Ka 1945 ge ntwa ya bobedi ya lefase e fela, naga ya Germany e ile ya šala e senyegile kudu. Ditoropo di be di sentšwe, dikolo di be di se na batho, dipetlele di sa dirišwe, e bile dipomo di be tletše gohle. Go oketša moo, ka ge go be go se na dijo tše di lekanago, dijo di be di tura kudu. Ka mohlala, batho bao ba bego ba rekiša dijo ka tsela e sego molaong, ba be ba rekiša potoro ya dikrama tše 500 ka tšhelete e lekanago mogolo wa dibeke tše tshela!

Gare ga batho bao go be go na le Dihlatse tša Jehofa tše dintši tšeo di bego di le kgolegong le mafelong a go tlaiša batho ka baka la tumelo ya tšona. Ka 1945, di ile tša lokollwa di se na selo ge e se diaparo tšeo di bego di di apere ge di be di le kgolegong. Dihlatse tše dingwe le tšona di be di lahlegetšwe ke magae a tšona le dilo tšeo di bego di na le tšona. Ba bangwe ba be ba swara ke tlala kudu moo ba bego ba idibala ge ba le dibokeng.

Dihlatse tša Jehofa tšeo di tšwago dinageng tše dingwe, di ile tša thuša dihlatse tša kua Germany ka dijo le diaparo ka pelapela. Bana ba borena bao ba bego ba le ntlongkgolo ya Dihlatse tša Jehofa kua United States, ba ile ba kgopela ofisi ya lekala toropong ya Bern kua Switzerland, gore ba thuše bana babo bona ba kua Germany. Nathan H. Knorr, yo e bego ele moemedi wa ntlokgolo ya Dihlatse tša Jehofa, o ile a etela Yuropa gore a ye go hloma komiti ya tlhakodišo le go thuša gore e thome go šoma ka pelapela.

Dihlatse tše Jehofa tša kua Switzerland di ile tša neelana ka dijo, diaparo le tšhelete. Dilo tšeo di ile tša išwa toropong ya Bern, moo di ilego tša beakanywa gabotse ke moka tša išwa Germany. Dihlatse tša Jehofa tša go tšwa dinageng tše dingwe tša go swana le Sweden, Canada, le United States, di ile tša thuša ka modiro wa tlhakodišo. Dilo tšeo ba ilego ba thuša ka tšona, ga se tša thuša Dihlatse tša Germany feela eupša di ile tša thuša le Dihlatse tša dinaga tše dingwe tše dintši kua Yuropa le Asia tšeo di bego di na le dintwa.

Ka morago ga dikgwedi tše sego kae, ofisi ya lekala ya kua Switzerland, e ile ya romela kofi, maswi, swikiri, dienywa tše di omišitšwego, merogo, nama le hlapi tšeo di lego ka gare ga dithini le tše dingwe. E bile ba ile ba neela le ka tšhelete.

Go oketša moo Dihlatse tša kua Switzerland di rometše diaparo tša boima bjo bo fetago dikhilokrama tše 5000, tšeo di akaretšago dijase, diaparo tša basadi le disutu tša banna. Morokami wa January 15, 1946, o ile wa bolela gore: “Bana babo rena ba dirile sohle seo ba ka se kgonago. Ba ile ba ikgafa gore ba thuše bana babo bona ba kua Germany.”

Dihlatse tša Jehofa tša kua Switzerland di ile tša neelana le ka dieta tšeo di bego di ka lekana batho ba 1000, eupša pele di romelwa moo di ile tša thoma ka go lebelelwa go bona ge e ba di se tša senyega. Bana babo rena le dikgaetšedi ba kua Wiesbaden, Germany, ba ile ba makala kudu ge ba bona dilo tša go tia tšeo ba bego ba di pakolla. Hlatse e nngwe e ile ya bolela gore: “Ga se gantši o ka hwetša lebenkele la go rekiša dieta tša go tia go swana le tše mo Germany.”

Bana babo rena ba kua Germany ba ile ba romelwa dilo tšeo ba bego ba di hloka go fihla ka August 1948. Dihlatse tša Jehofa tša kua Switzerland di ile tša romela Dihlatse tša kua Germany mapokisi 444 a dilo tšeo ba bego ba di hloka a boima bjo bo fetago dikgilokrama tše 25000. Ka ge re boletše, ga se Dihlatse tša Jehofa tša kua Switzerland feela tšeo di ilego tša thuša modirong wa tlhakodišo eupša ba be ba le gare ga dihlopha tše dinyenyane tšeo di bego di thuša. Ka nako yeo kua Switzerland, go be go na le Dihlatse tša Jehofa tše 1600 feela!

Jesu Kriste o itše: “Bohle ba tla tseba ka se gore le barutiwa ba ka, ge e ba le ratana.” (Johane 13:34, 35) Dihlase tša Jehofa di ile tša neelana ka sohle seo di bego di na le sona ka baka la lerato. (2 Bakorinthe 8:1-4) Lengwalo leo le tšwago Zurich le boletše gore “bana babo rena ba bantši bao ba bego ba se na dilo tšeo ba bego ba ka neelana ka tšona, ba ile ba neelana ka tšhelete.

Dihlatse tša Jehofa tša kua Germany tšeo di bego di le moo go tlaišwago batho le dikgolegong, di ile tša hwetša thušo yeo e ilego ya di hola. Seo se ile sa kgonega ka gobane Bakristegotee le bona ba ile ba ba bontšha gore ba a ba rata gomme ba ba thuša.