Na ke tše Kotsi Kudu e le ka Kgonthe?

BJALO ka ge re bone, Internet e dirile gore diswantšho tšeo di kgothaletšago bootswa di hwetšagale gabonolo go bobedi batho ba bagolo le bana. Na o swanetše go tshwenyega? Na diswantšho tšeo di kgothaletšago bootswa ke tše kotsi e le ka kgonthe?

Ba bantši ba nagana gore go kgokagana ka sewelo le diswantšho tšeo di kgothaletšago bootswa ga go kotsi. Lega go le bjalo, ditherešo di bontšha se se fapanego. Nagana ka taba ya banyalani bao ba bego ba bonala ba na le lenyalo le lebotse. Ba be ba eme gabotse ka tša ditšhelete, e bile ba rata go tšea maeto. Bagwera ba bona ba be ba nagana ka bona e le ba batamelegago, ba lerato le ba ikgafago gomme ba be ba le bjalo ka ditsela tše dintši.

Lega go le bjalo, mathata a ile a rotoga ge monna a be a thoma go lebelela diswantšho tšeo di kgothaletšago bootswa. Ge a ngwalela mongwadi wa tša keletšo yo a tumilego wa dikarolo tša kuranta, mosadi wa gagwe yo a tshwenyegilego o ile a hlalosa go tshwenyega ga gagwe ka gore: “Ge [monna wa-ka] la mathomo a be a thoma go fetša nako e ntši go computer bošego-gare le ka mahuba, o ile a mpotša gore e be e le ‘nyakišišo.’ Mesong e mengwe ke ile ka mo khukhunetša gomme ka mo hwetša a lebeletše [diswantšho tšeo di kgothaletšago bootswa] . . . O ile a re e be e le feela go rata go tseba. Ge ke be ke lebeledišiša seo a bego a se bogetše, ke ile ka šulafalelwa. O be a hlabilwe ke dihlong gomme a holofetša go kgaotša, gomme ka dumela gore o be a tiišitše. Ka mehla o bile yo a hlomphegago—monna yo a phelelago lentšu la gagwe.”

Go swana le monna yo, ba bantši mathomong e ba ba akaretšwago diswantšhong tšeo di kgothaletšago bootswa ka baka la go rata go  tseba. E le ge ba tshwenyega bakeng sa go phema go hwetšwa, ba e diriša bošego kudu goba ka mahuba a banna. Ge e ba ba tanywa, gantši ba leka go uta seo ba se dirago ka go bolela maaka, go etša ge monna yo a dirile. Na motho le ge e le ofe a ka bolela ka tlhaologanyo gore “setloša-bodutu” seo se dirago gore “monna yo a phelelago lentšu la gagwe” a nanabele bošego-gare le go fora baratiwa ba gagwe ga se kotsi?

Mokgwa wo o ka lebiša mathateng a magolo a motho ka noši le a lapa. Ba bangwe ba dumetše gore go bogela diswantšho tšeo di kgothaletšago bootswa go ba thibetše gore ba se ke ba hlagolela ditswalano tša kgaufsi le ba bangwe. Ga ba nyake batho mo kgaufsi ge ba dutše ba nweletša kganyogo ya bona diswantšhong tšeo di kgothaletšago bootswa. Batho ba lebiša tlhokomelo boikgopolelong ge ba bogela diswantšho tšeo di kgothaletšago bootswa gomme boikgopolelo ga bo hlame motho gore a hlagolele ditswalano tše tiilego goba go lebeletšana le bophelo lefaseng la kgonthe. Na setloša-bodutu seo se aroganyago batho le bao ba tshwenyegago kudu ka bona e ka ba seo se sego kotsi e le ka kgonthe?

Maemong a mangwe batho bao ba lebelelago goba bao ba balago taba ya diswantšho tšeo di kgothaletšago bootswa ba ba gape le mathata a go thabela dikopano tše tlwaelegilego tša botona le botshadi le balekane ba bona. Gore o kwešiše lebaka, ela hloko morero wa pele wa Modimo bakeng sa batho ba nyalanego. O neile banna le basadi ka lerato bokgoni bja go nea pontšho e thabišago ya lerato la bona go yo mongwe le yo mongwe ka dikopano tše hlomphegago tša botona le botshadi. Diema 5:18, 19 e bontšha gore tše di be di reretšwe go ba tše thabišago ka gore: “O thabêlê moxatš’axo wa mehla yela Ò sa le yo mofsa . . . A nkê O fêlê O kxôlwa ke botse bya xaxwe; O fêlê O thabêla ’ratô la xaxwe.”—Mongwalo o sekamego ke wa rena.

Ela hloko gore lerato e be e swanetše go ba motheo wa dikopano tša botona le botshadi. Na motho yo a lebelelago diswantšho tšeo di kgothaletšago bootswa o hlagolela tlemo e borutho ya lerato le bogwera bja kgaufsi? Aowa, o kgotsofatša dikganyogo tša gagwe ka noši tša dikopano tša botona le botshadi—mabakeng a mantši, a le noši. Monna yo a nyetšego yo a lebelelago diswantšho tšeo di kgothaletšago bootswa a ka thoma go lebelela molekane wa gagwe bjalo ka sedirišwa feela—motho yo a lego gona feela bakeng sa go ithabiša. Se se fapana kudu le seriti le kgodišo tšeo Mmopi a reretšego banna gore ba di nee basadi. (1 Petro 3:7) Na mokgwa wo o šitišago dibopego tša bogwera bja kgaufsi kudu tša lenyalo o ka lebelelwa e le o kgahlišago?

Go feta moo, seo se ka bago se be se reretšwe go ba go nwelela ga sewelo se ka lebiša temalelong ya lebaka le letelele. Mongwadi yo mongwe o re: “Go fo swana le ge balemaledi ba dihlare-tagi ba nyaka dihlare-tagi tše matla gore ba ‘tagwe,’ badiriši ba diswantšho tšeo di kgothaletšago bootswa ba swanetše go ba le phihlelo e kgolo kudu ya go fihlelela maikwelo a swanago a kgotsofalo go etša pele.”

Seo mohlomongwe ke seo se diragetšego go monna yo go boletšwego ka yena pejana sehlogong se. Mantšiboeng a mangwe dikgwedi tše mmalwa ka morago ga ge a holofeditše go kgaotša go bogela diswantšho tšeo di kgothaletšago bootswa, mosadi wa gagwe o ile a boela gae gomme a mo hwetša go computer. Go ya ka ponagalo ya monna, mosadi o be a kgona go bona gore go be go na le selo se sengwe se se fošagetšego. O ngwadile gore: “[O] be a bonala a tšhogile kudu e bile a befetšwe. Ke ile ka lebelela computer, ka ntle le pelaelo o be a lebeletše selo se se šilafetšego ka mo go makatšago. O ile a re o be a nepile ge a be a holofetša go kgaotša, eupša o be a fo ba a sa kgone go e katoga.”

Ka baka la kotsi yeo diswantšho tšeo di kgothaletšago bootswa di ka e bakago le go hwetšagala ga tšona gohle, o na le lebaka le le kwagalago la gore o tshwenyege ka tšona. O ka itšhireletša bjang gotee le bana ba gago? Sehlogo sa mafelelo lelokelelong le se tla ahla-ahla potšišo yeo.

[Seswantšho go letlakala 6]

Diswantšho tšeo di kgothaletšago bootswa di senya mekgwa ya boitshwaro