Pono ya Beibele

Molwa le Kriste ke Mang?

“LE KWILE XORE XO E-TLA MO-LWA-LE-KRISTE.”—1 JOHANE 2:18.

GE O be o ka lemošwa gore sesenyi se kotsi se bonwe se e-tla tikologong ya geno, o be o tla dira’ng? Mohlomongwe o be o tla nyakišiša ditaba tša mabapi le ponagalo ya sona ya mmele le mekgwa ya sona ka botlalo. O be o tla dula o phafogile.

Boemo bjo bo swanago bo gona lehono. Re lemošitšwe ka mantšu a moapostola Johane gore: “Môya wo o sa bolelexo Kriste wa re ó tlile a ba motho, xa se môya wo o tšwaxo xo Modimo; ké wôna môya wa Mo-lwa-le-Kriste, yo le mo kwilexo xore ó e-tla, xomme le byale ó šetše a le xôna lefaseng.” (1 Johane 4:3) Na go na le molwa le Kriste yo bjalo, lenaba la Modimo le mofori wa batho yo mo nakong ye a tšhošetšago boiketlo bja batho ka moka?

Johane o dirišitše lentšu “mo-lwa-le-Kriste” ka makga a mahlano ka diepistoleng tša gagwe tše pedi. Le šupa mohlanogi yo a ganetšago seo Beibele e se rutago ka Jesu Kriste gomme le akaretša bafori bao ba ikgakantšhago ka go itira Kriste goba bjalo ka ge eka ba romilwe ke yena. Beibele e nea tsebišo ye e ka botwago mabapi le molwa le Kriste. Eupša go fo etša tabeng ya disenyi, dipego tše di se nago bohlatse tša bahlanogi ba bao ba makatšago di elwa hloko kudu go feta therešo.

Taba ya go Hlaolwa ka Tsela e Fošagetšego

Go tloga mehleng ya moapostola Johane, batho ba ile ba tšea gore mantšu a Johane a mabapi le molwa le Kriste a šupa go motho o tee ka go lebanya. Batho ba ile ba ikakanyetša batho ba fapa-fapanego bakeng sa boemo bjoo. Nywaga-kgolong e fetilego ba bantši ba ile ba nagana gore Mmušiši wa Roma e lego Nero e be e le molwa le Kriste. Ka morago, Bampshafatši ba Protestanta ba ile ba tsebiša gore bapapa e be e le balwa le Kriste. Lefula la lehloyo le botšhošetši bja Adolf Hitler le ile la kgodiša ba bantši gore e be e le molwa le Kriste. Lentšu gape le be le dirišwa gaešita le go radifilosofi wa Mojeremane Friedrich Nietzsche. Lega go le bjalo, ba bangwe ba dumela gore molwa le Kriste o sa tla le gore o tla tšwelelela e le yo bohlale, radipolitiki yo šoro yo maikemišetšo a gagwe e lego go buša lefase. Ba dumela gore sebata sa Kutollo kgaolo 13 ke tšhupetšo e kgethegilego ya molwa le Kriste yo a boletšwego  ke Johane. Ba bolela gore leswao la sona la 666 ka tsela e itšego le tla hlaola nkgwete ye ya ka moso ya bokgopo.

Bao ba godišago kgopolo ye ba šišinya gore Johane o be a šupile feela go molwa le Kriste o tee. Eupša ke eng seo se bontšhwago ke mantšu a gagwe? Ela hloko 1 Johane 2:18, yeo e rego: “Xomme byalo ka xe Le kwile xore xo e-tla Mo-lwa-le-Kriste, mehleng yeno xo tsoxile Ba-lwa-le-Kriste ba bantši.” Ee, ke “ba-lwa-le-Kriste ba bantši,” e sego o tee bao ba bego ba ikarabela bakeng sa boemo bja moya bja khuduego morago kua lekgolong la pele la nywaga. Lehono ga go molwa le Kriste o tee, eupša balwa le Kriste ba bantši bao ba bopago sehlopha sa molwa le Kriste. Ba kopane ka moka ga bona, ba tlišitše tshenyego ya moya bathong. (2 Timotheo 3:1-5, 13) Ke bomang bao ba bopago molwa le Kriste?

Anke re lebeledišišeng sebata sa Kutollo kgaolo 13 e le seo se swanetšego. Moapostola Johane o ngwadile gore: “Sebata seo ke se bonexo se be se swana le nkwê; marofa a be a swana le a tawana; molomo o be o swana le wa tau.” (Kutollo 13:2, mongwalo o sekamego ke wa rena.) Dibata tše di be di swantšhetša eng?

Diithuti tša Beibele di ile tša lemoga tswalano magareng ga Kutollo 13 le Daniele kgaolo 7. Modimo o ile a bontšha Daniele pono ya dibata tša seswantšhetšo go akaretša nkwe, bere le tau. (Daniele 7:2-6) Morongwa wa Modimo o ile a di hlalosa bjang? O ile a ngwala gore dibata tšeo tša naga di swantšhetša dikgoši tša lefase goba mebušo. (Daniele 7:17) Ka gona re ka phetha ka mo go swanetšego gore dibata tša naga tša Kutollo di emela mebušo ya batho. Ka ge mebušo ye e le yeo e ganetšago Mmušo wa Modimo, le yona e bopa karolo ya molwa le Kriste.

Ke Bomang Gape Bao ba Bopago Molwa le Kriste?

Ge Kriste Morwa wa Modimo a be a le mo lefaseng o be a e-na le manaba a mantši. Gaešita le ge mo nakong ye a le kgole kudu gore ba ka mo fihlelela, baganetši ba gagwe ba mehleng yeno ga se ba hwa matwa. Ela hloko bao ba akaretšwago gare ga baganetši ba.

Moapostola Johane o boletše gore: “Wa maaká ké mang? A xa se eo a xanetšaxo a re: Jesu xa se Yêna Kriste? Ké yêna Mo-lwa-le-Kriste, e a xanetšaxo Tata-wešô le Morwa wa xaxwe.” (1 Johane 2:22) Bahlanogi le baetapele ba borapedi bja maaka ba retollela dithuto tše di kwagalago tša Jesu go ba mahuto a maaka a bodumedi. Batho ba bjalo ba gana therešo ya Beibele gomme ba phatlalatša maaka ka leina la Modimo le Kriste. Ba gana tswalano ya kgonthe ya Tate le Morwa, ka thuto ya bona ya Boraro botee. Ka gona, le bona ke karolo ya balwa le Kriste.

Jesu o ile a lemoša barutiwa ba gagwe e sa le pele go Luka 21:12 gore: “Ba tlo ba ba thomile xo Le iša matsôxô, ba Le tlaiša; ba tlo Le sekiša diphuthexong tša bôná, ba Le iša kxolexong, . . . ka ’baka la Leina la-ka.” Ga e sa le go tloga lekgolong la pele la nywaga, Bakriste ba therešo ba ile ba kgotlelela tlaišo e sehlogo. (2 Timotheo 3:12) Bahlohleletši ba tlaišo e bjalo ba lwa le Kriste. Le bona ke ditho tša balwa le Kriste.

“E a sa emexo le Nna, ó lwa le Nna; le e a sa kxobelexo le Nna, ó a xašanya.” (Luka 11:23) Mo Jesu o bontšha gore bohle bao ba mo ganetšago gotee le merero ya Modimo maitapišo a bona a wela ka legorong la molwa le Kriste. Mafelelo ao a ba emetšego ke afe?

Ke Eng Seo se Emetšego Balwa le Kriste?

Psalme 5:6 e re: “Ba-bola-maaká [Modimo] O a ba senya. Monna wa madi, le wa bofora, Morêna ó a ba hlaswa.” Na se se šoma go balwa le Kriste? Ee. Moapostola Johane o ngwadile gore: “Xobane lefaseng lé xo tsene baaroši, ba ba sa emexo ka la xo re: Jesu Kriste ó tlile a ba motho. Motho e a sa emexo ka Lentšu lé ké yêna Mo-lwa-le-Kriste.” (2 Johane 7) Modimo yo Matla-ohle o tla senya balwa le Kriste ka baka la maaka a bona le bohwirihwiri.

Ge nako ya go phethwa ga kahlolo yeo e dutše e batamela, Bakriste ba therešo ga se ba swanela go dumelela maaka le kgateletšo tša balwa le Kriste, kudu-kudu go tšwa go bahlanogi gore di fokodiše tumelo ya bona. Temošo ya Johane e akgofile: “Phafoxang xore Le se timêlêlwê ke se rena re se dirilexo; sa rena e tlê e bê xo bôna moputsô wo o tletšexo.”—2 Johane 8.

[Mothopo wa Seswantšho go letlakala 30]

Nero on pages 2 and 30: Courtesy of the Visitors of the Ashmolean Museum, Oxford