Mmoledi 7:1-29
7 Leina* le lebotse le phala makhura a bohlokwa, le letšatši la go hwa ga motho le phala letšatši la go belegwa ga gagwe.
2 Go ya ntlong ya dillo go phala go ya ntlong ya monyanya, ka gobane batho ka moka ba a hlokofala. Bao ba phelago ba swanetše go dula ba gopola se.
3 Go nyama go phala go sega ka gobane go dira gore motho a lemoge mafokodi a gagwe.*
4 Motho yo bohlale yoo a lego ntlong ya dillo o nagana kudu ka bophelo le lehu, eupša setlaela se dula se naganne ka go ithabiša.
5 Go theetša kgalemelo ya yo bohlale go phala go theetša kopelo ya ditlaela.
6 Ka gobane setshego sa setlaela se swana le meetlwa yeo e thunyago ge e ekwa mollo ka tlase ga pitša. Se le sona ke lefeela.
7 Eupša kgatelelo e ka dira gore motho yo bohlale a dire tša bogaswi, gomme pipamolomo e senya pelo.
8 Mafelelo a taba a phala mathomo a yona. Go se fele pelo go phala go ikgogomoša.
9 O se ke wa kitimela go kgopišega ka pela, ka gobane ditlaela ke tšona di kgopišegago ka pela.
10 O se ke wa re: “Ke ka baka la’ng mehla ya kgale e phala ya gona bjale?” ka gobane o tla ba o bontšha botlaela ge o botšiša potšišo ye.
11 Bohlale ge bo na le bohwa ke selo se sebotse e bile bo hola bao ba phelago.*
12 Ka gobane bohlale bo a šireletša go no swana le ge tšhelete e šireletša. Eupša mohola wa tsebo le bohlale ke gore di phediša bao ba nago le tšona.
13 Bona modiro wa Modimo wa nnete, ka gobane ke mang yo a ka kgonago go otlolla seo Modimo a se kgopamišitšego?
14 Letšatšing le lebotse le wena dira dilo tše dibotse, eupša letšatšing la masetlapelo, gopola gore Modimo wa nnete o dumeletše gore go be le letšatši le lebotse le la masetlapelo e le gore batho ba se ke ba tseba seo se tlago go ba diragalela nakong e tlago.
15 Ke bone dilo ka moka matšatšing a ka a sego kae.* Ke bone motho yo a lokilego a ehwa le ge a lokile gomme ka bona motho yo mobe a phela nako e telele le ge a dira dilo tše mpe.
16 O se itire yo a lokilego kudu goba wa itira yo a hlalefilego kudu. Ke ka baka la’ng o ipakela mathata?
17 O se ke wa fetelela ge o dira dilo tše mpe goba wa ba setlaela. Ke ka baka la’ng o swanetše go hwa ka pela?
18 Go kaone gore o kwe dikeletšo tše tše pedi. O se ke wa tlogela le e tee ya tšona ka gobane yo a boifago Modimo o tla di diriša ka moka ga tšona.
19 Bohlale bo dira gore motho yo bohlale a be le matla go feta banna ba lesome ba matla bao ba lego motseng.
20 Ka gobane ga go na motho yo a lokilego mo lefaseng yo a dulago a dira se se lokilego gomme a sa dire sebe.
21 Le gona, o se ke wa tšea selo se sengwe le se sengwe seo batho ba se bolelago wa se bea pelong e le gore o se ke wa kwa ge mohlanka wa gago a bolela dilo tše mpe ka wena.*
22 Ka gobane le wena o tseba gabotse gore ke gantšhi o bolela dilo tše mpe ka ba bangwe.
23 Tše ka moka ke di lekile ka bohlale gomme ka re: “Ke tla hlalefa.” Eupša ke ile ka palelwa.
24 Dilo ka moka tšeo di diregilego ga di kwešišege e bile go bjalo ka ge eka di kgole kudu. Ga go na yoo a ka di kwešišago.
25 Ka phetha ka gore ke nyake bohlale le go bo tseba, gaešita le go bo hlahlobišiša le go tseba gore ke ka baka la eng dilo di direga le go kwešiša dilo tše mpe tšeo di dirwago ke ditlaela le dilo tša bošilo tšeo di dirwago ke digaswi.
26 Ke moka ka lemoga gore mosadi yo a swanago le nete ya motsomi yoo pelo ya gagwe e swanago le nete ya go rea dihlapi le yoo matsogo a gagwe a swanago le diketane tša tronkong, o galaka go feta lehu. Yo a kgahlago Modimo wa nnete o tla phonyokga mosadi yoo, eupša modiradibe o tla tanywa ke mosadi yoo.
27 Mokgoboketši o re: “Se ke seo ke se hweditšego. Ke nyakišišitše dilo ka moka gomme ka fihlelela phetho,
28 eupša ga se ka hwetša dilo tšeo ke ilego ka tšwela pele ke di nyaka. Go batho ba 1 000 (sekete) ke hweditše monna o tee feela wa go loka, eupša ga se ka hwetša mosadi le o tee wa go loka gare ga batho bao.
29 Selo setee seo ke se hweditšego ke gore, Modimo wa nnete o dirile batho ba lokile, eupša bona ba loga maanomabe a mantšhi.”
Mengwalo ya tlase
^ Goba, “Go tuma gabotse.”
^ Phetolelo ya lentšu ka lentšu e re, “pelo e ka thaba le ge sefahlego se nyamile.”
^ Phetolelo ya lentšu ka lentšu e re, “bao ba bonago seetša sa letšatši.”
^ Goba, “a lefeela.”
^ Phetolelo ya lentšu ka lentšu e re, “a go roga.”
