Batho ba bantšhi mo lefaseng ba kgetha go se je nama.

•   Go ya ka The Vegan Society ‘Batho bao ba kgethago go se je nama maphelong a bona ga ba dumelelane le gore diphoofolo di tlaišwe, e ka ba ka go di bolaya gore di dirišetšwe dijo, go diriša dikarolo tša tšona go dira diaparo goba dilo tše dingwe’.

 Go tlaleletša mo batho ba bangwe ba kgetha go se je nama e se fela ka lebaka la gore ba rata diphoofolo, eupša ba kgetha go se e je ka baka la bodumedi goba ka gobane ba nyaka go kaonefatša tikologo yeo ba dulago go yona le maphelo a bona.

•   Go ya ka Britannica Academic ‘Go kgetha go se je nama go fapana le mekgwa e mengwe ya go ja, ka gobane batho ba bantšhi ga ba je nama ka mabaka a go fapafapana a bjalo ka bodumedi, pono ya bona ka seo se lokilego le seo se sa lokago le go kaonefatša lefase.

 Na go kgetha go se je nama go ka rarolla mathata ka moka ao a lego mo lefaseng? Beibele e re’ng ka taba ye?

 Beibele e bontšha gore Mmopi wa rena, Jehofa Modimo, a o bona batho ba phagametše diphoofolo e bile o ba file matla a gore ba buše diphoofolo. (Genesi 1:27, 28) Modimo o ile a dumelela batho gore ba je diphoofolo. (Genesi 9:3) Lega go le bjalo ga a dumelele gore diphoofolo di tlaišwe.—Diema 12:10.

 Go ya ka Beibele go kgetha go se je nama ke phetho ya motho ka noši b Dikgetho tša rena ga di re dire batho ba ba kaone go Modimo. (1 Bakorinthe 8:8) Ga go na motho yo a swanetšego go swaya ba bangwe diphošo ka baka la dilo tšeo ba kgethago go di ja.—Baroma 14:3.

 Beibele e bontšha gore tsela yeo re kgethago go phela ka yona, e ka se rarolle mathata ao a lego mo lefaseng. Batho ba ka se kgone go rarolla mathata ao a re welago ka gobane bontšhi bja mathata a rena a bakwa ke dipolotiki, maemo a ekonomi le dilo tše dingwe gape tšeo re sa kgonego go di laola. Beibele e re:

•   “Tšeo di kgopamišitšwego di ka se otlollwe.”—Mmoledi 1:15.

 Mmopi wa rena o tlo fediša mathata ka moka ao re nago le ona. Beibele e diriša mantšu a seswantšhetšo ao a re botšago gore Mmopi wa rena o tlo dira eng.

•   “Ka bona legodimo le lefsa le lefase le lefsa; gobane legodimo la pele le lefase la pele di be di fetile, le lewatle ga le sa le gona.”—Kutollo 21:1.

 Mmušo wa Modimo o tlo tšeela legato mebušo ya batho, goba “legodimo la pele,” le tlo tšeelwa legato ke “legodimo le leswa,” leo e lego Mmušo wa gagwe wa legodimong. Mmušo wa gagwe o tlo tloša “lefase la pele,” goba batho ba babe ke moka wa buša ‘lefaseng le leswa’ goba wa buša batho bao ba ikemišeditšego go phela ka melao ya wona.

 Batho ba tlo ithuta go phedišana gabotse le diphoofolo le go kgonthišetša gore lefaseng go ba le khutšo ge fela go tla be go buša Mmušo wa Modimo.—Jesaya 11:6-9.