Dikarogano tšeo di bakwago ke dipolotiki ke tlhobaboroko ditšhabeng lefaseng ka moka. Go ya ka nyakišišo ya Pew Research Center ya 2022, “diperesente tše 65 tša batho bao ba tšwago dinageng tše 19 tšeo nyakišišo e dirilwego go tšona, ba re go na le go se kwane, goba go se kwane o šoro kudu dinageng tša gabo bona magareng ga batho bao ba thekgago mekgatlo e fapanago ya dipolotiki.”

 Na o lemogile gore karogano yeo e bakwago ke dipolotiki e tšwela pele e gola lefelong leo o dulago go lona? Ke ka baka la eng go le ka tsela ye? Na go na le tharollo? Ela hloko seo Beibele e se bolelago.

 Beibele e boletše e sa le pele gore nakong ya rena, e lego “mehleng ya bofelo,” batho ba bantši ba be ba tlo ba le mekgwa yeo e dirago gore go ba le kwano go be thata.

•   “Mehleng ya bofelo go tla ba le dinako tše di hlobaetšago tšeo go lego thata go lebeletšana le tšona. Gobane batho e tla ba baithati, . . . ba ba sa ikemišetšago go amogela tumelelano le ge e le efe.”—2 Timotheo 3:1-3.

 Go sa šetšwe maiteko a mabotse a batho ba bantši, mmušo o sa dutše o palelwa ke go laola ka katlego. Ge batho ba sa swane ka dikgopolo, go ba thata e bile ka dinako tše dingwe, go šoma gotee go rarolla mathata ga go kgonege. Ditlamorago di tiišetša seo Beibele e se boletšego kgale.

•   “Motho o buša yo mongwe gore a mo gobatše.”—Mmoledi 8:9.

 Le ga go le bjalo Beibele e re botša gore tharollo ke eng—mmušo wo o etilwego pele ke motho yo a ka kgonago go tloša mathata ao a tshwenyago batho lehono.

 Beibele e bolela ka moetapele yo a swanelegago ka mo go kgethegilego: Jesu Kriste. Jesu o na le matla e bile o nyaka go tlišetša batho ka moka kwano le khutšo.

•   “Mehleng ya gagwe moloki o tla atlega, le khutšo e tla ata.”—Psalme 72:7.

•   “Ditšhaba ka moka . . . di tla mo hlankela.”—Psalme 72:11.

 Jesu ke moetapele yo a swanelegago ka baka la gore o kwela batho bohloko e bile o nyaka go ba thuša, kudukudu bao ba swerwego gampe.

•   “O tla hlakodiša modiidi yo a llelago thušo, le mohlaki gotee le mang le mang yo a se nago mothuši. O tla kwela mmotlana le modiidi bohloko, o tla phološa meoya ya badiidi. O tla lopolla moya wa bona kgatelelong le bošorong.”—Psalme 72:12-14.

 Ithute mo go oketšegilego ka Mmušo wa Modimo, pušo ya legodimong yeo moetapele wa yona e lego Jesu. Ithute gore o ka go hola bjang, le gore wena o ka o thekga bjang.

•   Bona bidio yeo e rego Mmušo wa Modimo ke Eng?

•   Bala sehlogo seo se rego, “Mmušo wa Modimo—Mmušo wo o se Nago Bomenetša.”