Mesong ya di 24 tša February 2022, mašole a Russia a ile a hlasela Ukraine le ge baetapele ba lefase ba ile ba leka go thibela seo. Ntwa ye e ka kgoma bjang lefase? Mongwaledi wa Ditšhaba tše di Kopanego goba UN yo a bitšwago António Guterres, o boletše gore: “Re tšhošwa ke tsela yeo ntwa ye e ka bakago mathata a magolo dinageng tša Yuropa le lefaseng ka moka.”

•   Jesu o boletše e sa le pele gore “setšhaba se tla tsogela setšhaba gomme mmušo wa tsogela mmušo.” (Mateo 24:7) E le gore o kgone go bona gore Beibele e bontšha gore dintwa tšeo re di bonago lehono di phethagatša boporofeta bja Jesu, bala sehlogo seo se rego: “Ke Dilo Dife Tšeo di Bontšhago Gore re Phela “Mehleng ya Bofelo,” Goba ‘Nakong ya Bofelo’?”

•   Lengwalo la Kutullo le swantšha ntwa le monamedi wa “pere ya mmala wa bohwibidu bja mollo” yo a tlošago “khutšo lefaseng.” (Kutollo 6:4) Bala sehlogo seo se rego: “The Four Horsemen—Who Are They?” gore o kwe kamoo boporofeta bjo bo sepedišanago le ntwa ka gona lehono.

•   Lengwalo la Daniele le boletše e sa le pele ka ntwa magareng ga “kgoši ya borwa” le “kgoši ya leboa.” (Daniele 11:25-45) Bogela bidio yeo e rego: Boporofeta bja Daniele Kgaolo 11, gore o kgone bona gore ke ka baka la’ng Russia le dinaga tšeo di e thekgago di bitšwago kgoši ya leboa. a

•   Lengwalo la Kutullo le bolela le ka ‘ntwa ya letšatši le legolo la Modimo Ramatlaohle.’ (Kutollo 16:14, 16) Eupša ntwa ye ga e swane le dintwa tšeo re di bonago lehono. Bala sehlogo seo se rego: “Ntwa ya Haramagedone ke Eng?” gore o kwe ka mo go oketšegilego ka ntwa ye ya nakong e tlago.

•   Beibele e re Modimo o tlo “fediša dintwa go fihla pheletšong ya lefase.” (Psalme 46:9) Bala sehlogo seo se rego: “A Real Hope for a Better Tomorrow” gore o ithute ka dilo tšeo Modimo a tshepišago go tlo re direla tšona nakong e tlago.

•   Jesu o rutile balatedi ba gagwe gore ba rapelele Mmušo wa Modimo gore o tle mo lefaseng. (Mateo 6:9, 10) Mmušo wa Modimo o tla dira gore thato ya Modimo e direge le gore go be le khutšo mo lefaseng. Bogela bidio yeo e rego Mmušo wa Modimo ke Eng? gore o ithute kamoo Mmušo woo o tlago go go hola ka gona.

 Kua Ukraine go na le Dihlatse tša Jehofa tše fetago 129 000. Dihlatse tšeo di ekiša Jesu ka go se tšee karolo ntweng le go se tšee lehlakore dipolotiking. (Johane 18:36) Dihlatse tša Jehofa lefaseng ka moka di tšwela pele go bolela “ditaba tše dibotse tša Mmušo” le go ruta batho gore Modimo o tlo fediša mathata a bona go akaretša le dintwa. (Mateo 24:14) Re go kgothaletša gore o ikopanye le rena gore o ithute ka dilo tšeo Modimo a re tshepišago tšona ka Beibeleng.