetšago dimela,Yeo e sa ithekgego ka motho,Goba go letela bana ba batho.
8 Mo gare ga ditšhaba le meraforafo,Ditlogolwana tše di šetšego tša Jakobo,Di tla ba bjalo ka tau gare ga dibata tša naga,Le bjalo ka tawana gare ga mehlape ya dinku,Yeo e fetago gare ga mehlape yeo ya e gatakela le go e rathaganya,Gomme gwa se be le yo a e phološago.
9 Lena le tlo fenya manaba a lena,Gomme wona a tlo fedišwa ka moka.”
10 Jehofa o re: “Letšatšing leo ke tla fediša dipere tša lena,Gomme ka senya dikariki tša lena.
11 Ke tla fediša metse ya nageng ya lena,E bile ka phušola le mafelo a lena ka moka ao a šireleditšwego.
12 Ke tla fediša boloi bjo le bo dirago,E bile mo go lena go ka se sa ba le motho yo a dirago dilo tša maleatlana.
13 Ke tla fediša diswantšho tša lena tšeo di betlilwego le dikota tša lena tšeo le di rapelago,Gomme le ka se sa khunamela dilo tšeo le di dirilego.
14 Ke tla tumola dikota tša lena tše kgethwa,*Gomme ka fediša metse ya lena.
15 Ke tla itefeletša go ditšhaba tšeo di sa kago tša nkwa.Ke tla dira bjalo ke galefile e bile ke befetšwe.”
