Tsela e Kaone ya go Kgotsofatša Dinyakwa tša Gago tša Moya

KE KA BAKA LA’NG BATHO ba nyaka bodumedi? Ba bangwe ba ka bolela gore batho ba retologela dilong tša moya bakeng sa go hwetša tšhireletšego lefaseng leo le sa šireletšegago. Eupša go na le mo go oketšegilego go bjona go feta seo. Sehlogo seo se lego ka kuranteng ya American Sociological Review se boletše gore: “Go nyaka tšhireletšego ga se sebopego se nnoši seo se ipiletšago sa bodumedi. Batho ka mehla ba be ba nyakišiša dikarabo dipotšišong tše bjalo ka tše rego: Re tšwa kae? Re lebile kae? Ke ka baka la’ng re le mo?”

 Ka ntle le pelaelo o tla dumela gore tšeo ke dipotšišo tša bohlokwa ka mo go tseneletšego. Ka ge e le tše bohlokwa, na ga di nyake dikarabo tšeo di ka botwago? Dipotšišo tše bjalo ke tša bohlokwa kudu le tše matla kudu gore di ka rarollwa feela ka go kgetha ditumelo tša bodumedi go tšwa ditlogong tšeo di fapa-fapanego ka gobane ke tšeo di ipiletšago go rena ka noši. Ge e ba re tla hwetša dikarabo tše di kwagalago le tšeo di ka botwago dipotšišong tše di tseneletšego kudu tša bophelo, ka kgonthe re nyaka mokgwa o kaone.

Na go na le selo se sengwe se sekaone? Ferrar Fenton yo e lego mofetoledi wa Beibele, o boletše selo se sengwe se se makatšago ka puku yeo. O ile a e bitša “senotlelo se nnoši sa go bula Sephiri sa Legohle go Motho le Sephiri sa Motho go Yena ka Noši.” Ee, Beibele e araba dipotšišo tša mabapi le nako yeo e fetilego, ya gona bjale le yeo e tlago. E re botša moo re tšwago gona, gore morero wa bophelo ke ofe, kamoo re ka hwetšago lethabo le seo bokamoso bo re swaretšego sona. Ga go na puku e nngwe historing yeo e ilego ya ba le tutuetšo go swana le Beibele; goba puku le ge e le efe e nngwe yeo e ilego ya phologa ditlhaselo tše dintši gakaakaa tše šoro. Lega go le bjalo, ke ka baka la’ng batho ba bantši gakaakaa ba nyatša puku ye ya moswana-noši lesolong la bona la go nyaka dikarabo bakeng sa dipotšišo tša bophelo?

Batho ba bantši ga se ba ipha nako ya go naganišiša ka go se swane kudu mo go lego gona magareng ga Beibele le dikereke tšeo ba bego ba di tseba. Ba ile ba bona kamoo bao ba bitšwago Bakriste ba bolayanago ka gona leineng la Modimo. The Guardian e ile ya ela hloko gore, ba bantši ba ile ba belaela ka gore “matšatšing a baruti ba kgahlegela kudu go koleka tšhelete go feta go etela bakeng sa go nea tlhokomelo ya moya.” Mohlomongwe ba nagana gore Beibele e dumelela mokgwa o bjalo goba go o tshediša mahlo. Therešo ke gore, Beibele e laela Bakriste gore ba “ratanê,” le gona e botša bao ba rutago lentšu gore, “Le filwe fêla; le lena fang fêla.” (Johane 13:34; Mateo 10:8) Ka gona, na ke mo go swanetšego go ahlola Beibele ka ditiro tša batho bao ba ipolelago gore ba a e hlompha eupša ba sa e latele?

Ba bantši ba dumela gore Beibele ga e dumelelane le thutamahlale, gore ke yeo e ikganetšago le yeo e fetilwego ke nako. Eupša nyakišišo e tseneletšego e bontšha se se fapanego. Ke therešo gore, Beibele ga se puku ya thutamahlale. Lega go le bjalo, ge e bolela ka taba yeo e tswalanago le tša thutamahlale—bjalo ka mokgwa woo diphedi di tšweletšego ka gona lefaseng, sebopego sa lefase goba kalafo e swanetšego ya malwetši ao a fetelago—Beibele ga e bolele selo seo se fošagetšego. Ka mo go fapanego, e hupere dipolelo tšeo di bego di le gona nywaga-kgolo e mentši pele ga nako ya tšona. Gaešita le ge Beibele e dirilwe ka dipuku tše 66 tšeo di ngwadilwego ka lebaka la nywaga e fetago 1 600, ka moka ga tšona di a dumelelana. Go feta moo, Beibele e bontšha temogo e fetago tekanyo ka tlhago ya motho, ya e dira gore e be e lego nakong lehono go feta le ge e le neng pele.

Puku ye yeo e makatšago e bolela selo se sengwe sa bohlokwa bjo bogolo ka borapedi bja Modimo. E bolela gore borapedi bjo bjalo bo swanetše go phethwa, e sego go ya ka ditekanyetšo tša batho, eupša go ya ka ditekanyetšo tša Modimo. (Johane 5:30; James 4:13-15; 2 Petro 1:21) Eupša ke batho ba sego kae feela bao ba ilego ba amogela le go latela molao woo wa motheo e le ka kgonthe. Go tloga kgale batho ba ile ba dira gore madumedi a swanele merero ya bona ka noši. Seo ke sa therešo ge batho ba ipetlela medingwana ka kota gomme ba e rapela. Ke therešo gore ka meagong ya bodumedi ba ruta dithuto tšeo ba itlhametšego tšona. Na se ga se sa therešo gape ka batho bao ba itiretšego bodumedi bja ka sephiring bakeng sa go swanela dikgetho tša bona ka noši?

Nagana tsela e nngwe. Ke ka baka la’ng re sa dire go swana le ka moo moahlodi-mogolo wa Kgorong-kgolo ya Tsheko ya United States a dirilego ka gona? Ka tsela e swanago le yeo a ilego a ahlola melato ka gona kgorong, o ile a nyakišiša bohlatse bjo bo lego mabapi le go rereša ga Beibele goba bjo bo lego kgahlanong le yona ka go se bebe sefahlego. Ka mafelelo afe? O itše: “Ke fihleletše phetho ya gore Beibele ke puku e phagametšego tlhago, le gore e tšwa go Modimo.”

O ka itirela bjang nyakišišo e swanago? E le tšhišinyo, o ka leka thuto yeo e rulagantšwego ya Beibele, o hlahloba dikarabo tša yona dipotšišong tšeo di rotošitšwego mathomong a sehlogo se. Go na le mo e ka bago dimilione tše tshela tša Dihlatse tša Jehofa, dinageng tše 235, tšeo di dirilego nyakišišo e swanago. Di gafa nako ya tšona e le gore di abelane le ba bangwe seo di ithutilego sona. Thuto ya legae ya Beibele yeo di e neago ka ntle le tefo e thušitše ba dimilione go hwetša tumelo yeo e fetago mokgwa wo o lego nakong goba boikgethelo bja motho ka noši. Bokriste bja therešo le bjo bo sekilego bjo bo lego ka Beibeleng ga se feela bodumedi bjo bongwe. Bo emela therešo ka Modimo le ka merero ya gagwe. Ka gona, ke ka baka la’ng re swanetše go kgotsofatšwa ke seo se fetwago ke se?—Johane 17:17.

[Diswantšho go letlakala 26]

Tsela e kaone ya go kgotsofatša dinyakwa tša gago tša moya ke go ithuta ka Modimo go tšwa Beibeleng le go gwerana le barapedi ba therešo