La Mathomo Nywageng e Lekgolo e Fetilego

Tumelelo ya molao ya go dumelelwa ga Watch Tower Bible and Tract Society e ile ya ngwalwa semmušo kua Pennsylvania, U.S.A., ka December 15, 1884. * Ntlo-kgolo ya mokgatlo wo e ile ya hlongwa moo. Ka morago ka April 23, 1900, go ile gwa hwetšwa lefelo la ofisi ya lekala ya mathomo kua London, Engelane. E be e le 131 Gipsy Lane, Forest Gate, ka Bohlabela bja London bjalo ka ge go bontšhitšwe mo.

GE LEKALA leo la mathomo le be le hlongwa nywaga e lekgolo e fetilego, Engelane e be e na le palo-moka ya Barutwana ba Beibele, bjale ka ge Dihlatse tša Jehofa di be di bitšwa bjalo nakong yeo, ba 138. Nywaga e mebedi ka morago, ka 1902, lekala la bobedi le ile la bulwa kua Jeremane; gomme ka 1904, makala a oketšegilego a be a hlomilwe kua Australia le Switzerland.

Ka 1918, ngwaga woo Ntwa ya I ya Lefase e fedilego ka wona, go be go na le Barutwana ba Beibele ba 3 868 bao ba bego ba bega modiro wa boboledi lefaseng ka bophara. Ngwaga o latetšego, lekala la bohlano la Mokgatlo wa Watch Tower le ile la hlongwa—le le ile la hlongwa Canada. Ke moka, ge kgoeletšo ya molaetša wa Beibele e be e dutše e tšwela pele, makala a mafsa a ile a bulwa dinageng tše dintši tše di fapa-fapanego, a tshela ka 1921 e nnoši.

Ka 1931, ge Barutwana ba Beibele ba be ba amogela leina le le theilwego Beibeleng la Dihlatse tša Jehofa, go be go na le diofisi tša makala tše 40 lefaseng ka moka. (Jesaya 43:10-12) Nakong ya nywaga e meraro e latetšego, palo e ile ya oketšega go ya go 49! Ka 1938, go be go na le tlhora ya Dihlatse tše 59 047 tše di bego di bolela dinageng tše 52, eupša ka nako yeo kganetšo e šoro e be e thomile go bea modiro wa tšona wa Bokriste mafelong a mantši kotsing ya go ka kgaotša.

Ge pušo ya bopolitiki ya bonkgwete le kgatelelo e phatlalala go tloga nageng e nngwe go ya go e nngwe gomme Ntwa ya II ya Lefase e phulega ka September 1939, diofisi tša makala tša Dihlatse tša Jehofa di ile tša tswalelwa dinageng ka go latelana. Ka 1942, ke feela tše 25 tšeo di bego di sa dutše di šoma. Lega go le bjalo, ka mo go tlabago, nakong yeo ya ntwa e senyago historing ya motho, Dihlatse tša Jehofa di ile tša dula di le mafolofolo lefaseng ka bophara gomme di thabela e nngwe ya dikoketšego tše  dikgolo tša tšona historing ya mehleng yeno.

Gaešita le ge Ntwa ya II ya Lefase e be e fedile ka 1945—gomme dikarolo tše dintši tša lefase di sentšwe—diofisi tša makala tša Dihlatse di ile tša bulwa gape gomme tše difsa di ile tša hlongwa. Ka 1946, go be go na le tše 57 lefaseng ka bophara. Ke Dihlatse tše kae tše mafolofolo tšeo di bego di le gona? Tlhora ya tše 176 456! Palo ye e nyakile go ba ya 1938 gararo!

Kamoo Makala a Mathomo a Ilego a Katologa

Ka 1911, lekala la mathomo la Mokgatlo wa Watch Tower kua London, Engelane, le ile la hudušetšwa 34 Craven Terrace, moo go bego go hwetšagala lefelo le legolo la diofisi le la bodulo. Ke moka, ka April 26, 1959, meago e mefsa ya lekala kua Mill Hill, London e ile ya neelwa. Ka morago lefelo la bodulo le ile la katološwa gomme mafelelong (ka 1993), lefelo la disekwere-mithara tše 18 500 la kgatišo le moago wa tša taolo le ile la neelwa kgaufsi le moo. Mo go tšweletšwa dimilione tša ka godimo ga tše 90 tša Morokami le Phafoga! ngwaga le ngwaga ka maleme a 23.

Go katološwa ga lekala la bobedi la Mokgatlo e be e bile e le mo go kgahlišago kudu. Ka 1923, lekala la Jeremane le ile la hudušetšwa Magdeburg. Morokami wa July 15, 1923, e bile wa mathomo wa go gatišwa ke Mokgatlo ka motšhene wa wona wa go gatiša moo. Nywageng e sego kae e latetšego go ile gwa rekwa lefelo la kgaufsi le moo, meago ya oketšwa gomme ditlabakelo tša go tlema dipuku le metšhene e oketšegilego ya go gatiša e ile ya hwetšwa. Ka 1933, lekala le ile la tšewa ke ma-Nazi, Dihlatse tša thibelwa gomme ge nako e dutše e e-ya, tše dikete tše pedi tša tšona di ile tša romelwa dikampeng tša tshwenyo.

Ge Ntwa ya II ya Lefase e be e fela ka 1945, lefelo la kua Magdeburg, yeo ka nako yeo e bego e le karolo ya Jeremane Bohlabela, le ile la bušwa gomme lekala la hlongwa gape. Eupša ka August 30, 1950, maphodisa a Makomanisi a ile a šwahlela meagong gomme a swara bašomi gomme Dihlatse tša Jeremane Bohlabela di ile tša thibelwa. Nakong yeo, lefelo le be le ile la rekwa kua Wiesbaden, Jeremane Bodikela ka 1947. Nywaga-someng e latetšego, meago ya lekala yeo e bego e agilwe moo, e ile ya katološwa leboelela go dumelelana le go nyakwa ga dipuku.

 Ka ge go be go se sa hlwa go na le sebaka sa go katološa kua Wiesbaden, go ile go rekwa dihektare tše 30 kgaufsi le Selters ka 1979. Ka morago ga mo e ka bago nywaga e mehlano ya go aga, lekala le legolo le ile la neelwa ka April 21, 1984. Le ile la katološwa gape gore le kgone go dudiša bašomi ba lekala ba fetago sekete. Kgwedi e nngwe le e nngwe go gatišwa dimakasine tša ka godimo ga dimilione tše 16, ka maleme a fetago 30 ka metšhene e megolo ya go gatiša kua Selters; gomme nywageng ya morago bjale, dipuku tša ka godimo ga dimilione tše 18 go akaretša Dibeibele, di tšweleditšwe mafelong a go tlema dipuku.

Makala a Mangwe a Magolo a Kgatišo

Go ile gwa hlongwa lekala pele kua Kobe, Japane ka 1927, eupša tlaišo e šoro ya Dihlatse nakong ya Ntwa ya II ya Lefase e ile ya fokotša modiro wa tšona. Lega go le bjalo, kapejana ka morago ga ntwa, lekala le ile la hlongwa gape kua Tokyo. Ge go be go se sa na le lefelo leo le hwetšagalago moo bakeng sa katološo, go ile gwa agwa lekala le lefsa kua Numazu. Le ile la neelwa ka 1973. Ge meago ye e be e fetwa ke mošomo ka lebelo, meago e mefsa e megolo e ile ya agwa kua Ebina, gomme ye e ile ya neelwa ka 1982. Meago e katološitšwego tikologong ye yeo e ka dudišago bašomi ba 900, e sa tšwa go fetšwa. Ka leleme la Sejapane feela, go ile gwa gatišwa dikopi tša ka godimo ga dimilione tše 94 tša Morokami le Phafoga! ka 1999 gotee le dipuku tše dimilione.

Go katološwa ga meago ya lekala e bile mo go swanago dinageng ka go latelana. Go ile gwa hlongwa lekala Mexico City, kua Mexico, ka 1929. Ke moka, ge palo ya Dihlatse e fihletše 60 000, meago e mefsa e megolo e ile ya agwa ka ntle ga motse. E ile ya neelwa ka 1974, gomme go oketšwa ga yona go ile gwa fetšwa ka 1985 le 1989. Ga bjale, yeo e lego kgaufsi le go fetšwa ke meago ya kgatišo e mefsa le mafelo a oketšegilego a bodulo. Ka baka leo, lekala la Mexico kgaufsinyane le tla be le kgona go dudiša bašomi ba 1 200. Lekala le šetše le tšweletša dimakasine le dipuku bakeng sa Dihlatse tše fetago 500 000 le dimilione tša batho ba bangwe kua Mexico gotee le batho bao ba dulago dinaga-mabapi.

Ka 1923, ofisi ya lekala e ile ya rulaganywa kua Rio de Janeiro, Brazil, gomme ka morago lefelo le lefsa le lebotse la bodulo le ile la agwa moo. Eupša ka ge São Paulo e le lefelo le legolo la kgwebo le tša maeto la Brazil, ka 1968 lekala le lefsa le ile la agwa motseng woo. Bogareng bja bo-1970, go be go na le mo e ka bago Dihlatse tše 100 000 kua Brazil. Lega go le bjalo, katološo e nngwe e be e sa kgonege kua São Paulo, ka gona, lefelo la dihektare tše 115 le ile la rekwa kua Cesário Lange, mo e ka bago dikhilomithara tše 150 ka ntle ga São Paulo. Ka March 21, 1981, meago ya lekala lefelong leo le lefsa e ile ya neelwa. Ka baka la go katološwa lefelong le, lekala le ka dudiša mo e ka bago batho ba 1 200. Dimakasine le dipuku di tšweletšwa kua Brazil bakeng sa bogolo bja Amerika Borwa gotee le dikarolo tše dingwe tša lefase.

Lekala le lengwe le legolo la kgatišo le ile la fetšwa mathomong a bo-1990 kgaufsi le Bogotá, Colombia. Dimakasine tša Morokami le Phafoga! di tšweletšwa moo bakeng sa go abja ka leboa-bodikela la Amerika Borwa ka moka.

Makala a mangwe ao a gatišago dimilione tša dimakasine ngwaga le ngwaga a Afrika Borwa, Argentina, Australia, Canada, Finland, Italy, Korea, Nigeria, Philippines le Sepania. Lekala la kua Italy gape le tšweletša dimilione tša dipuku go akaretša le Dibeibele, ngwaga o mongwe le o mongwe ka maleme a mantši. Ee, tše dintši tša dikgatišo tša ngwaga le ngwaga tšeo di fihlago go dipuku tše dimilione tše 40 le dimakasine tša ka godimo ga dimilione tše sekete, di sa dutše di tšweletšwa ntlong-kgolo ya Watch Tower Bible and Tract Society kua Brooklyn, New York, gotee le lefelong la yona la kgatišo karolong ya ka leboa ya New York.

Ka kgonthe, ke mo go makatšago gore palo ya diofisi tša makala e oketšegile go tloga go e tee nywaga e lekgolo e fetilego go fihla go tše 109 lehono tšeo di hlokomelago dinyakwa tša Dihlatse tša Jehofa dinageng tše 234. Le gona, nagana gore go tšona go šoma Bakriste ba baithapi bao ba ineetšego ba e ka bago ba 13 000! Ruri, mošomo wa bona gotee le wa ba bangwe ba baithapi ba 5 500 bao ba dirago ntlong-kgolo ya Mokgatlo e bile o bohlokwa phethagatšong ya boporofeta bja Jesu Kriste bja gore ‘ditaba tše tše dibotse tša Mmušo wa Modimo di tla bolelwa lefaseng ka moka leo go agilwego go lona pele bofelo bo fihla.’—Mateo 24:14, NW.

[Mongwalo wa ka tlase]

[Seswantšho go letlakala 15]

Tom Hart, yo go dumelwago gore e bile Morutwana wa Beibele wa pele Engelane

[Diswantšho go letlakala 16]

Lekala la London kua 34 Craven Terrace (seswantšhong se se lego ka go le letona)

[Diswantšho go letlakala 16]

Meago yeo ga bjale e šomišwago kua London