Nehemia 12:1-47
12 Baperisita le Balefi bao ba boilego bothopša le Serubabele morwa wa Shealatiele le Jeshua e be e le Seraya, Jeremia, Esera,
2 Amaria, Maluka, Hatushi,
3 Shekania, Rehuma, Meremothe,
4 Ido, Ginethoi, Abija,
5 Mijamini, Maadia, Biliga,
6 Shemaya, Joyariba, Jedaya,
7 Sallu, Amoka, Hilikia le Jedaya. Bona ba be ba eteletše pele baperisita le banababo bona mehleng ya Jeshua.
8 Balefi e be e le Jeshua, Binui, Kadimiele, Sherebia, Juda le Matania yo a bego a eteletše pele banababo le diopedi tšeo di bego di opela dikoša tša go leboga Modimo.
9 Batho bao ba bego ba šoma le bona e lego Bakabukia le Uni ba be ba eme go lebana le bona gore ba dire mošomo wa go leta.
10 Jeshua o ile a ba tatago Joyakima, Joyakima a ba tatago Eliashiba, Eliashiba a ba tatago Joyada.
11 Ke moka Joyada o ile a ba tatago Jonathane, gomme Jonathane a ba tatago Jadua.
12 Ba e be e le baperisita mehleng ya Joyakima, e lego dihlogo tša malapa a botatago bona: Lapeng la Seraya e be e le Meraya, la Jeremia e le Hanania,
13 la Esera e le Meshulama, la Amaria e le Jehohanani,
14 la Maluki e le Jonathane, la Shebania e le Josefa,
15 la Harima e le Adena, la Merayothe e le Helekai,
16 la Ido e le Sakaria, la Ginethoni e le Meshulama,
17 la Abija e le Sikiri, la Miniamini e le . . .,* la Moadia e le Pilitai,
18 la Biliga e le Shamua, la Shemaya e le Jehonathane,
19 la Joyariba e le Matenai, la Jedaya e le Usi,
20 la Salai e le Kalai, la Amoka e le Ebere,
21 la Hilikia e le Hashabia, la Jedaya e le Nethanele.
22 Dihlogo tša malapa a Balefi le baperisita ba ile ba ngwadišwa mehleng ya Eliashiba, Joyada, Johanana le Jadua, go ba go fihla nakong ya ge go buša Dario wa Moperesia.
23 Balefi bao e bego e le dihlogo tša malapa a botatago bona ba ile ba ngwadišwa ka pukung ya ditaba tša mehleng yeo go ba go fihla mehleng ya Johanana morwa wa Eliashiba.
24 Banna bao ba bego ba etelela pele Balefi e be e le Hashabia, Sherebia le Jeshua morwa wa Kadimiele gotee le banababo bona bao ba bego ba eme go lebana le bona gore ba tumiše Modimo le go mo leboga go ya ka seo ba bego ba se laetšwe ke Dafida monna wa Modimo wa nnete. Sehlopha se sengwe sa go leta se be se eme go lebana le se sengwe.
25 Matania, Bakabukia, Obadia, Meshulama, Talamoni le Akuba ba be ba šoma go leta dikeiting, ba leta diphapoši tša go bolokela dilo tšeo di bego di le dikeiting.
26 Banna ba ba hlanketše mehleng ya Joyakima morwa wa Jeshua morwa wa Jotsadaka le mehleng ya mmuši Nehemia le ya moperisita Esera yo e bego e le mongwalolodi.
27 Ge go be go tlo neelwa maboto a Jerusalema, ba ile ba nyakana le Balefi mafelong ka moka ao ba bego ba dula go wona, gomme ba ba tliša Jerusalema gore ba tle ba neele maboto ao ba thabile le go opela dikoša tša go leboga Modimo, ba letša disimbala, diletšo tša metato le diharepa.
28 Diopedi tšeo di tlwaeditšwego gabotse di ile tša kgobokana di etšwa tikologong ya kgauswi le moo, Jerusalema ka moka, metseng ya Banetofa,
29 Bethe-giligala le mašemong a Geba le Asimafete, ka gobane diopedi tšeo di be di ikagetše metsana go dikologa Jerusalema ka moka.
30 Le gona baperisita le Balefi ba itlhwekiša go ya ka Molao, ba ba ba hlwekiša le setšhaba, dikeiti le leboto.
31 Ke ile ka tliša baetapele ba Juda gore ba namele lebotong. Ke moka ka kgetha dikhwaere tše pedi tše dikgolo tša go opela dikoša tša go leboga Modimo, gomme khwaere e nngwe le e nngwe e be e šetšwe morago ke sehlopha sa batho. Sehlopha se sengwe se be se sepela ka go le letona lebotong se eya Keiting ya Dintotoma tša Melora.
32 Sehlopheng seo se bego se sepela ka morago ga khwaere go be go na le Hoshaya, seripa sa baetapele ba Juda,
33 Asaria, Esera, Meshulama,
34 Juda, Benjamini, Shemaya le Jeremia.
35 Ba be ba šetšwe morago ke ba bangwe ba barwa ba baperisita bao ba letšago diphalafala. Gare ga bona e be e le Sakaria morwa wa Jonathane morwa wa Shemaya morwa wa Matania morwa wa Mikaya morwa wa Sakuri morwa wa Asafa,
36 gotee le banababo bona e lego Shemaya, Asarele, Milalai, Gilalai, Maai, Nethanele, Juda le Hanani, gomme ba swere diletšo tša mmino tša Dafida monna wa Modimo wa nnete. Ba be ba etilwe pele ke Esera yo e bego e le mongwalolodi.
37 Ge ba le Keiting ya Sedibeng ba rotoga ka Ditepisi tšeo di yago Motseng wa Dafida ka morotoga wa leboto wo o lego ka godingwana ga Ntlo ya Dafida ba lebile Keiting ya Meetse go ya ka bohlabela.
38 Khwaere e nngwe yeo e bego e opela dikoša tša go leboga Modimo e ile ya ya ka lehlakoreng le lengwe, ke moka nna le seripa se sengwe sa setšhaba re ile ra šala khwaere yeo morago ra ya lebotong, ka godingwana ga Leboto le Letelele la Sebešo sa go Dira Marotho le Lebotong la Phaphathi,
39 ra feta Keiting ya Efuraimi ra leba Keiting ya Motse wa Kgale go ba go fihla Keiting ya Dihlapi le Lebotong le Letelele la Hananele le Lebotong le Letelele la Mea, ke moka ra leba Keiting ya Dinku. Mafelelong ra ema Keiting ya Bao ba Šomago go Leta.
40 Mafelelong dikhwaere tšeo tše pedi tša go opela dikoša tša go leboga Modimo di ile tša fihla tša ema ka pele ga ntlo ya Modimo wa nnete le nna ke le gona ke na le seripa sa dintona,
41 le baperisita bao ba swerego diphalafala, e lego Eliakima, Maaseya, Miniamini, Mikaya, Elioenai, Sakaria, Hanania,
42 Maaseya, Shemaya, Eleasara, Usi, Jehohanani, Malakiya, Elama le Esere. Ka gona diopedi tšeo di ile tša opelela godimo di eteletšwe pele ke Isiraya.
43 Letšatšing leo ba ile ba dira dihlabelo tše dintšhi gomme ba thaba, ka gobane Modimo wa nnete o ile a dira gore ba thabe kudu. Basadi le bana le bona ba ile ba thaba, mo e lego gore lethabo la Jerusalema le ile la kwagala kgole.
44 Letšatšing leo go ile gwa kgethwa banna gore ba hlokomele mafelo a go bolokela meneelo, dilo tšeo di bunnwego pele gotee le dikarolo tša lesome. Mafelong ao ba be ba bolokela karolo ya dilo tšeo di tšwago mašemong a metseng ya kgauswi le bona tšeo di bego di newa baperisita le Balefi go ya ka Molao, ka gobane Bajuda ba be ba thaba ka baka la ge baperisita le Balefi ba be ba ba hlankela.
45 Baperisita le Balefi ba thoma go dira mešomo ya Modimo wa bona le mošomo wa bona wa go hlwekiša. Ke moka diopedi le batho bao ba bego ba šoma go leta dikeiting le bona ba dira mešomo ya bona go ya ka seo ba bego ba se laetšwe ke Dafida le Solomone morwa wa gagwe.
46 Kgale mehleng ya Dafida le Asafa go be go na le batho bao ba bego ba etelela pele diopedi le dikoša tša go tumiša Modimo le go mo leboga.
47 Le gona mehleng ya Serubabele le mehleng ya Nehemia, Baisiraele ka moka ba be ba nea diopedi le batho bao ba bego ba šoma go leta dikeiting dilo tšeo ba bego ba di hloka letšatši le letšatši. E bile ba be ba beela ka thoko karolo ya lesome ya dilo tšeo ba bego ba di ntšhetša Balefi, gomme Balefi bona ba beela ka thoko karolo ya lesome ya dilo tšeo ba bego ba di ntšhetša ditlogolwana tša Arone.
Mengwalo ya tlase
^ Ka dikoping tša kgale tša Mangwalo a Seheberu go bonagala go se na leina mo.
