Bafsa ba a Botšiša . . .

Nka Dira Bjang Gore go Bala Beibele e be mo go Thabišago Kudu?

“Ka dinako tše dingwe Beibele e thata go kwešišega gomme seo se ka fetša matla.”—Annalieza wa nywaga e 17.

“Ke hwetša Beibele e le e tšwafišago.”—Kimberly wa nywaga e 22.

BATHO ba bantši ga ba thabele go bala selo le ge e ka ba sefe. Ka gona, puku e kgolo e bjalo ka Beibele e ka bonala e le e fetšago matla—gaešita le go babadi ba paale. Tammy wa nywaga e 17 o re: “Go nna Beibele e be e le puku e kgolo yeo e nago le mantšu a sa tlwaelegago ao go bego go le thata go a kwešiša. Go bala Beibele go nyaka go tsepamiša kgopolo kudu le kgotlelelo.”

Go oketša moo, mošomo wa gae, mešongwana ya ka lapeng le boithabišo di ka go jela nako ya gago e ntši le matla. Tše le tšona di ka dira gore go be thata go tsepamiša kgopolo le go thabela go bala Beibele. Alicia yo e lego yo mongwe wa Dihlatse tša Jehofa, le yena o tšea nako a lokišetša le go ba gona dibokeng tša Bokriste le go abelana ditumelo tša gagwe le ba bangwe. O dumela ka gore: “Go bala Beibele go ka ba thata ka gobane go bonala go na le lelokelelo le le sa felego la dilo tšeo di swanetšego go dirwa.”

Lega go le bjalo, Alicia, Tammy le bafsa ba bangwe ba bantši, ba ile ba kgona go fenya tlhohlo. Ga bjale ba bala Beibele ka mehla gomme ba e thabela. Le wena o ka e thabela! Ela hloko dilo tše tharo tše o ka di dirago bakeng sa go dira gore go bala Beibele e be mo go thabišago kudu.

Iphe Nako ya go Bala Beibele

Kelly wa nywaga e 18 o re: “Ke nagana gore bafsa ba bolela gore go bala Beibele go a tšwafiša ka gobane ga se ba go dira ka mo go lekanego.” Go fo etša ge o thabela papadi yeo o e bapalago ka mehla, o tla thabela go bala Beibele ge o dutše o e bala ka mehla.

Eupša go thwe’ng ge e ba o na le nako e nyenyane? Moapostola Paulo o eletša gore: “Ké xôna phakxamêlang xo swara tsela ka xo itôta; Le se etšê mašilo, Le etšê bahlale. Le [reke nako e, NW] botse; xobane mehla yeno ké e mebe.” (Ba-Efeso 5:15, 16) O ka ‘reka nako’ ka go fetša nako e nyenyane medirong e sego bohlokwa go swana le go bogela TV. Polelwana yeo Paulo a e dirišitšego bakeng sa “nako,” e ka bolela nako yeo e beetšwego ka thoko bakeng sa modiro o itšego. Nako ya gago e beetšwego ka thoko bakeng sa go bala Beibele e tla ba efe?

Ba bantši ba bala Beibele mesong, ka morago ga go hlahloba temana ya Lengwalo le ditlhaloso tše di hwetšwago ka pukwaneng ya Go Hlahloba Mangwalo ka Mehla. * Ba bangwe ba kgetha  go e bala pele ba robala bošego. Kgetha nako ya kgonthe yeo e go swanelago le thulaganyo ya gago. Alicia o bolela gore: “Go feto-fetoga le maemo ke senotlelo sa kgonthe bakeng sa go sepedišana ga-ka le lenaneo la ka mehla la go bala.”

Bafsa ba bangwe ba Bakriste ba rulaganyetša metsotso e 10 go ya go e 15 ka mehla bakeng sa go bala Beibele. Ka go dira bjalo, ba kgonne go bala Beibele ka moka ga yona ka ngwaga goba e mebedi! Gaešita le ge seo se ka bonala se sa fihlelelege go wena, dira gore e be pakane ya gago go bala karolo ya Beibele letšatši le lengwe le le lengwe. Ka go kgomarela ka go tia nakong ya gago e beetšwego go bala Beibele, lerato la gago la go rata Lentšu la Modimo le tla gola.—Psalme 119:97; 1 Petro 2:2.

Rapelela Bohlale

Ke therešo gore gaešita le babadi ba ka mehla ba Beibele ba hwetša dikarolo tša Lentšu la Modimo go le thata go di kwešiša. Mongwadi wa Beibele e lego Jehofa Modimo, o nyaka gore o kwešiše Lentšu la gagwe. Puku ya Ditiro e re botša ka mosepedi wa mo-Ethiopia yo a sa kago a kwešiša ka botlalo boporofeta bjo bo lego go Jesaya kgaolo 53. Monna yo o be a ikemišeditše go kgopela thušo, gomme morongwa wa Jehofa o ile a romela moromiwa Filipi bakeng sa go mo hlalosetša boporofeta.—Ditiro 8:26-39.

Ka gona, go bala Beibele mo go atlegago ga go thome feela ka go fo bala, eupša go thoma ka thapelo. Pele ba bula Beibele, ba bangwe ba go dira mokgwa go rapela Jehofa bakeng sa bohlale bja go kwešiša le go nweletša ka dipelong dithuto tšeo ba di balago. (2 Timotheo 2:7; Jakobo 1:5) Moya wa Modimo o ka ba wa go gopotša ditemana tša Beibele tšeo di tlago go go thuša go araba dipotšišo goba go lebeletšana ka katlego le diteko.

Lesogana le lengwe la Mokriste le a gopola: “Ge ke be ke e-na le nywaga e 12, tate o ile a tlogela lapa lešo. Bošegong bjo bongwe ke ile ka rapela ke le malaong a-ka, ka kgopela Jehofa gore a dire gore tate a boe. Ka morago ke ile ka tšea Beibele ya-ka gomme ka bala Psalme 10:14 e rego: ʽBa ba lapilexo ba šetše è le ba xaxo [Jehofa], Mo-lwêla-dišuana.’ Ke ile ka homola ka motsotso. Ke ile ka kwa gore Jehofa o be a bolela le nna le go ntsebiša gore e be e le mothuši wa-ka; e le Tate wa-ka. Ke tate ofe yo kaone yo nka bago le yena go mo feta?”

Na o ka go dira mokgwa wa gago go rapela nako e nngwe le e nngwe ge o dula fase bakeng sa go bala Beibele? Adrian o šišinya gore: “Rapela pele o bala—o dire bjalo ka mo go swanago le ka morago—e le gore e be poledišano ya kgonthe ya batho ba babedi le Jehofa.” Thapelo e tšwago pelong e tla tiiša boikemišetšo bja gago bja go kgomarela lenaneo la gago la go bala Beibele gomme e tla matlafatša tswalano ya gago le Modimo.—Jakobo 4:8.

Dira Gore e be ga Kgonthe

Kimberly yo a tsopotšwego mathomong a sehlogo se, o hweditše go bala Beibele e le mo go tšwafišago. Ke therešo gore Beibele ke puku ya kgale kudu—le gore e ngwadilwe kgale kudu pele go hlangwa ga computer, thelebišene goba sefofane —le gona baanegwa ba Beibele ba hwile nywageng e dikete e fetilego. Lega go le bjalo, moapostola Paulo o ngwadile gore: “Lentšu la Modimo ké le le phelaxo, ké le matla.” (Ba-Hebere 4:12) Puku yeo ya bogologolo e ka ba le matla bjang?

Mehleng ya mongwalolodi Esera, banna le basadi ba dikete le “bohle ba ba naxo le thlaoloxanyô ba kxôna xo kwa,” ba ile ba phuthega gammogo kua Jerusalema bakeng sa go theetša go balwa ga Molao wa Moše. Ka nako yeo, Molao o be o šetše o e-na le nywaga e fetago e 1 000! Lega go le bjalo, Esera le bathuši ba gagwe ba ile “ba bala puku yeo ya molaô ka xo šiêlana ditema, ba di hlathollêla batho ba di hlaoloxanya.” (Mongwalo o sekamego ke wa rena.) Ge banna ba ba be ba hlalosa Mangwalo le go bala ka mokgwa o phedilego, mafelelo e ile ya ba afe? “Batho ka moka ba ya xo ja le xo nwa, ba hlallêla ba ba hlôkaxo, ya ba lethabô le lexolo, xobane ba be ba kwišitše se ba bexo ba boditšwe sôna.”—Nehemia 8:1-12.

O ka ‘kwešiša’ bjang go baleng ga gago Beibele? Cathy yo a tšeago go bala e le tlhohlo, o bala ka go hlaboša lentšu bakeng sa go tsepamiša kgopolo ya gagwe. Nicki o leka go ipea maemong a tiragalo. O re: “Ke nagana ka kamoo ke bego ke tla ikwa ka gona boemong bjoo. Kanegelo ya-ka ya mmamoratwa ka mehla e bile pego ya Ruthe le Naomi. Nka e bala leboelela. Ge ke be ke hudugela motseng o mofsa, ke ile ka hwetša khomotšo kanegelong ye ka gobane ke be ke nagana kamoo Ruthe a ilego a ikwa ka gona ge a be a e-ya lefelong leo a sa le tlwaelago gomme a sa tsebe motho. Ke ile ka bona kamoo a bego a beile kholofelo ya gagwe go Jehofa, gomme seo se nthušitše kudu go dira bjalo.”—Ruthe, dikgaolo 1-4.

E le gore Beibele e ‘nee matla,’ go nyakega go naganišiša. Nako e nngwe le e nngwe ge o bala, tšea nako o naganišiša ka mangwalo ao o a badilego le go naganišiša kamoo o tlago go diriša seo o ithutilego sona. O ka rata go dira dinyakišišo dikgatišong tša go ithuta Beibele tšeo di gatišitšwego ke Dihlatse tša Jehofa bakeng sa go humiša go bala ga gago. *

Phegelela!

Go kgomarela lenaneo la go bala Beibele ga go bonolo. Gaešita le lenaneo le lebotse la go bala Beibele le ka nyaka go lokišwa nako le nako. O ka phegelela bjang pakaneng ya gago ya go bala Beibele ka mehla?

Bagwera ba gago le ba lapa ba ka thuša. Amber wa nywaga e 15 o re: “Ke diriša phapoši e tee le moratho wa-ka. Mašegong a mangwe ke lapa kudu mo e lego gore ke fo nyaka go ya go robala, eupša moratho wa-ka o nkgopotša go dira mmalo wa-ka. Ka gona, le ka mohla ga ke lebale go bala!” Ge e ba o hwetša lengwalo goba temana e itšego e le e kgahlišago, boledišana le ba bangwe ka yona. Se se tla godiša tebogo ya gago ya go leboga Lentšu la Modimo gomme go tla hlohleletša gaešita le kgahlego ya bona ya go bala Beibele. (Ba-Roma 1:11, 12) Ge e ba o ile wa hlokomologa go bala ga gago Beibele letšatši goba ka nako e telele, o se ke wa lapa! Tšwela pele moo o emego gona, gomme o ikemišetše kudu go feta le ge e le neng go kgomarela lenaneo la gago.

Le ka mohla o se ke wa lebala mehola e humilego yeo e tlišwago ke go bala Beibele ka mehla. Ka go theetša Jehofa ka Lentšu la gagwe, o ka thabela tswalano ya kgaufsi le yena. O tla thoma go lemoga dikgopolo tša gagwe le maikwelo. (Diema 2:1-5) Ditherešo tše tše dibotse go tšwa go Tatago rena wa legodimong, di tla ipontšha e le tšhireletšo. Mopsalme o kile a botšiša gore: “Lesoxana le ka thakxa bya’ng thsepelô ya lôna? Ké xe le lôta Lentšu la xaxo.” (Psalme 119:9) Ka gona, thoma—gomme o kgomarele—mokgwa wa ka mehla wa go bala Beibele. O tla hwetša e le mo go thabišago kudu go feta kamoo o bego o nagana gore go tla ba ka gona!

[Mengwalo ya ka tlase]

[Diswantšho go letlakala 28]

Thapelo le go dira nyakišišo go tla godiša go bala ga gago Beibele gomme go tla go thuša go kwešiša seo se bolelwago ke Mangwalo

[Seswantšho go letlakala 29]

Go ipea boemong bja pego go tla dira gore Mangwalo e be a phelago go wena