Bafsa Bao ba Emelago Tumelo ya Bona

GO NA le bafsa ba bantši gare ga Dihlatse tša Jehofa. Ba rata Modimo gomme ba katanela go phela ka ditekanyetšo tša gagwe bjalo ka ge di ngwadilwe ka Beibeleng. Bafsa ba ba ikgantšha ka tumelo ya bona, gomme ba bolela le ba bangwe ka yona sekolong ka bolokologi. Ela hloko mehlala e mengwe.

▪ Ge a be a le klaseng ya grade 6, Holly gotee le bao a tsenago le bona ka klaseng ba ile ba newa kabelo ya gore ba ngwale taodišo yeo e lego mabapi le potšišo e rego, “O be o ka rarolla bjang bothata bja botšhošetši o sa diriše bošoro?” Holly o ile a diriša sebaka se ka botlalo go ngwala mabapi le kholofelo ya gagwe ya bokamoso yeo e theilwego Beibeleng. O ile a hlalosa gore go theoša le histori, ‘motho o bušitše motho gore a mo senye.’ (Mmoledi 8:9) Ke moka o ile a lebiša tlhokomelo kholofelong e nnoši ya kgonthe bakeng sa batho—Mmušo wa Modimo. O ngwadile gore: “Ka ge Jesu e le Kgoši e kgethilwego ya Mmušo woo, mathata ka moka ao a akaretšago le botšhošetši, a tla fedišwa.” Holly o ile a hlalosa ka mo go nabilego mabapi le kamoo Jesu a tlago go phetha seo go se nago mmuši wa motho yo a ka kgonago go se phetha. O ngwadile gore: “Nakong ya ge Jesu a be a le lefaseng, o ile a bontšha mohuta wa mmuši yoo a bego a tla ba yena. O be a e-na le lerato gomme a e-na le taba le batho. O ile a bontšha matla ao a bego a e-na le ona ka go fodiša balwetši le ka go tsoša bahu. Ga go na mmušo wa batho wo o kgonago go tsoša batho bao ba hwilego. Eupša Mmušo wa Modimo o tla dira bjalo.” Holly o ile a phetha taodišo ya gagwe ka mantšu a rego: “Ke Modimo a nnoši a ka tlišago tharollo, e sego batho.”

Bokatlaseng bja taodišo, morutiši o ile a ngwala gore: “Aa! Holly, o tloga o ngwadile molaetša o matla. O naganišišitšwe gabotse.” Le gona, morutiši o be a kgahlilwe ke go tsopola ga Holly Mangwalo. Se se ile sa nea Holly sebaka sa go bolela le morutiši wa gagwe ka Sekolo sa Bodiredi sa Pušo ya Modimo, e lego lenaneo la beke le beke la go bolela le go ruta leo le swarwago ke Dihlatse tša Jehofa. Morutiši wa gagwe o ile a amogela ka lethabo kopi ya  puku ya go ithuta yeo e dirišwago Sekolong sa Bodiredi.

▪ Jessica le yena o bile le sebaka sa go bolela ka tumelo ya gagwe ge a be a ngwala ditaodišo tša sekolo. O re: “Ke kgonne go ngwala ditaodišo tše tharo mabapi le ditumelo tša-ka. E nngwe e be e le mabapi le Dihlatse tša Jehofa le ditshwanelo tša bodumedi. Morutiši o ile a e phara bokgobapukung e le gore bao ba ratago ba ka e bala. Ke sa tšwa go ngwala taodišo mabapi le kolobetšo ya-ka le kamoo letšatši leo e bilego la bohlokwa ka gona go nna. Barutwana ba ananya mošomo o sa felago wa ditaodišo tša bona, ka gona bao ke tsenago le bona ka klaseng ba ile ba ba le sebaka sa go bala taodišo ya-ka. Ngwanenyana yo mongwe o itše: ‘O dirile gabotse kudu. Go a thuša go tseba ka boikarabelo bjoo bo tlišwago ke go ba yo mongwe wa Dihlatse tša Jehofa. Re a go lebogiša ge o kolobeditšwe!’ Ngwanenyana yo mongwe o itše: ‘Taodišo ya gago e be e kgahliša kudu! Ke thabela go tseba gore tumelo ya gago e tiile gakaakaa!’ Mošemane yo mongwe o ngwadile gore: ‘O tloga o nagana gabotse kudu. Re a go lebogiša!’”

▪ Ge Melissa a be a e-na le nywaga e 11, o ile a ba le sebaka sa moswana-noši sa go emela tumelo ya gagwe. “Mooki wa sekolong o ile a tla klaseng ya rena ya tša thutamahlale go tlo bolela ka tshepedišo ya mmele ya go lwantšha malwetši. Go ile gwa rotoga taba ya tšhelo ya madi. Ka morago ga thuto yeo ke ile ka botša morutiši wa-ka wa tša thutamahlale mabapi le e nngwe ya dibidio tša rena yeo e bolelago ka madi. Ke ile ka tla le yona sekolong letšatšing le le latelago, gomme morutiši wa-ka o ile a ya le yona gae gomme a e bogela le lapa la gagwe. Letšatšing le le latelago o ile a tla le bidio sekolong gomme a e bontšha diklase tše pedi, go akaretša le ya rena. Ka morago o ile a bolela gabotse ka Dihlatse tša Jehofa, a botša klase gore ge nkabe e be e se ka rena, dikalafo tše dingwe tšeo di sa dirišego madi di be di ka se hwetšagale gabonolo. Ge a bušetša bidio go nna, o ile a mpotšiša gore, ‘Nka hwetša bjang kopi bakeng sa bokgobapuku bja sekolo?’ Ke ile ka mo nea kopi. O be a e thabetše kudu, gomme le nna ke be ke thabile kudu!”

Holly, Jessica le Melissa ba gare ga bafsa ba Dihlatse tša Jehofa bao ba latelago keletšo ya Beibele ya gore ba gopole Mmopi wa bona. (Mmoledi 12:1) Na le wena o dira bjalo? Ge e ba go le bjalo, o ka kgonthišega gore o thabiša pelo ya Jehofa.—Diema 27:11; Ba-Hebere 6:10.

Lena bafsa ge le boledišana le bao le tsenago le bona sekolo gotee le barutiši ka tumelo ya lena, seo se nea bohlatse bjo matla mabapi le Jehofa Modimo le merero ya gagwe. Le gona go tiiša le tumelo ya lena, gomme go godiša ka go lena boikgantšho bjo bo lokilego bja go ba le tokelo ya go ba gare ga bahlanka ba Modimo. (Jeremia 9:24) Go nea bohlatse sekolong gape go dira e le tšhireletšo. Jessica o hlalosa se ka gore: “Mohola o mongwe wa go bolela ka ditumelo tša-ka ke gore barutwana ga ba leke go nkgapeletša go dira dilo tšeo di sa dumelelanego le seo Beibele e se bolelago.”

[Diswantšho go letlakala 12]

Holly

[Diswantšho go letlakala 12, 13]

Jessica

[Diswantšho go letlakala 13]

Melissa