Na o ile wa welwa ke kotsi ya tlhago? Maemo a mabe a leratadima a tla ka ditsela tše dintši, tše bjalo ka madimo a magolo a go swana le di hurricane, typhoon, cyclone, le tornado ao a dirago gore go be le mafula le diphefo tše matla tšeo di senyago. Dipula tše dikgolo di baka go kgerega ga mmu le maswika, e bile madimo a dira gore go be le magadima ao a ka dirago gore go be le mello ya hlaga. Komelelo, maphoto a moya o fišago le madimo ao a bago gona marega, le ona a baka tshenyo e kgolo.

 Dikarolong tše dintši tša lefase, go na le dikotsi tša tlhago tšeo di diregago gantši e bile di baka tshenyo e kgolo kudu. Mokgatlo wa International Federation of Red Cross and Red Crescent Societies o bega gore: “Batho ba bantši ba tlaišega ka lebaka la dikotsi tša tlhago tšeo di diregago gantši, tše bjalo ka mafula, madimo le komelelo e bile di dira gore batho ba dimilione ba feleletše ba se na magae ngwaga o mongwe le o mongwe.”

 Dikotsi tše tša tlhago di tlogela batho ba bantši ba gobetše mmeleng e bile ba na le stress. Ba ka kwa bohloko ka nako e telele ka ge ba tla be ba lahlegetšwe ke dilo tša bona, dintlo tša bona goba ba hlokofaletšwe ke batho bao ba ba ratago.

 Beibele e ka go thuša go kgotlelela ge eba o ile wa welwa ke dikotsi tša tlhago ka gore e a kgothatša, e nea kholofelo e bile e na le keletšo e šomago yeo e ilego ya thuša batho ba bantši bao ba ilego ba welwa ke dikotsi tša tlhago. (Baroma 15:4) Le gona, e araba potšišo yeo batho ba ipotšišago yona ya gore: Ke ka baka la’ng Modimo a dumeletše se gore se direge—na o a re otla?

 Beibele e re ruta gore Modimo ga se yena a dirago gore batho ba tlaišege. E re “a ka se ke a lekwa ka dilo tše mpe le gona yena ga a leke motho le ge e le ofe.” (Jakobo. 1:13) Se se ra gore ga se yena a ikarabelago ka dikotsi tša tlhago tšeo re di bonago lehono.

 Ka Beibeleng re bala gore go na le dinako tšeo Modimo a ilego a diriša dikotsi tša tlhago go otla batho ba kgopo. Eupša dikotsi tšeo ga di swane le tša lehono ka gobane tša lehono, di wela batho ba lokilego gotee le ba sa lokago. Le gona, dipego tša Beibele di re botša gore Modimo o be a dula a šireletša batho bao ba lokilego, a nea temošo pele a ka otla ba kgopo e bile a hlalosa gore ke ka baka la’ng a ba otla. Ka mohlala, Modimo o ile a hlalosa gore ke ka lebaka la eng a tliša meetsefula mehleng ya Noa, a nea temošo pele a dira bjalo a ba a šireletša Noa le lapa la gagwe.—Genesi 6:13; 2 Petro 2:5.

 Gore o ithute ka mo go oketšegilego ka gore Modimo ga a ikarabele ka dikotsi tša tlhago, bala sehlogo seo se rego: “Modimo o Ikwa Bjang ka Dikotsi tša Tlhago?”

 Beibele e re botša gore Jehofa a o tshwenyega ka rena e bile o re kwela bohloko. Nagana ka ditemana tše di latelago tšeo di kgothatšago.

•   Jesaya 63:9: “Tlalelong ka moka ya bona [Modimo] le yena o be a tlalelwa.”

   Seo temana ye e se bolelago: Jehofa o kwa bohloko kudu ge batho ba tlaišega.

•   1 Petro 5:7: “O a le hlokomela.”

   Seo temana ye e se bolelago: Jehofa o na le taba le wena.

 Ka ge Jehofa a re hlokomela e bile a na le taba le rena, seo se dira gore a nyake go re thuša. O diriša Beibele gore a re homotše le go re nea keletšo e šomago, e bile o re tshepiša gore dikotsi tša tlhago di ka se sa ba gona nakong e tlago.—2 Bakorinthe 1:3, 4.

 Beibele e re botša gore Jehofa o tshepiša go re nea “bokamoso le kholofelo.” (Jeremia 29:11) O nyaka gore batho ba tle ba ipshine ka bophelo lefaseng la paradeise, e sego gore ba dule ba tšhogile gore ba tla welwa ke dikotsi tša tlhago.—Genesi 1:28; 2:15; Jesaya 32:18.

 Modimo o tlo re tlišetša bokamoso bjoo ka Mmušo wa gagwe wa legodimong wo o eteletšwego pele ke Jesu. (Mateo 6:10) Jesu o na le bohlale le matla a go fediša dikotsi tša tlhago. Ge Jesu a be a le mo lefaseng o ile a bontšha gore o na le matla a go laola maemo a leratadima. (Mareka 4:37-41) O tlo buša ka bohlale, e bile a ruta batho gore ba ka hlokomela bjang lefase. (Jesaya 11:2) Batho ba ka se sa tshwenywa ke dikotsi tša tlhago ka tlase ga pušo ya Jesu.

 O ka ba o ipotšiša gore, ‘Jesu o tlo diriša neng matla a gagwe go laola maemo a leratadima?’ Bala sehlogo seo se rego “Mmušo wa Modimo o tlo tla Neng mo Lefaseng?” Gore o hwetše karabo.

 Keletšo ya Beibele e ka go thuša pele kotsi ya tlhago e direga, nakong ya kotsi ya tlhago le ka morago ga kotsi ya tlhago.

•   Pele kotsi ya tlhago e direga: Dula o itokišitše.

   Seo Beibele e se bolelago: “Yo bohlale ke yo a bonego kotsi a ikuta, eupša ba se nago temogo ba fetile ba wela kotsing.”—Diema 22:3.

   Seo temana ye e se bolelago: Nagana ka dikotsi tša tlhago tšeo di ka diregago lefelong la geno ke moka o šireletše ba lapa la gago nako e sa le gona.

   Seo se ilego sa direga: Tamara yo a dulago California kua U.S.A o re: “Re be re itokišitše ge mollo wa hlaga o be o thoma gomme ra kgona go tšhaba. Re be re na le di-go bag, re pakile dihlare le diaparo. Batho ba be ba tšhogile e bile ba hlakahlakane. Eupša re ile ra leboga gore re be re na le dilo ka moka tšeo re bego re di hloka.”

•   Nakong ya kotsi ya tlhago: Tshwenyega ka dilo tše bohlokwa kudu.

   Seo Beibele e se bolelago: “Gaešita le ge motho a atetšwe ke dilo, fela bophelo bja gagwe ga bo tlišwe ke dilo tše a nago le tšona.”—Luka 12:15.

   Seo temana ye e se bolelago: Bophelo bo bohlokwa kudu go feta dilo tšeo re nago le tšona.

   Seo se ilego sa direga: Leslie wa kua Philippines o re: “Ge ledimo leo le bitšwago Lawin b le be le senya ntlo ya rena, ke be ke sa tsebe gore ke dire eng. Eupša selo feela seo ke ilego ka se dira ke go rapela Jehofa Modimo go tšwa pelong. Ke ile ka lemoga gore re no ba re lahlegetšwe ke dilo tšeo re bego re na le tšona, e sego maphelo a rena.

•   Ka morago ga kotsi ya tlhago: O se ke wa tshwenyega kudu.

   Seo Beibele e se bolelago: “Le ka mohla le se ke la belaela ka letšatši le le latelago, gobane letšatši le le latelago le tla ba le dipelaelo tša lona. Letšatši le lengwe le le lengwe le lekanwe ke bošula bja lona.”—Mateo 6:34.

   Seo temana ye e se bolelago: O se ke wa tshwenyega kudu ka dilo tšeo di ka diregago nakong e tlago.

   Seo se ilego sa direga: Sally wa go tšwa Florida kua U.S.A o re: “Ka morago ga gore ledimo leo le bitšwago Irma le senye ntlo ya rena, ke ile ka ba le stress ka gobane ke be ke swanetše go dira diphetho tše dintši. Ke ile ka theetša keletšo ya Beibele ya gore ke se ke ka tshwenyega kudu. Ke ile ka bona gore ge Jehofa a nthuša, ke kgona go kgotlelela dilo tše dintši go feta kamoo ke bego ke nagana ka gona.”

 Gore o hwetše ditsela tše dingwe tšeo di ka go thušago go kgotlelela, bala sehlogo seo se rego: “Megato Yeo e ka Phološago Maphelo-Ge go Eba le Kotsi.”