Go Lebeletšana le Mathata a go ba Mma yo e Lego Mofsa wa Mahlalagading

GO IMA ga bafsa bao ba lego mahlalagading go tla le mathata a go dira diphetho tša batho ba bagolo. Mma yo mongwe yo e lego mofsa wa mahlalagading o re: “Ke ikwa eka ke na le nywaga e 40. Ga se ka thabela selo bjaneng bja-ka ka moka.” Ka kgonthe, ge ngwanenyana yo monyenyane a lemoga gore o imile a ka ikwa a imelwa ka mo go feletšego ke poifo le go belaela.

Ge e ba o le mofsa yo a lego mahlalagading yo a imilego, le wena o ka ikwa ka tsela yeo. Lega go le bjalo, ga go na selo se sebotse seo o ka se fihlelelago ge o itumelela gore o imelwe ke maikwelo a fošagetšego. Beibele e re: “Mo-kwa-phefô xa a byale; kxadiamaru xa a bune.” (Mmoledi 7:8; 11:4) Molemi yo a ngenegago moko kudu ka boemo bja leratadima o tla palelwa ke go gata megato e nyakegago. Phema go ngenega moko kudu. Mafelelong o tla swanelwa ke go tšwela pele ka bophelo gomme o rwale boikarabelo bja gago.—Ba-Galatia 6:5.

Dikgetho tša gago ke dife? Ba bangwe ba ka go botša gore o nagane ka go ntšha mpa. Eupša ye ga se kgetho ya bao ba nyakago go kgahliša Modimo ka ge Beibele e bolela ka mo go kwagalago gore go ntšha mpa go kgahlanong le molao wa Modimo. (Ekisodo 20:13; 21:22, 23; Psalme 139:14-16) Bophelo bja lesea leo le sa hlwago le belegwa bo bohlokwa mahlong a Modimo—go akaretša le leseana leo le imilwego ka ntle ga lenyalo.

Go thwe’ng ka go nyalana le tatago ngwana wa gago gomme le mo godiše gotee? Mohlomongwe lenyalo le ka go dira gore o se ke wa lewa ke dihlong kudu. Eupša gaešita le ge tate yo mofsa a ikwa a gapeletšega go thuša ka go godiša ngwana wa gagwe, ga se ka mehla lenyalo e lego kgetho e bohlale. * Taba ya gore lesogana le kgona go ba le ngwana ga e bolele gore le na le bokgoni bja maikwelo le bja monagano bjo bo nyakegago bakeng sa gore e be monna le tate yo botse. Le gona ga e bolele gore le ka kgona go hlokomela mosadi wa lona le ngwana ka tša ditšhelete. Go feta moo, ge e ba wena le lesogana la gago le se bodumeding bjo bo swanago, go nyalana le lona e ka ba go nyatša keletšo ya Beibele ya go nyala ‘feela Moreneng.’ (1 Ba-Korinthe 7:39) Phihlelo e bontšha gore go kitimela go tsena lenyalong pele ga nako—mohlomongwe e bile e le la nakwana—go ka fo go okeletša bohloko le tlaišego.

Go thwe’ng ka go iša ngwana gore a thwalwe? Gaešita le ge go le molaleng gore se se phala go ntšha mpa, o swanetše go ela hloko ntlha ya gore go sa šetšwe gore maemo a thata gakaakang, o na le sebaka sa go fepa le go godiša ngwana wa gago.

Go Lebeletšana le Ditlhohlo

Ke therešo gore ga go bonolo go godiša ngwana o se na molekane. Lega go le bjalo, ka go latela melao ya motheo ya Beibele go fihla mo o ka kgonago le ka go bota Modimo bakeng sa matla le tlhahlo, o ka lebeletšana ka katlego le ditlhohlo tše dintši. Megato e mengwe yeo o ka e gatago yeo e tlago go go thuša gore o atlege ke ye.

● Lokiša tswalano ya gago le Modimo. Lemoga gore kopano ya botona le botshadi pele ga lenyalo ke sebe go Modimo—molato kgahlanong le ditekanyetšo tša gagwe tše phagamego tša boitshwaro. (Ba-Galatia 5:19-21; 1 Ba-Thesalonika 4:3, 4) Ka gona, mogato wa pele o bohlokwa ke go sokologa gomme o kgopele Modimo tebalelo. (Psalme 32:5; 1 Johane 2:1, 2) Go ba gona, o ka no ikwa o sa swanelwe ke gore a go thuše. Lega go le bjalo, Jehofa o holofetša go lebalela gomme o thuša bao ba sokologago diphošong tša bona. (Jesaya 55:6, 7) Go Jesaya 1:18, Jehofa o re: “Le xe dibe tša lena di hubetše bo-ka madi [e le tše dikgolo], di tlo šweufala wa leswêla [go hlwekišwa ka mo go feletšego].” Le gona, Beibele e kgothaletša bafoši  go ikhola ka thušo ya moya yeo e newago ke bagolo bao ba kgethilwego ba phuthego.—Jakobo 5:14, 15.

● Kgaotša go ba le dikopano tša botona le botshadi pele ga lenyalo. Go ka direga gore seo se tla bolela gore o kgaogane le tatago ngwana wa gago. Go tšwela pele tswalanong e bjalo ka ntle ga lenyalo go tla fo go gatelela gore o tšwele pele o itshwara ka tsela e sa kgahlišego Modimo. Le ka mohla o se ke wa lebala gore gaešita le ge melao ya Modimo e tsepame, e diretšwe go re šireletša. Nicole yo a tsopotšwego pejana lelokelelong le o gopola gore: “Ke ile ka thoma go lemoga gore Modimo o nepile. O nyaka go re hola.”—Jesaya 48:17, 18.

● Botša batswadi ba gago. Ke mo go swanetšego gore o ka ikwa o boifa gore batswadi ba gago ba tla go galefela. Ke therešo gore ba tla nyama le go tshwenyega ge ba lemoga gore o imile. Ba ka ba ba ikwa gore ba go fošeditše bjalo ka batswadi le go ipea molato ka baka la go se itshware gabotse ga gago. Lega go le bjalo, ge e ba batswadi ba gago ba boifa Modimo e le ka kgonthe, go ka no direga gore maikwelo a matla a go kwa bohloko a fele ge nako e dutše e e-ya. Ke batswadi ba gago gomme go sa šetšwe diphošo tšeo o di dirilego, ba a go rata. Ge ba bona boemo bja gago bja kgopolo bja go itshola, ga go pelaelo gore ba tla tutueletšega go ekiša tatago morwa wa lehlaswa gomme ba go lebalele ka lerato.—Luka 15:11-32.

● Bontšha tebogo. Gantši batswadi, ba leloko le bagwera ba ipontšha e le mothopo o mogolo wa thušo le thekgo. Ka mohlala, batswadi ba gago ba ka rulaganyeletša gore o hwetše tlhokomelo ya tša kalafo. Ka morago ga ge ngwana wa gago a belegwe, ba ka go thuša gore o hwetše thuto ya motheo ya go hlokomela ngwana; ba ka ba ba ithapela go  go hlokomelela ngwana. Nicole o bolela ka mmagwe gore: “Ngwana e be e le wa-ka eupša mma o dirile mo gontši go nthuša.” Ka mo go swanago bagwera ba gago ba ka thuša, mohlomongwe ka go go nea diaparo tša ngwana ba ikhomoletše le dilo tše dingwe tšeo di ka thušago. (Diema 17:17) Ge o bontšhwa botho, latela keletšo ya Beibele gomme ‘o be molebogi.’ (Ba-Kolose 3:15) Mantšu a tebogo a ka thibela bagwera ba bjalo gore ba ikwe eka ditiro tša bona tša lerato ga di re selo.

● Ithute bokgoni bja go ba motswadi. Ke therešo gore ga o nyake go ithekgela sa ruri ka lapa leno le bagwera ba gago. Ka gona thoma go ithuta bokgoni bjo bo tlago go go thuša gore o hwetše tekanyo e itšego ya go kgona go hlokomela ngwana wa gago le go hlokomela lapa. Ke tlhohlo go ithuta go hlokomela motho yo a tlogago a nyaka tlhokomelo. Go na le mo gontši mo o swanetšego go ithuta gona mabapi le tlhokomelo ya ngwana ya dijo tšeo di nago le phepo, maphelo le tše dingwe. Ka mo go kgahlišago, Beibele e kgothaletša basadi bao ba godilego ba Bakriste go tutueletša basadi ba bafsa go ba “balotodi ba malapá a bôná.” (Tito 2:5) Ga go pelaelo gore mmago—mohlomongwe le ditho tše dingwe tše di godilego tša phuthego ya Bokriste—ba ka go nea tlwaetšo e bohlokwa ge go tliwa tabeng ye.

● Diriša tšhelete ka bohlale. Beibele e bolela gore “tšhelete le yona ke tšhireletšo.” (Mmoledi 7:12, PK) Go ba gona ga ngwana go tla baka ditshenyagalelo tše oketšegilego tša ditšhelete.

Mo gongwe o ka nyaka go thoma ka go diriša thušo le ge e le efe yeo e newago batho bohle yeo o ka e hwetšago. Lega go le bjalo, gantši ngwanenyana o sa dutše a swanetše go ithekga ka batswadi ba gagwe bakeng sa thušo ya tša ditšhelete. Ge e ba go le bjalo ka lehlakoreng la gago, e tla ba ga bohlale le go bontšha go naganela ba bangwe gore o fokotše ditshenyagalelo kudu ka mo go ka kgonegago. Gaešita le ge ka ntle le pelaelo o ka rata go rekela ngwana wa gago dilo tše difsa, mohlomongwe o ka seketša tšhelete ka go reka mabenkeleng ao a rekišago dilo tšeo di šetšego di dirišitšwe goba dilo tšeo di rekišwago mabaleng.

● Leka go hwetša thuto e itšego. Diema 10:14 e re: “Ba bohlale ké ba-huma-tsebô.” Gaešita le ge se e le sa therešo ka mo go kgethegilego ka tsebo ya Beibele, e bile ke sa therešo le ka thuto ya lefase. O swanetše go hlagolela bokgoni bjo bo nyakegago e le gore o tle o kgone go iphediša.

Ke therešo gore go thata go tsena sekolo mola o hlokomela ngwana. Lega go le bjalo, go se be le thuto ya motheo go ka gapeletša wena le ngwana wa gago go phela bophelo bja bodiidi, go  ithekga ka tšhelete ya mmušo, go gola tšhelete e nyenyane, go ba le ntlo ya maemo a fase kudu goba phepo-mpe. Ka gona, ge e ba go tloga go kgonega, tšwela pele o tsena sekolo. Mmago Nicole o ile a phegelela gore Nicole a fetše sekolo gomme ka baka la seo, ka morago o ile a kgona go hwetša tlwaetšo ya go ba mothuši wa ramolao yeo e ilego ya mo dira gore a kgone go itlhokomela.

Ke ka baka la’ng o sa dire nyakišišo mabapi le gore ke dibaka dife tša tša thuto tšeo di hwetšagalago? Ge e ba o thatafalelwa ke go ya klaseng, mo gongwe o ka no nyakišiša bakeng sa go bona ge e ba o ka kgona go ithuta o le gae. Ka mohlala, go ithutela ka gae go ka ipontšha go swanela boemo bja gago.

O ka Atlega

Go godiša ngwana ka ntle ga lenyalo ke tlhohlo go ngwanenyana yo monyenyane. Eupša go a kgonega gore o atlege! Ka go se fele pelo, go ikemišetša le ka thušo ya Jehofa Modimo, o ka ba motswadi yo lerato le yo a nago le bokgoni. Le gona, gantši bana ba bo-mma bao ba sa nyalwago ba ka gola gomme ya ba batho ba bagolo bao ba tsepamego. Le gona, o ka thabela go bona ngwana wa gago a diriša seo o mo rutilego le go mo tlwaetša sona gomme e e-ba morati wa Modimo.—Ba-Efeso 6:4.

Nicole o bea taba ka gore: “Ka thušo ya Modimo—go sa šetšwe gore go be go bonagala go ka se kgonege—ke ile ka thabela go thuša mosetsana wa-ka yo monyenyane gore e be kgarebe e botho, e hlomphago le e nago le boikarabelo. Ge ke mo lebelela ke gopola mašego ka moka ao ke a feditšego ke hlobaela eupša gape go ntlatša lethabo.”

Lega go le bjalo, batho ba bagolo ba swanetše go swara bjang bo-mma bao e lego bafsa ba mahlalagading le bana ba bona? Di sa tloga fase, na go na le tsela ya go thuša bafsa go phema bohloko bja go ima ba sa le mahlalagading?

[Mongwalo wa ka tlase]

[Diswantšho go letlakala 9]

Bo-mma bao e lego bafsa ba mahlalagading ba lebeletšana le ditlhohlo tše dintši kgodišong ya bana ba bona

[Seswantšho go letlakala 10]

Go tsena lenyalong pele ga nako ga se tharollo

[Seswantšho go letlakala 10]

Bagolo ba Bakriste ba ka thuša bafsa bao ba fošago go lokiša tswalano ya bona le Modimo

[Seswantšho go letlakala 11]

Ke ga bohlale gore bo-mma bao ba se nago balekane ba fetše thuto ya motheo ya sekolong