Re Hlametšwe go Ithuta ka mo go sa Felego

“Ka hlogong e nngwe le e nngwe go na le mothopo o makatšago wa matla, e lego setho seo se kgohlaganego se se šomago ka katlego seo bogolo bja bokgoni bja sona bo bonalago bo oketšega bo e-ya pele ge re dutše re ithuta ka sona.”—TONY BUZAN LE TERENCE DIXON, BAO E LEGO BANGWADI BA TŠA THUTAMAHLALE.

BJOKO bja motho bo ka ithuta ka tekanyo e kaaka’ng? Potšišo yeo e kgahliša banyakišiši le go ba gakantšha ka mo go tšwelago pele. Peter Russell o ngwala ka pukung ya The Brain Book gore: “Ge go dutšwe go ithutwa ka mo go oketšegilego ka bjoko bja motho, ke mo go hwetšwago gore matla a bjona le bokgoni ke tše dikgolo kudu go feta ka mo go bego go akanyeditšwe ka gona pele.”

Ka mohlala, ge re e-tla tabeng ya mogopolo, bjoko bja rena bo na le bokgoni bjo bogolo kudu. Russell o bolela gore: “Mogopolo ga o swane le seswaro seo se tlalago ganyenyane-ganyenyane, o swana kudu le sehlare seo se melago dikgwega tšeo megopolo e ithekgago ka tšona. Selo se sengwe le se sengwe seo o se gopolago ke sehlopha se sengwe sa dikgwega seo megopolo e mefsa e ka  hlomelwago go tšona. Ka gona, matla a kgopolo a dula a oketšega. Ge o dutše o hwetša tsebo ka mo go oketšegilego, ke mo bokgoni bja gago bja go gopola bo oketšegago kudu.” Se se re bušetša potšišong yeo re e botšišitšego pejana e rego, Ke ka baka la’ng bjoko bja motho bo e-na le bokgoni bjo bokaakaa bja go gopola?

Kgopolo-kakanywa ya tlhagelelo ga e na karabo e kwagalago. Ka baka la go ithekga ga yona ka kgopolo ya gore go phologa tšeo di tiilego, tlhagelelo e tlogela batho bao ba naganišišago ba gakanegile e bile ba sa tsebe gore ke eng seo se dirago gore bjoko bja motho bo be le bokgoni bjo bogolo ka tsela ye. Ka mohlala, ke ka baka la’ng o diriša lori e kgolo mola e le gore o tlo rwala feela lešabašaba la go tlala garafo?

Lega go le bjalo, Beibele e nea tlhaloso e bonolo ka mo go lapološago gomme e le e kwagalago. Sa pele, e re botša gore batswadi ba rena ba pele—Adama le Efa—ba be ba bopilwe ka seswantšho sa Modimo, ba e-na le bokgoni bja go bonagatša dika tše di kgahlišago tša Modimo. Sa bobedi, e hlalosa gore ba be ba hlametšwe go phela—gomme ka baka leo ba ithute—ka mo go sa felego. (Genesi 1:27; 2:16, 17) Bjoko bja motho bo bonagatša morero woo wa Modimo, gaešita le ge ga bjale bo sa phethagala ka baka la go tsena ga sebe bathong.—Ba-Roma 5:12.

Eupša morero wa mathomong wa Modimo wa go tlatša lefase ka batho ba phethagetšego le ba boifago Modimo bao ba phelago lefaseng la Paradeise, o tla phethagatšwa. Ka kgonthe, Jehofa o ile a re nea Morwa wa gagwe yo a tswetšwego a nnoši, Jesu Kriste e le sehlabelo sa topollo bakeng sa gore re ka hwetša bophelo bjo bo sa felego.—Mateo 20:28; Johane 3:16.

Dijo tše Phalago Tšohle tša Monagano

Le gona, Jehofa o re neile Lentšu la gagwe le le buduletšwego, Beibele e Kgethwa. (2 Timotheo 3:16; 2 Petro 1:21) Ka baka la gore puku ye e bohlokwa ke setšweletšwa sa moya o mokgethwa, ga re feteletše dilo ge re bolela gore e hupere dijo tše phalago tšohle tša monagano le tša moya bakeng sa batho. (Psalme 19:7-10) Ka kgonthe, Jesu ka boyena o ile a re: “Motho xa a phele ka boxôbê fêla; ó phela ka mantšu ohle a a tšwaxo molomong wa Modimo.”—Mateo 4:4.

Ka gona, go sa šetšwe gore o yo monyenyane goba yo mogolo, ke ka baka la’ng o sa beele ka thoko nako e nyenyane letšatši le lengwe le lengwe bakeng sa go bala “mantšu” a bohlokwa a Modimo? Bao ba dirago bjalo le bao ba dirišago seo ba ithutago sona ba tla holega gona bjale le nakong e tlago. Ee, ba ka thabela tebelelo ya go phela le go ithuta ka mo go sa felego, go etša ge Modimo a be a rerile mathomong. A kholofelo e kgahlišago gakaakang!—Mmoledi 3:11; Johane 17:3.

[Seswantšho go letlakala 27]

E le go bonagatša morero wa Modimo, bjoko bja motho bo be bo hlametšwe go ithuta ka mo go sa felego

[Diswantšho go letlakala 28]

Beibele e hupere dijo tše phalago tšohle bakeng sa monagano wa gago