Bafsa Ba A Botšiša

Nka lebeletšana bjang ka katlego le bolwetši?

“SEALA sa thsoxana ké matla a bôná.” (Diema 20:29) Ge e ba o babja goba o golofetše, o ka ikwa eka lengwalo le le ka se ke la šoma go wena. Eupša le ka šoma! Therešo ke gore bafsa ba bantši bao ba golofetšego goba bao ba swerwego ke malwetši ao a sa alafegego ba kgonne go fenya mapheko a magolo. Phafoga! e boledišane le bafsa ba bjalo ba bane.

Hiroki, yo a dulago kua Japane, o bile le bolwetši bja kgobalo ya monagano (cerebral palsy) go tloga ge a belegwa. O re: “Mešifa ya molala wa-ka ga e kgone go dira gore hlogo ya-ka e dule e otlologile gomme matsogo a-ka a a itaola. Ke ithekgile ka mo go feletšego ka thušo ya ba bangwe.”

Natalie le moratho wa gagwe e lego James ba mo Afrika Borwa, ba belegwe ba e-na le bolwetši bjo bo sa tlwaelegago bja go se gole. Le gona, Natalie o na le scoliosis, e lego bolwetši bjo bo dirago gore lerapo la mokokotlo le se ke la otlologa. O re: “Ke ile ka buiwa gane lerapong la mokokotlo gomme ka baka la go se otlologe ga lona, maswafo a-ka a a fokola.”

Timothy, yo a dulago kua Brithania, o ile a thoma go tseba gore o na le bolwetši bja go lapa mo go sa felego (chronic fatigue syndrome) ge a be a e-na le nywaga e 17. O re: “Ka nako ya ka tlase ga dikgwedi tše pedi, ke ile ka fetoga gomme ka se sa ba motho yola yo a bego a phetše gabotse mmeleng, ka fokola kudu moo maoto a-ka a bego a palelwa ke go nthekga.”

Danielle, yo a dulago kua Australia, o ile a thoma go tseba gore o na le bolwetši bja swikiri ge a be a e-na le nywaga e 19. O re: “Ka ge maswao a bolwetši bja swikiri a sa bonagale, batho ba bangwe ga ba lemoge kamoo bo lego kotsi ka gona. Therešo ke gore bolwetši bja swikiri bo ka mpolaya.”

Ge e ba o tlaišwa ke bolwetši bja mohuta o itšego goba o golofetše ka tsela e itšego, ga go pelaelo gore o tla kgothatšwa ke mantšu a Hiroki, Natalie, Timothy le Danielle. Ge e ba o phetše gabotse mmeleng, mantšu a bona a ka go thuša gore o kwešiše gakaone  batho bao ba golofetšego goba ba phelago ka malwetši.

Phafoga!: Ke’ng seo se tshwenyago kudu ka boemo bja gago?

Natalie: Ke hwetša go le thata go lebeletšana le tsela yeo batho ba itshwarago ka yona ge ba mpona. Le ka mohla ga ke lokologe. Ke ikwa eka batho ba dula ba ntebeletše.

Danielle: Ka ge ke swerwe ke bolwetši bja swikiri, tlhohlo e kgolo ke go tseba gore ke dijo dife tšeo ke swanetšego go di ja, gore ke swanetše go ja tše kaakang le gore ke dijo tša mohuta ofe tšeo ke sego ka swanela go di ja kudu. Go se laole tekanyo ya-ka ya dijo go ka dira gore kelo ya swikiri mading a-ka e theoge kudu, e lego seo se ka dirago gore ke idibale ka nako e telele.

Hiroki: Ke na le setulo se se kgethegilego sa digole seo se hlametšwego mmele wa-ka, gomme ke fetša mo e ka bago diiri tše 15 ke dutše go sona ka mokgwa o tee wa go dula. Le gona ga ke robale gabotse. Ge ke e-kwa lešata le lenyenyane feela ke a phafoga.

Timothy: Mathomong bothata bja-ka bjo bogolo e be e le go amogela taba ya gore ke a babja. Ke be ke lewa ke dihlong ka baka la boemo bja-ka.

Phafoga!: O lebeletšana le mathata afe a mangwe?

Danielle: Bolwetši bja swikiri bo dira gore ke lape kudu. Go nyakega gore ke robale nako e telele go feta yeo dithaka tša-ka di e robalago. Le gona, bolwetši bja swikiri ke bolwetši bjo bo sa alafegego.

Natalie: Go molaleng gore taba ya gore ke kgopana e mpakela bothata. Go dira dilo tše di tlwaelegilego—tše bjalo ka go fihlelela dilo tše di lego šelofong lebenkeleng—go thata. Ge ke e-ya mabenkeleng ke nnoši, go nyakega gore ke dire boiteko bjo bogolo.

Timothy: Ke ile ka swanelwa ke go lebeletšana le sehlabi seo se sa felego gotee le kgateletšego. Pele ke babja, ke be ke le mafolofolo. Ke be ke šoma e bile ke e-na le lengwalo la go otlela. Ke be ke bapala dipapadi tše bjalo ka kgwele ya maoto le squash. Ga bjale ke sepela ka setulo sa digole.

Hiroki: Ga ke kgone go bolela gabotse. Se se a nnyamiša gomme se ntšhitiša go thoma dipoledišano. Matsogo a-ka a a itaola gomme ka dinako tše dingwe ke betha batho ke se ka ikemišetša. Ge se se direga, ga ke kgone le gore, “ke kgopela tshwarelo,” ka gobane ga ke kgone go bolela gabotse.

Phafoga!: O thušitšwe ke’ng go lebeletšana le boemo bja gago ka katlego?

Danielle: Ke leka go lebiša tlhokomelo dilong tše dibotse bophelong bja-ka. Lapa lešo le a kgahliša, ke na le bagwera bao ba nthatago ka phuthegong, gomme sa bohlokwa le go feta, Jehofa Modimo o a nthekga. Le gona, ke leka go dula ke e-na le tsebišo ya morago-rago ya mabapi le go lebeletšana le bolwetši bja swikiri. Ke dira sohle seo nka se kgonago gore ke itlhokomele.

Natalie: Thapelo ke mothopo wa matla. Ke leka go lebeletšana le bothata bjo tee ka nako. Go dula ke swaregile go nthuša gore ke se ke ka dula ke nagana ka dilo tše di fošagetšego. Le gona, ke na le batswadi ba rategago bao nka ba ntšhetšago sa mafahleng.

Timothy: Ke dira dilo tšeo di sepedišanago le borapedi bja-ka letšatši le lengwe le le lengwe, gaešita le ge e ka ba ka nako e nyenyane. Ka mohlala, ke thoma letšatši le lengwe le le lengwe ka go bala temana ya letšatši. Thuto ya motho ka noši ya Beibele le thapelo ke tša bohlokwa kudu go nna, kudu-kudu ge ke ikwa ke nyamile.

Hiroki: Ke leka gore ke se ke ka tshwenyega ka dilo tšeo nka se kego ka dira selo ka tšona. Go dira bjalo ke go itshenyetša nako. Ka lehlakoreng le lengwe, ke dira sohle seo nka se kgonago go imatlafatša moyeng gomme ga ke diriše boemo bja-ka e le lebaka la gore ke se ke ka ithuta Beibele. Ge ke hlobaela, ke lebelela seo e le sebaka sa go rapela.—Bona Baroma 12:12.

Phafoga!: Ba bangwe ba ile ba go kgothatša bjang?

Hiroki: Ka mehla bagolo ba a ntheta ka baka la  bonyenyane bjoo ke kgonago go bo dira. Bana bešo le dikgaetšedi ka phuthegong le bona ba sepela le nna ge ba e-ya maetong a go boela le dithutong tša Beibele.—Bona Baroma 12:10.

Danielle: Selo seo se nkgomago kudu ke ge bana bešo le dikgaetšedi ka phuthegong ba ntheta go tšwa pelong. Seo se dira gore ke ikwe ke le wa bohlokwa gomme se nkgothaletša gore ke tšwele pele.

Timothy: Go na le kgaetšedi yo a godilego ka phuthegong yoo ka mehla a dirago boiteko bjo bo kgethegilego bja go bolela le nna dibokeng. Le gona bagolo le basadi ba bona ba a nkgothatša le go nnea ditšhišinyo tše di šomago. Mogolo yo mongwe, yo a nago le nywaga e 84, o nthušitše gore ke ipeele dipakane tšeo nka kgonago go di fihlelela. Mohlanka wa bodiredi o ile a ntaletša gore ke šome le yena bodireding gomme a rulaganya gore re šome karolo yeo e nago le ditsela tše di bataletšego le yeo nka kgonago go sepela go yona ka setulo sa-ka sa digole.—Bona Psalme 55:22.

Natalie: Gatee-tee ge ke tsena ka Holong ya Mmušo, bana bešo le dikgaetšedi ba moya ba ntumediša ka myemyelo ka borutho. Ka mehla bao ba godilego ba dula ba e-na le mantšu a kgothatšago ao ba mpotšago ona, go sa šetšwe mathata ao ba nago le ona.—Bona 2 Bakorinthe 4:16, 17.

Phafoga!: O thušwa ke’ng gore o dule o e-na le boemo bjo nepagetšego bja kgopolo?

Hiroki: Bjalo ka yo mongwe wa Dihlatse tša Jehofa, ke kopanela le mokgatlo wa batho bao ba nago le kholofelo e kgahlišago. Go lemoga gore ke karolo ya mokgatlo woo go nthuša gore ke be le boemo bjo bo nepagetšego bja kgopolo.—Bona 2 Koronika 15:7.

Danielle: Ke nagana ka tokelo yeo ke nago le yona ya go kwešiša morero wa Modimo. Go na le batho bao ba phetšego gabotse mmeleng, eupša ga ba kgotsofatšwe ke bophelo bja bona go etša kamoo nna ke kgotsofatšwago ke bja-ka.—Bona Diema 15:15.

Natalie: Ke hwetša go le bohlokwa gore ke gwerane le batho bao ba nago le pono e botse. Le gona go a kgothatša go bala diphihlelo tša batho ba bangwe bao ba hlankelago Jehofa go sa šetšwe diteko. Le gona ge ke e-ya Holong ya Mmušo, ka mehla ke a tseba gore ke tla matlafatšwa le go gopotšwa kamoo e lego tokelo go ba yo mongwe wa Dihlatse tša Jehofa.—Bona Baheberu 10:24, 25.

Timothy: Go ya ka 1 Bakorinthe 10:13, Jehofa a ka se ke a re dumelela gore re tlaišwe go feta kamoo re ka kgonago go kgotlelela. Ke phetha ka gore ge Mmopi wa-ka a kgodišegile gore nka kgona go lebeletšana ka katlego le teko ye, gona ke ka baka la’ng ke swanetše go phegišana le yena?

Dihlogo tše di oketšegilego go tšwa lelokelelong la dihlogo tša “Bafsa ba a Botšiša” di ka hwetšwa mokerong wa Web wa www.watchtower.org/ype

SEO GO KA NAGANWAGO KA SONA

▪ Hiroki le Timothy ba sepela ka ditulo tša digole. Ge e ba o le boemong bjo bo swanago le bja bona, mantšu a bona a ka go thuša bjang gore o dule o e-na le boemo bjo bo nepagetšego bja kgopolo?

▪ Danielle o bolela gore “ka ge maswao a bolwetši bja swikiri a sa bonagale, batho ba bangwe ga ba lemoge kamoo bo lego kotsi ka gona.” Na le wena o tlaišwa ke bolwetši bjoo maswao a bjona “a sa bonagalego”? Ge e ba go le bjalo, ke’ng seo o ka ithutago sona mantšung a Danielle?

▪ Natalie o re bjo bongwe bja mathata a magolo ao a nago le ona ke go lebeletšana le tsela yeo batho ba itshwarago ka yona ge ba mmona. O ka dira bjang gore motho yo a swanago le Natalie a ikwe a lokologile? Ge e ba o e-na le bolwetši goba bogole bjoo bo dirago gore o ikwe kamoo Natalie a ikwago ka gona, o ka ekiša boemo bja gagwe bjo bo nepagetšego bja kgopolo bjang?

▪ Ngwala lelokelelo la maina a batho bao o ba tsebago bao ba tlišwago ke bogole goba malwetši ao a sa alafegego ka mo tlase.

․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․

▪ O ka dira’ng gore o kgothatše yo mongwe le yo mongwe wa bona?

․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․

․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․

[Lepokisigo letlakala 9]

Khomotšo e Tšwago ka Beibeleng

▪ Jesu o kwela bao ba babjago bohloko e le ka kgonthe.—Mareka 1:41.

▪ Ka go “fodiša mohuta o mongwe le o mongwe wa bolwetši le mohuta o mongwe le o mongwe wa bofokodi,” Jesu o bontšhitše phodišo yeo e tlago go direga ka tlase ga Mmušo wa Modimo.—Mateo 4:23.

▪ Lefaseng le lefsa la Modimo, “xo ka se bê le e a rexo: Ke a babya!” gomme bohloko bo ka se sa hlwa bo e-ba gona.—Jesaya 33:24; Kutollo 21:1-4.

▪ Gaešita le lehu le tla “fedišwa.”—1 Bakorinthe 15:25, 26.

[Seswantšho go letlakala 8]

Hiroki, 23 Japane

[Seswantšho go letlakala 8]

Natalie, 20 Afrika Borwa

[Seswantšho go letlakala 8]

Timothy, 20 Brithania

[Seswantšho go letlakala 8]

Danielle, 24 Australia