Nehemia 3:1-32
-
Maboto a agwa leswa (1-32)
3 Ke moka, Eliashiba e lego moperisita yo a phagamego le banababo bao e lego baperisita ba thoma go aga lefelo leo go tsenago dinku, leo le bitšwago Keiti ya Dinku. Ba dira gore keiti yeo e be e kgethwa, ba tsenya le mejako ya yona, ba kgethagatša karolo yeo e tlogago Keiting ya Dinku go fihla ka Leboto le Letelele la Mea, le go tloga ka Leboto le Letelele la Mea go fihla ka Leboto le Letelele la Hananele.
2 Banna ba Jeriko ba ile ba aga kgauswi le bona. Sakuri morwa wa Imiri le yena a aga kgauswi le bona.
3 Barwa ba Hasena ba ile ba aga Keiti ya Dihlaping. Ba ile ba e aga ka dikota ke moka ba tsenya mejako ya yona, dipautu tša yona le dikota tša yona tša go tswalela mejako.
4 Meremothe morwa wa Urija, e lego morwa wa Hakotse, o ile a lokiša leboto a le kgauswi le banna ba Hasena gomme Meshulama morwa wa Berekia, e lego morwa wa Meshesabele, yena a lokiša leboto a le kgauswi le Meremothe. Ke moka Tsadoko morwa wa Baana yena o ile a lokiša leboto a le kgauswi le Meshulama.
5 Ke moka Bathekoa ba ile ba lokiša leboto ba le kgauswi le Tsadoko, eupša batho bao ba nago le maemo, bona ba ile ba gana go dira mošomo wo ba eteletšwe pele ke baetapele ba bona.
6 Joyada morwa wa Pasea le Meshulama morwa wa Besodia, ba ile ba lokiša keiti yeo e bitšwago Keiti ya Motse wa Kgale. Ba ile ba e aga ka dikota ke moka ba tsenya mejako ya yona, dipauto tša yona le dikota tša yona tša go tswalela mejako.
7 Melatia wa go tšwa Gibeoni le Jadoni wa go tšwa Merone yeo e lego kgauswi le Mitsipa, bao ba bego ba bušwa ke mmuši wa ka bodikela bja Noka ya Eforate, ba ile ba lokiša leboto ba le kgauswi le banna ba Joyada le Meshulama.
8 Usiele morwa wa Harahaya, yo a šomago ka gauta o ile a lokiša leboto a le kgauswi le banna ba Melatia le ba Jadoni. Hanania e lego yo mongwe wa bao ba dirago dilo tša go tlola, o ile a lokiša leboto a le kgauswi le Usiele, gomme ba ile ba dira lebato la Jerusalema ka maswika go ba go fihla Lebotong la Phaphathi.
9 Refaya morwa wa Huru, yo e lego moetapele wa karolo e nngwe ya tikologo ya Jerusalema, o ile a lokiša leboto a le kgauswi le Hanania.
10 Jedaya morwa wa Harumafa o ile a lokiša leboto a le ka pele ga ntlo ya gagwe a le kgauswi le Refaya. Ke moka Hatushi morwa wa Hashabanea o ile a lokiša leboto a le kgauswi le Jedaya.
11 Malakiya morwa wa Harima le Hasishubi morwa wa Pahathe-moaba bona ba ile ba lokiša karolo e nngwe ya leboto gotee le Leboto le Letelele la Sebešo sa go Dira Marotho.
12 Shalume morwa wa Haloheshe, e lego moetapele wa karolo e nngwe ya tikologo ya Jerusalema, o ile a lokiša leboto a le kgauswi le Malakiya le Hasishubi a na le barwedi ba gagwe.
13 Hanuni le badudi ba Tsanoa ba ile ba lokiša Keiti ya Moeding. Ba ile ba e aga leswa ke moka ba tsenya mejako ya yona le dipauto le dikota tša yona tša go tswalela mejako. Ba ile ba aga le leboto la dimithara tše e ka bago tše 450* leo le fihlago Keiting ya Dintotoma tša Melora.
14 Malakiya morwa wa Rekaba, e lego moetapele wa tikologo ya Bethe-hakerema, o ile a lokiša Keiti ya Dintotoma tša Melora. Ba e aga leswa, ba tsenya mejako ya yona, dipauto tša yona le dikota tša yona tša go tswalela mejako.
15 Shalune morwa wa Kolihose, e lego moetapele wa tikologo ya Mitsipa, a lokiša maboto a Keiti ya Sedibeng. O ile a e aga leswa, a e rulela, a tsenya mejako ya yona, dipauto le dikota tša yona tša go tswalela mejako. O ile a lokiša le leboto le Letangwana la Meetse kgauswi le Serapeng sa Kgoši. Leboto leo le be le fihla Ditepising tšeo di theogago tšeo di tšwago Motseng wa Dafida.
16 Ka morago ga moo Nehemia morwa wa Asibuki, e lego moetapele wa karolo e nngwe ya tikologo ya Bethe-tsuri, o ile a lokiša leboto a le kgauswi le Shalune go tloga ka pele ga Mabitla a Dafida,* go fihla letangwaneng leo le bego le agilwe le go fihla Ntlong ya Mašole.
17 Balefi ba ile ba lokiša leboto ba le kgauswi le Nehemia ba eteletšwe pele ke Rehuma morwa wa Bani, gomme Hashabia e lego moetapele wa karolo e nngwe ya tikologo ya Keila, a lokiša tikologo ya gabo a le kgauswi le Rehuma.
18 Balefi ba bangwe ba ile ba lokiša leboto ba le kgauswi le Hashabia, ba eteletšwe pele ke Bafai morwa wa Henadada, e lego moetapele wa karolo e nngwe ya tikologo ya Keila.
19 Esere morwa wa Jeshua, e lego moetapele wa Mitsipa, a lokiša karolo e nngwe ya leboto yeo e lego ka pele ga morotoga wo o yago diphilareng tša leboto mo go bolokelwago dibetša. O ile a lokiša leboto a le kgauswi le Bafai.
20 Baruke morwa wa Sabai o ile a lokiša leboto ka mafolofolo a le kgauswi le Esere, gomme a lokiša leboto karolong e nngwe yeo e tlogago Diphilareng tša Leboto go fihla mojakong wa ntlo ya moperisita yo a phagamego e lego Eliashiba.
21 Meremothe morwa wa Urija, e lego morwa wa Hakotse, o ile a lokiša karolo e nngwe ya leboto, yeo e tlogago mojakong wa ntlo ya Eliashiba go fihla mafelelong a yona. O ile a lokiša leboto a le kgauswi le Baruke.
22 Baperisita ba Tikologo ya Jorodane ba ile ba lokiša leboto ba le kgauswi le Meremothe.
23 Benjamini le Hasishubi bona ba ile ba lokiša leboto ka pele ga ntlo ya bona ba le kgauswi le baperisita. Ke moka Asaria morwa wa Maaseya, e lego morwa wa Ananiya, o ile a lokiša leboto kgauswi le ntlo ya gagwe a le kgauswi le Benjamini le Hasishubi.
24 Binui morwa wa Henadada o ile a lokiša karolo e nngwe ya leboto yeo e tlogago ntlong ya Asaria, go fihla Diphilareng tša Leboto le go fihla khoneng ya lona. O ile a lokiša leboto a le kgauswi le Asaria.
25 Palale morwa wa Usai a lokiša ka pele ga Diphilara tša Leboto le leboto le letelele leo le kgomaganego le Ntlo ya Kgoši, e lego moago wa ka godimo wa Lapa la Batho Bao ba Letago Motse. O ile a lokiša leboto a le kgauswi le Binui. Pedaya morwa wa Paroshe o ile a lokiša leboto a le kgauswi le Palale.
26 Ke moka, batho ba go hlankela ka tempeleng bao ba bego ba dula Ofele, bona ba ile ba lokiša leboto go fihla ka pele ga Keiti ya Meetse ka bohlabela, gotee le leboto le letelele leo karolo e nngwe ya lona e bego e feta maboto a mangwe.
27 Bathekoa bona ba ile ba lokiša karolo e nngwe ya leboto go tloga ka pele ga leboto le letelele, leo karolo e nngwe ya lona e bego e feta maboto a mangwe go fihla ka leboto la Ofele. Ba ile ba lokiša leboto ba le kgauswi le batho ba go hlankela ka tempeleng.
28 Baperisita ba lokiša karolo ya ka godimo ya leboto ya Keiti ya Dipere, gomme yo mongwe le yo mongwe wa bona a lokiša ka pele ga ntlo ya gagwe.
29 Tsadoko morwa wa Imere a lokiša leboto ka pele ga ntlo ya gagwe a le kgauswi le baperisita.
Ke moka Shemaya morwa wa Shekania, e lego yo a letago Keiti ya ka Bohlabela, a lokiša leboto a le kgauswi le Tsadoko.
30 Hanania morwa wa Shelemia le Hanuni morwa wa botshelela wa Tsalafa, ba lokiša karolo e nngwe ya leboto ba le kgauswi le Shemaya.
Ke moka Meshulama morwa wa Berekia a lokiša ka pele ga holo ya gagwe a le kgauswi le Hanania le Hanuni.
31 Malakiya e lego yo mongwe wa bao ba šomago ka gauta, o ile a lokiša go fihla ntlong ya batho bao ba šomago ka tempeleng le bao ba rekišago, ka pele ga Keiti ya go Lekola le go fihla ka khona ya phapoši ya ka godimo. O ile a lokiša leboto a le kgauswi le Meshulama.
32 Le gona batho ba go šoma ka gauta le ba go rekiša, ba lokiša leboto magareng ga khona ya phapoši ya ka godimo le Keiting ya Dinku.
Mengwalo ya tlase
^ Phetolelo ya lentšu ka lentšu e re, “dikubiti tše 1 000.”
^ Go bonagala lefelo le e le moo Dafida a boloketšwego gona, gomme ka morago gwa tla gwa bolokelwa dikgoši tše dingwe tša Juda.
