Ka morago ga dibeke tše sego kae, go tla be go na le dikgetho dinageng tša go se swane lefaseng ka moka. Batho ba dira diphetho tše bohlokwa tša gore ba tlo kgetha moetapele ofe.

 Beibele e Re’ng?

 Beibele e re botša gore baetapele ba batho ga ba kgone go dira dilo ka moka.

•   “Le se ke la bota bakgomana, goba la bota ngwana wa motho wa lefaseng, ka ge a sa kgone go phološa. Moya wa gagwe o a tšwa, yena a boela mmung; Letšatšing leo menagano ya gagwe e a fela.”—Psalme 146:3, 4.

 Le baetapele bao ba kgonago go dira dilo gabotse, mafelelong ba tlo hlokofala. Le gona, ga ba tsebe ge e ba batho bao ba tlago go buša ka morago ga bona ba tlo dira dilo tše dibotse go swana le bona.—Mmoledi 2:18, 19.

 Beibele e bontšha gore batho ga se ba bopelwa gore ba ipuše.

•   “Ga go matleng a motho yo a sepelago gore a laole dikgato tša gagwe.”—Jeremia 10:23.

 Na go na le motho yo mongwe yo a ka kgonago go buša batho gabotse lehono?

 Beibele e re Modimo o kgethile moetapele yo a kgonago go buša le yo a tshepegago, e lego Jesu Kriste. (Psalme 2:6) Jesu ke Kgoši ya Mmušo wa Modimo wo o bušago o le legodimong.—Mateo 6:10.

 Na o tla kgetha gore Jesu e be moetapele wa gago? Beibele e re botša gore ke ka baka la eng potšišo ye e le bohlokwa:

•   “Atlang morwa [Jesu Kriste], gore Modimo a se tuke bogale le se tlo hwelela tseleng, gobane bogale bja gagwe bo tuka gabonolo. Go thaba bohle bao ba tšhabelago go yena.”—Psalme 2:12.

 Go na bjale ke nako ya gore o dire phetho ya gore o kgetha moetapele ofe. Boporofeta bja Beibele bo bontšha gore Jesu o thomile go buša ka 1914 le gore e se kgale Mmušo wa Modimo o tlo tšeela mebušo ka moka ya batho legato—Daniele 2:44.

 E le gore o kwe ka mo go oketšegilego gore o ka dira eng gore o kgethe Jesu gore e be moetapele wa gago, bala sehlogo seo se rego, “Kgetha go Thekga Mmušo wa Modimo Gona Bjale!”