Ka July 2022, go begilwe gore lefaseng ka moka go fiša ka tsela yeo e sa tlwaelago:

•   “Kua China, ba mmušo ba tsebišitše badudi ba moo gore metse e ka bago e 70 e tla welwa ke phišo e kgolo kudu. Ba boletše taba ye gabedi kweding ye.”—July 25, 2022, CNN Wire Service.

•   “Ka ge Yuropa ka moka go fiša ka tsela yeo e sa tlwaelegago, seo se dira gore dinageng tše dintši go be le mello ya tlhaga yeo e šiišago.”—July 17, 2022, The Guardian.

•   “Ka Sontaga, ditoropong tše dintši tša kua United States go be go fiša tšhiritšhiri. Ka gona phišo yeo e ile ya fihla tikologong ya East Coast le dikarolong tša ka Borwa gotee le gare ga Bodikela bja naga yeo.”—July 24, 2022, The New York Times.

 Dilo tše ka moka di ra go re’ng? Na se se ra gore ge nako e dutše e eya lefaseng go ka se sa dula batho? Beibele e re’ng ka taba ye?

 Ee. Go fiša ka mo go feteletšego lefaseng ka moka ke e nngwe ya dilo tšeo Beibele e boletšego e sa le pele gore di tlo direga mehleng ya rena. Ka mohlala, Jesu o ile a bolela gore re tlo bona “dilo tše di boifišago.” (Luka 21:11) Go oketšega ga phišo yeo e lego gona lefaseng ka moka go dirile gore batho ba boife le go bona eka batho ba bangwe ba tla senya lefase.

 Aowa. Modimo o bopile lefase gore batho ba dule go lona go ya go ile. (Psalme 115:16; Mmoledi 1:4) A ka se dumelele batho ba senya lefase. Go e na le moo, o tshepiša gore o tlo “senya bao ba senyago lefase.”—Kutollo 11:18.

 Ekwa dilo tše pedi tšeo Modimo a boletšego e sa le pele gore o tlo di direla polanete ya lefase:

•   “Lešoka le tikologo e se nago meetse di tla hlalala gomme leganata le tla thaba la khukhuša go etša letšoba la safrona.” (Jesaya 35:1) Se se bontšha gore Modimo a ka se dumelele lefase le fetoga leganata leo le sa dulwego ke batho, go e na le moo o tlo le lokiša ka moka moo batho ba le sentšego.

•   “[Modimo] o hlokomela lefase, o le dira gore le tšweletše ka boati;O le humiša kudu.” (Psalme 65:9) Modimo o tlo dira lefase gore e be paradeise.

 E le gore o kwe ka mo go oketšegilego mabapi le kamoo go fetofetoga ga leratadima go phethagatšago boporofeta bja Beibele, bala sehlogo seo se rego, “Climate Change and Our Future—What the Bible Says.”

 E le gore o kwe taba yeo Beibele e re tshepišago yona ya gore lefase le tlo lokišwa, bala sehlogo seo se rego, “Who Will Save the Earth?”