Go Thopa—Dibaki tša Gona tša Motheo

GO THOPA go fetogile tlaišo ya mehleng yeno. Go fo swana le go bolaya, go kata, bohodu, go hlaselwa ga bana ka kopano ya botona le botshadi gaešita le polao ya molokwana-rite. Ke ka baka la’ng bophelo bo fetogile bjo kotsi gakaakaa mo e lego gore gantši batho ba boifa go leka go tšwa ka magaeng a bona bošego?

Dibaki tša motheo tša leuba le la tiro ya bosenyi go akaretša le go thopa, di kgokagane le diphošo tšeo di tsemilego medu tšeo di lego mo lekokong la batho. Na o ile wa lemoga gore Beibele e boletše e sa le pele ka mehla ye e kotsi mo e nyakilego go ba nywaga e 2 000 e fetilego? Hle ela hloko seo se ilego sa bolelwa e sa le pele go 2 Timotheo 3:2-5.

“Batho e tlo ba ba xo ithata, ba mexabaru, ba lenyatšô le baikxoxomoši, le ba maroxa, le ba xo se kwe batswadi, ba xo se leboxe, ba xo se ile selô. E tlo ba ba-hlala-leratô, babata-sekxoro, e tlo ba dihwirihwiri, le ba ba sa tsebexo xo ithswara, manaba a tše boló; E tlo ba baeki, baipuši, baikxanthši, ba xo iphsina ba lahlile Modimo. Xe O ba bôna, O tlo re ba n’e borapedi; anthe matla a byôna xa ba a dumele.”

Mohlomongwe o a dumela gore mantšu a ao a ngwadilwego nakong e telele e fetilego a hlalosa boemo bja lehono ka mo go feletšego. Mo bophelong bja rena diphošo tšeo di senyago mo lekokong la batho di tšweletše ka tekanyo e kgolo. Ka mo go lemogegago, tlhaloso yeo e lego ka mo godimo ya boitshwaro bja batho bjo bo nyamišago e bula ka Beibeleng ka mantšu a rego: “Mehleng ya bofêlô xo tlo tla mabaka a mathata.” (2 Timotheo 3:1, mongwalo o sekamego ke wa rena.) Anke re eleng hloko tše tharo feela tša diphošo tše dikgolo tša setšhaba tšeo di tsentšhitšego letsogo leubeng la go thopa.

Mathata Mabapi le go Phethwa ga Molao

“Pelo tša bana ba batho di tlala xo dira bobe, ka xe xò diêxa kôtlô ye e ahloletšwexo disenyi.”—Mmoledi 8:11.

Maphodisa a mantši ga a na ditlabakelo tša go lebeletšana le leuba la tiro ya bosenyi. Ka gona, dinageng tše dintši go thopa ke bosenyi bjo bo nyakago ditshenyagalelo tše dintši. Ka 1996, go ile gwa sekišwa bonyenyane 2 lekgolong ya bathopi ka moka ba Colombia. Mexico, ka 1997 go ile gwa lefša tšhelete ya tefo ya bonyenyane bja diranta tše dimilione tše dikete tše 1,2. Bathopi ba bangwe Philippines ba ile ba ba ba dumela go swarelwa tefo ya topollo.

Go oketša moo, tshenyo mešomong ya tša go phethwa ga molao ka dinako tše dingwe e thibela go lwantšhwa ga bosenyi ka mo go nago le bokgoni. Baetapele ba dihlopha tša bahlomphegi bao ba lwantšhanago le go thopa ba Mexico, Colombia le go  tšeo e kilego ya ba direpabliki tša Soviet bona ka bobona ba ile ba pharwa molato wa go thopa. Ka makasineng wa Asiaweek, mopresidente wa Senate sa Philippine e lego Blas Ople o bolela gore dipalo-palo tša semmušo di bontšha gore 52 lekgolong ya go thopa mo go diregilego Philippines di akaretša maphodisa goba mašole ao a šomago goba ao a rotšego modiro. Mothopi yo a nago le botumo bjo bobe wa Mexico go thwe o be a šireleditšwe ke “leboto la tšhireletšo ya mmušo leo le tiišitšwego kudu ke letsogo le kobong go maphodisa le batšhotšhisi ba mmasepala le ba mmušo.”

Go Hloka Toka Bodiiding le go tša Leago

“Ka buša ka bôna mehlakô ka moka e hlakišaxo batho fá tlase xa letšatši. Ka bôna mexôkxô ya bahlaki, bà se n’e mohomotši. Ka bôna bahlakiši ba bôná bà na le matla.”—Mmoledi 4:1.

Batho ba bantši lehono ba tlalelong ya maemo a tša boiphedišo le a tša leago gomme gantši ke bona bao ba dirago ditiro tša go thopa. Ka gona lefaseng leo sekgoba magareng ga bahumi le badiidi se golago ka mo go tšwelago pele le moo dikgonagalo tša go hwetša tšhelete ka tsela e botegago e lego tše sego kae, go thopa go tla tšwela pele e le teko. Ge feela go dutše go na le kgatelelo, go thopa e tla ba mokgwa wa go itefeletša le go lebiša tlhokomelo go seo se lebelelwago e le maemo ao go sego bonolo go a kgotlelela.

Megabaru le go Hloka Lerato

“Mexabaru ké wôna modu wa bobe ka moka.” (1 Timotheo 6:10) “Xomme ka xo ata [ga] makxôpô xo tlo nôtlêxa leratô la ba bantši.”—Mateo 24:12.

Historing ka moka lerato la go rata tšhelete le dirile gore batho ba dire dilo tše mpe tšeo di boifišago. E bile mohlomongwe ga go na bosenyi bjo bongwe bjo bo bapatšago tlalelo ya batho, manyami le go hloka kholofelo ka tekanyo e swanago le go thopa. Go batho ba bantši ke megabaru—lerato la tšhelete—leo le ba hlohleletšago go tlaiša le go hlokofatša motho yo ba sa mo tsebego le go tlaiša lapa labo o šoro mo e ka bago dibeke, dikgwedi goba mohlomongwe le nywaga.

Ke mo go bonagalago gore go na le selo seo se fošagetšego kudu ka setšhaba seo se phegeletšego tšhelete le go gatakela ditekanyetšo tša boitshwaro tša batho ka maoto. Ka ntle le pelaelo, boemo bjo bo nea motheo wo o tšweletšago mehuta ka moka ya ditiro tša bosenyi, go akaretša le go thopa.

Na se se bolela gore re go seo Beibele e se bitšago ‘mehla ya bofelo’? Ge e ba go le bjalo, se se tla bolela’ng go lefase le go rena? Na go na le tharollo ya mathata a šiišago ao batho ba lebeletšanego le ona, go akaretša go thopa?

[Lepokisi/Seswantšho go letlakala 24]

Ga go na Selo se Sefsa

Molao wa Moše o ile wa phetha kotlo ya polao go bathopi morago kua lekgolong la bo-15 la nywaga B.C.E. (Doiteronomio 24:7) Julius Caesar o ile a thopša lekgolong la pele la nywaga B.C.E bakeng sa tefo ya topollo, go fo swana le Richard I Monna wa Sebete, kgoši ya Engelane lekgolong la bo-12 la nywaga C.E. Tefo ya topollo e phagamego kudu yeo e kilego ya lefša e be e le ya ditone tše 24 tša gauta le silifera tšeo Incas a ilego a di nea mofenyi wa Sepania e lego Francisco Pizarro gore a lokolle kgoši ya bona Atahuallpa yo a bego a thopilwe ka 1533. Lega go le bjalo, bafenyi ba ile ba mo kgama ba mmolaya.

[Seswantšho go letlakala 25]

Go sa šetšwe ditlabakelo tša maphodisa, go thopa go atile