Inšuranse Yeo e Nyakwago ke yo Mongwe le yo Mongwe

GO SA šetšwe gore o dula moo inšuranse e lego e tlwaelegilego goba moo e sego gona, go na le mohuta wa inšuranse woo yo mongwe le yo mongwe a ka o hwetšago e bile a swanetšego go o hwetša. Ka ge “inšuranse” e ka šupa go “mokgwa wa go tiišetša tšhireletšego goba polokego,” o ka ikhola bjang ka mohuta o bjalo wa inšuranse?

O ka dira bjalo ka go gata megato e šomago bakeng sa go fokotša dikotsi tšeo o lebanego le tšona. Beibele e bolela gore “dinako le ditiragalo tše di sa letelwago” di kgoma yo mongwe le yo mongwe. (Mmoledi 9:11, NW) Lega go le bjalo, ka go se lekele hlogong ka mo go sa nyakegego, kgonagalo ya go gobala goba go lahlegelwa e a fokotšega.

Nagana ka Bokamoso

Go bontšha bohlale bjo bo šomago ke tšhireletšo. Dinakong tša katlego e itšego ya maemo a tša boiphedišo, e ka ba mo go kgonegago go boloka se sengwe bakeng sa mohla wa tlalelo—nako ya go hloka. Mehleng ya bogologolo, monna yo a boifago Modimo Josefa, o ile a itlhaola e le “monna wa thlaoloxanyô, yo bohlale” ka go boloka dijo bakeng sa naga ya Egipita ka moka nakong ya mohora. Ge naga ka morago e be e hlaselwa ke tlala, ditiro tša Josefa ga se tša thuša ba-Egipita feela eupša gape le lapa la gabo.—Genesi 41:33-36.

Go ba bao ba lekanyetšago tirišong ya rena ya dilo gape go ka šoma e le tšhireletšo. Re ka boloka tšhelete gomme ra fokotša kgateletšego ka go se phegelele ka mehla dilwana-lwana tša morago-rago, dilo tše di lego nakong goba boithabišo—e lego tsela yeo e okeletšago go gonyenyane goba e sa okeletše selo polokegong ya rena ya kgonthe. Ge e le gabotse, bjalo ka ge go šetše go boletšwe, ge motho a e-na le dithoto tše dintši tša dilo tše di bonagalago, go na le kgonagalo e kgolo ya gore di utswiwe goba a di lobe.—Luka 12:15.

E-ba yo a Kgomegago ka Polokego

Re ka fokotša bontši bja dikotsi bophelong ka go fo ba bao ba kgomegago ka polokego. Ke dikotsi tše kae tše šoro tša dikoloi tšeo di ka phengwago  ge e ba yo mongwe le yo mongwe a otlela ka tlhokomelo le ka lebelo le le bolokegilego? Le gona, nagana gape gore ke maphelo a makae ao a bego a ka bolokega ge e ba go be go se na yo a otlelago a lapile kudu goba ka morago ga go nwa dino-tagi. Go na le dikotsi tše dingwe gape tša go otlela tšeo re ka di laolago.

Ka mohlala, dinageng tše mmalwa, molao o iletša go dirišwa ga mogala wa cellular mola o otlela. Nyakišišo e nngwe e phethile ka gore tirišo e bjalo e oketša go tsena kotsing ka makga a mane. Seo ke koketšego ya kgonagalo ya go ka dira kotsi ya go swana le go otlela motho a e-na le tekanyo ya 0,1 lekgolong ya tagi mading, e lego tekanyo yeo mafelong a mantši motho a lebelelwago a tagilwe kudu go ya ka molao wa go otlela ge a e-na le yona.

Go dirišwa ga ka mehla ga mapanta a tšhireletšo gape go fokotša kotsi ya lehu bakeng sa baotledi le banamedi. Eupša le ka mohla o se ke wa nagana gore go ba le mekgwa e bjalo ya tšhireletšo bjalo ka mapanta a tšhireletšo le mekotla ya moya ya go šireletša banamedi go thulana le ditšhipi nakong ya kotsi (air bags) goba go ba le inšuranse go bolela go lekela hlogong. Nyakišišo e bontšha gore kgopolo e bjalo e lebiša dikotsing tše di oketšegilego.

Go ba yo a phafogetšego polokego gape ke inšuranse e botse ka gae le lefelong la mošomo. Na lefelo la gago la mošomo le lefelo la go dula ke a bothakga le ao a sego kotsi? Lebeledišiša go go dikologa. Na go na le selo le ge e le sefe mokgobeng seo batho ba ka se kgopago? Na dilo tše bogale goba didirišwa tša go fiša—ditofo, diruthufatši le dišidulli—di beilwe moo di ka hlabago batho goba go ba fiša? Na go na le go kgobelana ga dipampiri goba dilo tše dingwe tše di fsago gabonolo? Phafogela kudu-kudu dikotsi go bana. Ka mohlala, na dino tše di tagago le ditšweletšwa ka moka tša mpholo tša go hlwekiša di beilwe moo di ka se fihlelelwego ke bana ba banyenyane?

Hlokomela Boemo bja Gago bja tša Maphelo

Ka go ba yo a phafogetšego boemo bja tša maphelo ka tsela e kwagalago, o ka fokotša go ba ga gago kotsing ya go babja. Tabeng ye, tsebo e ka šoma bjalo ka sebopego sa inšuranse. Hlokomela dikotsi boemong bja gago bja tša maphelo, gomme o gate mogato wa kapejana ge mathata a tša maphelo a thoma. Sa bohlokwa kudu, ithute kamoo o ka hlokomelago boemo bja gago bja tša maphelo le bja lapa la gago. Gopola seema sa kgale se se rego: “Thibela-malwetši e phala kalafo.”

Phafoga! ke kgale e nea tsebišo yeo e kgothaletšago batho go phela ka go dumelelana le melao ya motheo ya Beibele gomme ka go rialo ba pheme ditlwaelo le mekgwa ya bophelo yeo e senyago boemo bja tša maphelo. Ka mohlala, gare ga dihlogo tše dintši tšeo di ahla-ahlilwego ka go Phafoga! e bile bohlokwa bja bohlweki, dijo tše di swanetšego, go robala ka mo go lekanego le boitšhidullo bja ka mehla gotee le go nyakega ga go laola kgateletšego le lebelo la bophelo.

Mohuta o Bohlokwa wa Inšuranse

Lefaseng le le sa phethagalago, inšuranse e ka ba sedirišwa seo se šomago, eupša ga go na kwano ya inšuranse yeo e ka šireletšago ka mo go  feletšego goba go lefela ka mo go tletšego ditahlegelo tša rena. Lega go le bjalo, go na le batho bao ba holofelago gore ba ka se ke ba tlogelwa ba nnoši go sa šetšwe gore inšuranse e a hwetšagala bakeng sa bona goba go se bjalo. Ka baka la’ng? Ka gobane ge dikotsi di hlasela balatedi ba kgonthe ba Jesu Kriste—bao ba hlankelago Tatagwe Jehofa Modimo—ba dira seo ba ka se kgonago bakeng sa go nolofaletša ba bangwe merwalo.—Psalme 83:18; Jakobo 2:15-17; 1 Johane 3:16-18.

Go feta moo, Jehofa ka boyena o holofetša go se tlogele bahlanka ba gagwe ba ba botegago le ka mohla. Mopsalme wa Beibele o ngwadile gore: “Xobane tate le mmê bôná ba ntloxetše; ’me Wêna Morêna O a nkamoxêla.” (Psalme 27:10) Bjalo ka Mothopo wa bophelo, Jehofa a ka tsoša bao ba hwago, gomme go ya ka Beibele o neile Morwa wa gagwe Jesu Kriste matla a go tsoša bahu. (Psalme 36:9; Johane 6:40, 44) Le gona, Lentšu la Modimo le bontšha gore ga se bohle bao ba tlago go tsošwa. (Johane 17:12) Ka gona, re ka kgonthišetša bjang gore re gopolwe ke Modimo tsogong?

Thutong ya gagwe e tumilego ya Thabeng, ge e le gabotse Jesu o boletše ka sebopego seo se ka botwago kudu sa inšuranse. O itše: “Le se kê la ikxobêlêla mahumô lefaseng, mo xo senyaxo thswêlê le diji, mo xo phulaxo mahodu a utswa. Mahumô ikxobeleng lexodimong, mo xo sa senyexo thswêlê le diji, mo xo sa phulexo mahodu a utswa. Xobane mo xo lexo lehumô la xaxo, ké mo xo lexo pelo ya xaxo.”—Mateo 6:19-21.

Gantši batho ba nagana ka go ipolokela tšhelete ka kholofelo ya gore e tla ba kgonthišetša bophelo bja boiketlo ge ba godile. Lega go le bjalo, Jesu o hlaotše sebopego se se šireletšegilego kudu sa inšuranse. Mohola wa yona ke wo o sa nyatšegego, gomme e ka se ke ya palelwa le ka mohla! O hlalositše gore: “Bophelô byo bo sa felexo ké xe ba Xo tseba, Wene Modimo-dimo Ò le nnoši. Ba tsebê le Moromiwa wa xaxo Jesu Kriste.”—Johane 17:3.

Ka go hwetša tsebo e nepagetšego ya Modimo le Morwa wa gagwe le ka go diriša seo re ithutago sona maphelong a rena, re tla itirela pego e botse le Modimo. (Ba-Hebere 6:10) Bobedi moapostola Petro le moapostola Johane, ba theile ditumelo tša bona thutong ya Mong wa bona Jesu Kriste, ba ile ba gatelela gore tshepedišo ya gona bjale ya pušo ya motho e tla fela. Le gona Johane o hlalositše gore: “E a tl’o xo dula à le xôna xo ya xo ile, ké eo a diraxo tše Modimo a di rataxo.”—1 Johane 2:17; Mateo 24:3, 14; 2 Petro 3:7, 13.

Re ka kgodišega gore ge e ba re hlankela Modimo gomme ra hwa, o tla re tsoša goba ge e ba re tla phela go fihla nakong ya ge a fediša tshepedišo ye ya dilo, o tla re phološa bakeng sa go phela lefaseng le lefsa la toko. Ka kgonthe kholofetšo ya Modimo ke go “phomola mexôkxô ka moka mahlong a [rena]” le go dira ‘dilo ka moka tše mpsha.’ (Kutollo 21:4, 5) Go hlankela Modimo le go bea kholofelo dikholofetšong tša gagwe ka kgonthe ke inšuranse e phalago tšohle. Le gona e a hwetšagala bakeng sa yo mongwe le yo mongwe.

[Diswantšho go letlakala 26, 27]

Go kgomega ka polokego le boemo bja tša maphelo ke sebopego sa inšuranse

Picture on page 28]

Go ithuta ka Modimo le go dira thato ya gagwe ke inšuranse e phalago tšohle bakeng sa bokamoso