Dibopego tše di Fetogilego tša Bahlaselwa ba Ntwa

LENANEO leo le gašwago ke Radio ya UN la “Perspective” le begile gore: “Dintwa tša lehono di fapane le tša nakong e fetilego . . . Ke badudi ba tlwaelegilego, go e na le mašole,” bao e lego bahlaselwa bao ba oketšegago. Ka mohlala, nakong ya ntwa ya pele ya lefase, ke feela ba 5 lekgolong ba bahlaselwa ka moka bao e bego e le baagi bao e sego bahlabani. Lega go le bjalo, nakong ya ntwa ya bobedi ya lefase, palo ya bahlaselwa bao e lego badudi e ile ya oketšega go fihla go 48 lekgolong. Radio ya UN e bolela gore le lehono, “mo e nyakilego go ba bahlaselwa ka moka dintweng ke badudi bao e sego bahlabani—90%—e bile bontši bja bona ke basadi, bana le bao ba tšofetšego.”

Go ya ka Olara Otunnu, yo e lego mongwaledi-pharephare wa UN wa Baemedi ba Kgethegilego Bakeng sa Bana le Ntwa ya Dibetša, “bana bao ba akanyetšwago go dimilione tše pedi ba ile ba bolawa maemong a ntwa ya dibetša ga e sa le go tloga ka 1987.” Seo se tlaleletša go palo ya bahlaselwa ba ntwa bao e lego bana ba fetago 450 ka letšatši nywageng e fetago e 12 e fetilego! Go oketša moo, nakong yona yeo bana ba fetago dimilione tše tshela ba ile ba gobatšwa o šoro goba go golofalela sa ruri.

Mna. Otunnu o ile a šišinya gore, tsela e nngwe yeo UN e ka lwantšhago palo e golago ya bahlaselwa ba ntwa ba e lego bana ke ka go hlama mafelo a khutšo. “Mafelo ao bana ba atilego go wona, bjalo ka dikolo, dipetlele le mabala a dipapadi a swanetše go lebelelwa bjalo ka mafelo ao e sego a ntwa.” Lega go le bjalo, Radio ya UN e okeditše ka gore, “go thibela ntwa di sa tloga fase” ke tsela e atlegago kudu bakeng sa gore UN e kgonthišetše gore badudi ba tlwaelegilego ba se ke ba ba bahlaselwa ba ntwa. Ge e le gabotse, go fediša bahlaselwa ba ntwa ruri go nyaka gore ntwa ka boyona e fedišwe. Na seo se tla ka sa direga?

Ka baka la pego ya batho e telele ya ntwa, batho ba bantši ba nagana ka mo go nepagetšego gore batho le ka mohla ba ka se tliše khutšo ya lefase ka bophara. Lega go le bjalo, Lentšu la Modimo, Beibele le holofetša gore Jehofa Modimo o tla dira bjalo: “Mo-fediša-dintwa xo fihla mafelong a lefase.” (Psalme 46:9) Na se se tla direga neng? Le gona ke ka baka la’ng o ka kgonthišega gore kholofetšo ya Modimo ya khutšo ya lefase ka bophara e tla direga? Ge e ba o tla rata go hwetša dikarabo tša dipotšišo tše, hle ngwalela bagatiši ba makasine wo, o diriša aterese ya kgaufsi yeo e lokeleditšwego go letlakala 5 la makasine wo, goba o etele Holong ya Mmušo ya Dihlatse tša Jehofa yeo e lego kgaufsi le wena. Ga go na maemo a tlamago e bile ga go na tefo—e fo ba dikarabo tše di opago kgomo lenaka.

[Mothopo wa Seswantšho go letlakala 12]

UN PHOTO 156450/J. Isaac