O ka Hwetša Dikarabo Kae?

PAKANE e nngwe ya bodumedi ke go ruta morero wa bophelo. Lega go le bjalo, batho ba bantši ba ile ba hwetša gore go nyaka ga bona dilo tša moya ga se gwa ka gwa kgotsofatšwa ke dithuto tša bodumedi bja bona. Denise, yo a godišitšwego e le Mokatholika o gopola gore: Katikasema ya Baltimore e na le potšišo e rego, ‘Ke ka baka la’ng Modimo a re bopile?’ gomme karabo e re, ‘Modimo o re bopetše go bontšha botse bja Gagwe le go abelana le rena lethabo la ka mo go sa felego legodimong.’

Denise o tšwetše pele ka gore: “Seo ga se sa ka sa mpha lebaka le le kwagalago la gore ke phelela eng. Ge e ba ke letetše go fo ya legodimong, ke swanetše go ba ke dira’ng gona bjale?” Phihlelo ya Denise e tlwaelegile. Nyakišišo e nngwe e hweditše gore pedi-tharong ya bao go ilego gwa boledišanwa le bona ba dumela gore dikereke tše dintši le disinagoge ga di thuše batho go hwetša morero wa bophelo.

Ka baka leo, ba bantši ba retologela felo-tsoko bakeng sa go hwetša dikarabo—go thutamahlale goba go mehuta e fapa-fapanego ya filosofi e bjalo ka yeo e rutago gore batho ba ithekge ka maikwelo a bona e sego ka matla ao a fetago a tlhago, e rutago gore bophelo ga bo na mohola le yeo e rutago gore legohle ga le na morero. Ke ka baka la’ng batho ba tšwela pele ba tsoma, gaešita le ge e le ba mmalwa feela bao ba hwetšago kgotsofalo?

Bohwa bja Moya

Dr. Kevin S. Seybold o e bitša “tshekamelo yeo go bonagalago e le ya legohle gore batho ba rapele selo se itšego.” Nywageng ya morago bjale, bo-rathutamahlale ba bantši ba fihleletše phetho ya  gore ge e le gabotse batho ba neilwe bohwa bja go tsoma morero o tseneletšego bophelong. Ge e le gabotse, ba bangwe ba dumela gore bohlatse bja bohwa le bjo bongwe bja mabapi le tsela yeo mmele o šomago ka yona bo bontšha lebaka la tlhago la gore batho ba be le tswalano le matla a phagamego.

Gaešita le ge diithuti le ditsebi di ngangišana ka taba ya ge e ba motho a e-na le senyakwa sa borapedi, batho ba bantši ga ba hloke gore ditsebi di ba botše gore batho ba na le senyakwa sa moya. Ke boemo bja rena bja moya bjo bo dirago gore go tle dipotšišo tše bohlokwa kudu ka menaganong ya rena tše bjalo ka gore: Re phelela eng? Re swanetše go dira’ng ka maphelo a rena? Na re a ikarabela go Mmopi yo matla ohle?

Ge o ka ipha nako ya go hlahloba lefase ka kelohloko, o tla hwetša dikarabo tša tše dingwe tša dipotšišo tše. Ka mohlala, ela hloko dilo tše di raraganego tša tlhago, go tloga go diphedi tše di nago le sele e tee go ya go tše di raraganego tšeo di phetšego ka nywaga e dimilione. Na ga di re botše gore go na le Mohlami yo bohlale, goba Mmopi? Beibele e re: “Gobane dika tša [Modimo] tše di sa bonagalego di bonwa gabotse go tloga tlholong ya lefase go ya pele, gobane di hlathwa ka dilo tšeo di dirilwego, ke gore matla a gagwe a neng le neng le Bomodimo, mo ba hlokago boitshwarelelo.”—Baroma 1:20.

Kgotsofatša Senyakwa sa Gago sa Moya

Beibele e bolela mabapi le tsela yeo Modimo a bopilego batho ka yona gore: “Le bosafelego o bo beile dipelong tša bona.” (Mmoledi 3:11, PK) Kganyogo yeo re belegwego re e-na le yona ke go phela, e sego go hwa. Go nyaka mo re go abetšego ke go tseba morero wa bophelo, go nyaka dikarabo tša dipotšišo.

Ge e le gabotse, go tsoma dikarabo ke e nngwe ya dilo tšeo re di dirago ge re le batho. Ka morago ga go lemoga dilo tšeo motho a di fihleletšego go tša thutamahlale le thekinolotši, mongwadi wa The Wall Street Journal o ngwadile gore: “Re sa dutše re e-na le dipotšišo tša gore re bomang le gore re phelela eng le gore re lebile kae.” Ka bohlale, re tla tsoma dikarabo go tšwa mothopong o kaone-kaone. Ge Beibele e bolela ka Mothopo woo e re “Modimo . . . ké Yêna a re dirilexo; xa r’a itira.”—Psalme 100:3.

Na ga go kwagale gore re lebelele go Yo a ikarabelago ka mehlolo e bjalo ya tlholo gore re kgotsofatše senyakwa sa rena sa moya? Jesu Kriste o kgothaleditše gore re dire bjalo. O be a lemoga gore ke Mothopo wa bophelo feela—Mmopi wa rena—wo o ka kgotsofatšago senyakwa sa rena sa moya.—Psalme 36:5, 9; Mateo 5:3, 6.

Ka kgonthe, go hwetša karabo e ka botwago potšišong e rego, Re phelela eng? go bohlokwa gore re kgotsofatše senyakwa sa rena sa moya. Hle ela hloko pono e lapološago ya Mmopi wa rena tabeng ye.