Ka di-21 tša October, 1940, mmušo wa New Zealand o ile wa latofatša Dihlatse tša Jehofa gore ke mokgatlo woo o lego kotsi setšhabeng. Tatofatšo yeo le ge e ile ya bakela Dihlatse tša Jehofa mathata, ga se ya ka ya di nyamiša. Ka mohlala, di ile tša tšwela pele di bokana gotee le ge di be di be di le kotsing ya go hlaselwa le go golegwa.

Andy Clarke, yoo e sego Hlatse ta Jehofa, o ile a lemoga gore mosadi wa gagwe Mary yoo e lego Hlatse ya Jehofa o tšwela pele a eya dibokeng le ge Dihlatse tša Jehofa di tšhošetšwa. O be a tšhogile gomme a bona eka mosadi wa gagwe o tla išwa kgolegong a sa le dibokeng. Le ge monna wa Mary a be a sa ke a eya dibokeng, o ile a thoma go felesetša Mary dibokeng, gomme a mmotša gore, “Ge mašole a ka go golega a tlo swanelwa ke gore a golege le nna!” Ga e sa le go tloga ka nako yeo, Andy o ile a thoma go ya dibokeng. Ge nako e dutše e eya o ile a kolobetšwa gore e be yo mongwe wa Dihlatse tša Jehofa. Le ge Dihlatse tša Jehofa tša kua New Zealand di be di tlaišwa nakong ya Ntwa ya Bobedi ya Lefase, batho ba bantši ba go swana le Mary ba ile ba ikemišetša go dula ba botegela Jehofa.

Ka letšatši le lengwe, mašole a ile a golega ngwanabo rena John Murray yoo a bego a na le mengwaga e 78 ge a be a bolela ditaba tše dibotse ka ntlo le ntlo. Kgoro ya tsheko e ile ya mo latofatša ka gore o be a dira modiro wa mokgatlo woo o lego kotsi setšhabeng. Dihlatse tša Jehofa tše dingwe tše dintši di ile tša išwa dikgorong tša tsheko, gomme tše dingwe tša patedišwa tšhelete mola tše dingwe di ile tša golegiwa ka dikgwedi tša ka tlase ga tše tharo.

Ka ge Dihlatse tša Jehofa di be di hlompha melao ya Modimo, di ile tša gana go tsenela bošole. (Jesaya 2:4) Ka gona Dihlatse tše dintši tšeo di bego di gapeletšwa go tsenela bošole nakong ya ntwa di ile tša gana gomme seo sa dira gore di welwe ke mathata a mantši kudu. Dihlatse tša Jehofa tše e ka bago 80 tšeo di ilego tša gana go tsenela bošole, di ile tša išwa dikampeng tšeo go tlaišwago batho nakong ya ntwa. Bana babo rena ba ile ba tšwela pele ba hlankela Jehofa ba thabile kudu le ge ba be ba sa swarwe gabotse goba go tonya kudu.

Dihlatse tša Jehofa tšeo di bego di le dikampeng tšeo go tlaišwago batho di ile tša rulaganya gore di be le diboka le go botša batho ba bangwe ditaba tše dibotse ka mehla. Di be di dira dilo go swana le kamoo di dirwago Holong ya Mmušo, ka go swara diboka ka mehla le go rulaganya kamoo di ka botšago ba batho bao ba lego dikampeng ditaba tše dibotse. Dihlatse tša Jehofa di ile tša dumelelwa le gore di be le dikopano tša tikologo dikamkapeng tše dingwe gomme tša newa le lešole la go di hlokomela. Batho ba bangwe bao ba bego ba le dikampeng ba ile ba ithuta Beibele gomme ba kolobetšwa moo.

Bruce yoo e lego morwa wa mafelelo wa Mary le Andy bao re boletšego ka bona pejana, o ile a bona go išwa kampeng yeo go tlaišwa batho e le nako e botse ya gore a ithute ka Modimo. Bruce o re: “Go be go no swana le ge ke be ke le sekolong ka gobane ke be ke kgona go boledišana le bana bešo bao e bego e lego kgale ka phuthegong gomme ka ithuta se sengwe go bona.”

Ka 1944, mmušo o ile wa boledišana gore ba bangwe bao ba lego dikampeng tšeo go tlaišwago batho ba swanetše go lokollwa. Eupša baetapele ba mašole ba ile ba se dumele seo ka gobane ba be ba nagana gore Dihlatse tša Jehofa di be di tlo tšwelapele di ruta batho ka ditumelo tša tšona. Pego e nngwe e itše: “Le ge Mmušo o ka tšwela pele o golega Dihlatse tša Jehofa, wa di thibela go bolela ditaba tše dibotse le go hlankela Modimo wa tšona, o be o ka se kgone go fetoša monagano wa tšona.”

Le ge Dihlatse tša Jehofa di be de thibetšwe gore di se botše batho ditaba tše dibotse, batho ba bangwe ba be ba nyaka go tseba ka mo go oketšegilego ka tšona. Ge nako e dutše e eya, batho ba bantši ba ile ba lemoga gore molaetša wa tšona o be o hola batho e sego go ba gobatša. Batho bao ba ile ba lemoga gore Dihlatse tša Jehofa ke Bakriste bao ba sego kotsi le bao ba nago le Khutšo. Mafelelong, palo ya Dihlatse tša Jehofa tša kua New Zealand e ile ya oketšega. Ka 1939, Dihlatse tša moo e be e le tše 320 gomme ka 1945 ya ba tše 536!

Ka dinako tše dingwe, baetapele ba mmušo ba be ba lemoga gore taba ya gore Modiro wa Dihlatse tša Jehofa o thibetšwe e be e sa kwagale. Ka morago ga gore moahlodi yo mongwe a kwe gore ke ka baka la eng ngwanabo rena yo mongwe a be a golegilwe, o ile a fediša molato wa gagwe. O itše: “Ga ke kwešiše gore ke ka baka la eng batho ba bangwe ba bonwa molato wa gore ba fa batho ba bangwe Dibeibele. Le gona go ya ka molao, taba ye ga se ya dumelelwa.”

Ka morago ga ntwa, mmušo o ile wa se sa thibela Dihlatse tša Jehofa gore di bolele ditaba tše dibotse. Ke moka Dihlatse tša Jehofa di ile tša ikemišetša go botša baagišane ba tšona ka Mmušo wa Modimo. Ka 1945, ofisi ya lekala e ile ya romela lengwalo go diphuthego ka moka tša kua New Zealand, leo le rego: “Eka yo mongwe le yo mongwe wa lena a ka naganela batho ba bangwe, a ba le bogwera le go ba bontšha botho. Le se ke la baka mpherefere le tshele. Re swanetše go gopola gore batho bao re kopanago le bona ba na le madumedi a bona le gore ba leka ka thata go phela ka go dumelelana le seo ba se rutwago . . . Bontši bja bona ke ‘dinku’ tša Morena tšeo re swanetšego go di thuša gore e be Dihlatse tša Jehofa le gore ba tsebe ka mmušo wa Modimo.”

Lehono Dihlatse tša Jehofa tša kua New Zealand di sa tšwelapele di botša batho ba moo ditaba tše dibotse le go botša batho bao ba etelago moo. Ka letšatši le lengwe, dikgaetšedi tše nne tšeo di tšwago kua Turangi di ile tša botša batho ba 67 bao ba tšwago dinageng tše 17 ditaba tše dibotse ka diiri tše sego kae feela!

Go molaleng gore batho ba kua New Zealand ba ile ba lemoga gore Dihlatse tša Jehofa ke batho bao ba nago le khutšo le gore ba phela ka go dumelelana le seo ba ithutago sona ka Beibeleng. Le gona nageng yeo batho ba bantši ba kolobetšwa ngwaga le ngwaga gore e be Dihlatse tša Jehofa. Ga e sa le go tloga ka 2019, Dihlatse tša Jehofa tše fetago 14 000 di ipshina ka go hlankela Jehofa nageng yeo.