Go Dirišwa Gampe ga Bana go Kgaufsi le go Fela!

MATSENO a Lekgotla la Ditshwanelo tša Ngwana a re: “Mokgatlo wa Ditšhaba tše Kopanego o ile wa tsebatša go Boipolelo bja Kakaretšo bja Ditshwanelo tša Batho gore bana ba swanetše go newa tlhokomelo e kgethegilego le thušo.” Mabapi le bohlokwa bja lapa, a oketša ka gore: “Bakeng sa go gola ka mo go feletšego le go dumelelana ga semelo sa gagwe, ngwana o swanetše go golela ka lapeng, boemong bjo bo nago le lethabo, lerato le kwešišo.” Lega go le bjalo, kgopolo ye ga se ya fihlelelwa.

Go fo bolela ka tikologo e kaone bakeng sa bana ga se gwa lekana. Go senyega ga boitshwaro go apareditše gomme batho ba bantši ba lebelela boemo e le bjo bo tlwaelegilego. Go senyega mo go apareditšego le megabaru di ka se ke tša laolwa ke go gapeletšwa ga molao. Gaešita le batswadi, go e na le gore ba bontšhe lerato le go šireletša bana ba bona, gantši ba tlaleletša moyeng wa go tlogelela dilo kudu. Ka gona, ke kholofelo efe yeo re nago le yona mabapi le go fela ga go gweba ka mmele ga bana?

Gaešita le ge tshepedišo ye e gobogilego e paletšwe ke go kgonthišetša gore bana ka moka ba newa magae a nago le lerato le bokamoso bjo bo šireletšegilego, kgaufsinyane Mmopi wa rena o tla fediša mehuta ka moka ya ditiro tše kgopo le mokgwa wa go ba le dikopano tša botona le botshadi le batho ba bantši, go akaretša le go gweba ka mmele ga bana. Kgaufsinyane lefase le tla makala ge Jehofa Modimo a tla be a tsena ditaba tša batho gare ka Mmušo  wa gagwe. Bao ba hlohleletšago boitshwaro bjo bo gobogilego gotee le bao ba dirišago ba bangwe ka boithati, ba ka se phonyokge kahlolo ya Modimo. Ke feela batho bao ba ratago magagabo bona bao ba tlago go phologa gore ba phele lefaseng le lefsa la Modimo. “Ba ba tl’o xo dula mo naxeng, ké baloki; ba ba tl’o xo šala bà le xôna, ké bôná ba-ila-bokxôpô. Ba babe ba tlo fedišwa naxeng; bakxeloxi ba tlo rakwa mo xo yôna.”—Diema 2:21, 22.

Nagana gore e tla ba kimologo e kaakang ya ge bana gotee le batho ba bagolo ba tla be ba kgona go phela ka ntle le go tlontlollwa le go gobošwa ka kopano ya botona le botshadi! Gaešita le tshenyo e dirilwego maikwelong le nameng e bakilwego ke go gobošwa le bosenyi, e tla be e ile le muši wa dikwekwele. Bao e kilego ya ba bahlaselwa ba go gobošwa ka kopano ya botona le botshadi ba tla kgona go phela ka ntle le go gopola dilo tšeo di hlobaetšago tša nakong e fetilego goba ditla-morago tše di bakilwego ke seo. “Tša kxalê di ka se hlwê di tsebywa, le mo pelong ya motho di ka se hlwê di rotoxa.”—Jesaya 65:17.

Ke moka, ga go na ngwana yo a tlago go belegelwa gore a tlaišwe ke go swarwa gampe goba go gobošwa ka kopano ya botona le botshadi. Lethabo, lerato le go kwešiša e tla ba dilo tša kgonthe. Mabapi le badudi ba lefase le lefsa la Modimo, Jesaya 11:9 e bolela gore: ‘Ba ka se hlwe ba dira dibe, ba ka se hlwe ba senya mo go fela.’

Ka kgonthe, e tla ba lethabo le legolo gakaakang ge bodiidi, go dirišwa gampe ga dihlare-tagi, malapa ao a sa thabago le boitshwaro bjo bobe di tla be di se gona! Khutšo, go loka le tšhireletšego di tla aparetša. “Sethšaba sa-ka se tlo dula maxaeng a moláô, nywakong e bôtêxaxo, madulong a xo iketla.”—Jesaya 32:18.

 [Lepokisi/Diswantšho go letlakala 9]

Tlhokomelo ya Botswadi e ka Thibela go Thubega ga Lapa

● “Batswadi ba-ka ba ile ba nkgothaletša go diriša ka mo go holago nywaga ya-ka ya sekolo bakeng sa go ithutela mošomo. Ga se ba ka ba leka go nkgapeletša dikgetho tša bona, eupša ba ile ba nthuša go kgetha dikolo tšeo di neago thuto ye ke bego ke e nyaka.”—Tais.

● “Ge nna le kgaetšedi ya-ka re be re e-ya mabenkeleng, mma o be a e-ya le rena. Ka ntle le go re thuša gore re be bao ba seketšago, o be a bile a re thuša go phema diaparo tša matsaka goba tšeo di bonatšago.”—Bianca.

● “Ge re be re e-ya meletlong, batswadi ba-ka ka mehla ba be ba botšiša mabapi le bao ba bego ba tla ba gona, mohuta wa mmino wo o tlago go bapalwa le nako yeo moletlo o bego o tla thoma le go fela ka yona. Re be re e-ba gona meletlong e mentši re le gotee bjalo ka lapa.”—Priscila.

● “Nakong ya ge ke sa le ngwana le nakong ya ge ke le nywageng ya mahlalagadi, nna le batswadi ba-ka re be re e-ba le poledišano e botse ka mehla. Morutwana-gotee le nna o ile a lemoga seo gomme a re: ‘Ke duma tsela yeo o lokologilego ka yona ge o boledišana le batswadi ba gago ka selo le ge e le sefe. Ke tloga ke sa lokologe go boledišana le mma gomme gantši seo ke nyakago go se tseba ke ithuta sona go batho ba bangwe.’”—Samara.

● “Ke be ke le mofsa yo a lego mahlalagading yo a thabilego. Ga se ka ka ka bona selo le ge e le sefe se sebe bathong gomme ka mehla ke be ke dula ke sega. Ke be ke ikwa ke lokologile ge ke be ke e-na le bagwera ba-ka gomme ke thabela go boledišana le bona ka dilo tše di thabišago. Batswadi ba-ka ba ile ba kwešiša gore se e be e le semelo sa-ka gomme ga se ba ka ba leka go fetoša ditsela tša ka. Eupša ka botho ba ile ba nthuša go kwešiša gore ke swanetše go ba šedi le go dirišana ka tsela e swanetšego le ba bong bjo bo fapanego.”—Tais.

● “Go etša bafsa ba bangwe ba bantši, ke ile ka thoma go kgahlegela batho ba bong bjo bo fapanego. Tate o be a mpeetše tekanyo e itšego ya nywaga yeo ke bego nka thoma lefereyo ka yona. Se ga se sa ka sa nnyamiša. Go e na le moo, ke be ke lemoga gore batswadi ba-ka ba be ba tshwenyegile ka nna gomme ba nyaka go ntšhireletša kotsing yeo e bego e letše ka pele.”—Bianca.

● “Ke be ke lebelela lenyalo e le selo se sebotse, kudu-kudu ka baka la mohlala wa batswadi ba-ka. Ba ile ba dula ba e-na le tswalano e botse gomme ba kgomaretše poledišano e botse. Ke sa gopola gore nakong ya ge ke be ke beana mabaka, mma o ile a mpha keletšo mabapi le tsela yeo ke bego ke swanetše go itshwara ka yona ka tlase ga maemo a itšego le go hlalosa kamoo se se bego se tla kgoma lenyalo la-ka ka gona.”—Priscila.

[Seswantšho go letlakala 10]

Lefaseng le lefsa la Modimo, ga go na ngwana yo a tlago go tlaišwa ka go swarwa gampe